પાલનપુરના ચંડીસર ખાતે ઠાકોર સમાજે શરૂ કરી સ્પર્ધાત્મક પરીક્ષાની લાયબ્રેરી

બનાસકાંઠા જિલ્લો શિક્ષણની બાબતમાં અગ્રેસર છે. તેમાં પણ ઠાકોર સમાજમાં શિક્ષણ માટેની વિપુલ તકો રહેલી છે. તેથી પાલનપુર તાલુકામાં ઠાકોર સમાજના સરકારી કર્મચારીઓએ સમાજના દીકરા દીકરીઓને શિક્ષિત કરી સરકારી નોકરી અપાવવા બીડું ઝડપ્યું છે. સમાજના કર્મચારી સંગઠને ચંડીસર ખાતે સમાજ માટે વિનામૂલ્યે લાયબ્રેરી તૈયાર કરી છે. જેમાં આજુબાજુના 25 ગામોના સમાજના વિદ્યાર્થીઓ સ્પર્ધાત્મક પરીક્ષાની સરળતાથી તૈયારી કરી શકશે.

• ઠાકોર સમાજ કર્મચારી સંગઠને અભિયાન ઉપાડ્યું
• ઠાકોર સમાજે વિનામૂલ્યે રીડિંગ લાયબ્રેરીની સુવિધા શરૂ કરી
• 45 વિધાર્થીઓની બેઠક વ્યવસ્થા
• આસપાસના 25 ગામોના છાત્રો લઈ શકશે લાભ

બનાસકાંઠા : ઠાકોર સમાજમાંથી આવતાં નાયબ મામલતદાર, પોલીસકર્મી, લશ્કરી જવાનો, સરકારી આગેવાનો, સરપંચો અને અગ્રણીઓ સહિત ઠાકોર સમાજ કર્મચારી સંગઠને સમાજના યુવાનોને સરકારી નોકરીની તૈયારી માટે વધુ નાણાં ખર્ચવા ન પડે અને તેમને ગ્રામ્ય લેવલે જ સુવિધાયુક્ત લાયબ્રેરી વિનામૂલ્યે મળી રહે તેવા ઉમદા આશયથી પાલનપુરના ચંડીસર ખાતે લાખોના ખર્ચે વિનામૂલ્યે રીડિંગ લાયબ્રેરી શરૂ કરી છે. જેમાં 45 વિધાર્થીઓને બેસવાની વ્યવસ્થા છે. તેમજ અહીં જીપીએસસી તેમજ ગૌણ સેવા પસંદગી મંડળની પરીક્ષાઓ માટેના તમામ પુસ્તકો પણ ઉપલબ્ધ રહેશે. જે આ રવિવારથી ખુલ્લી મુકવામાં આવશે. બનાસકાંઠા જિલ્લાનું ઠાકોર સમાજ હવે કુરિવાજોને તિલાંજલિ આપી શિક્ષણમાં ઉત્તરોતર પ્રગતિ સાધી રહ્યું છે. નવી પેઢી શિક્ષણમાં આગળ વધે તે માટે યથાર્થ કાર્યો થઇ રહ્યા છે. જ્યાં પાલનપુર તાલુકાના ચંડીસર ગામની આ રીડિંગ લાયબ્રેરીથી સમાજના દીકરા દીકરીઓ શિક્ષણમાં વધુ આગળ વધશે તેમ સમાજના જાગૃત યુવાનોએ જણાવ્યું હતું.

ચંડીસરમાં અગાઉ પણ વિનામૂલ્યે સ્પર્ધાત્મક પરીક્ષાના કલાસ શરૂ કરાયા હતા

પાલનપુર તાલુકાના ચંડીસર ખાતે યુવાનોના શિક્ષણ અને રોજગારી માટે અવારનવાર પ્રયાસો કરવામાં આવે છે. કોરોના મહામારી પહેલાં ચંડીસર ગ્રામપંચાયત અને સ્થાનિક દાતાઓની મદદથી ગામમાં તમામ ધર્મ-સમાજ માટે વિનામૂલ્યે સ્પર્ધાત્મક પરીક્ષાના વર્ગો શરૂ કરાયા હતા. જેમાંથી પણ કેટલાક વિદ્યાર્થીઓ સરકારી ભરતી પરીક્ષા પાસ કરવામાં સફળ રહ્યા હતા.