બનાસકાંઠાના અંબાજીથી રાકેશ ટિકૈતે ખેડૂત સંવાદ યાત્રાનો કર્યો પ્રારંભ

દિલ્હી-હરિયાણા બોર્ડર ઉપર ચાલી રહેલા ખેડૂત આંદોલનના પ્રણેતા રાકેશ ટિકૈતે ખેડૂત આંદોલનની ગુજરામાં પણ શરૂઆત કરી છે. ખેડૂત આંદોલનના પગલે ગુજરાતમાં ખેડૂતોની હાલત જાણવા અને તેમને ન્યાય અપાવવા માટે રાજ્યના પૂર્વ મુખ્યપ્રધાન શંકરસિંહ વાઘેલા સાથે રાકેશ ટિકૈતે અંબાજીથી પોતાની ખેડૂત સંવાદ યાત્રાનો પ્રારંભ કર્યો હતો.

• શંકરસિંહ વાઘેલા સાથે રહી રાકેશ ટિકૈતે અંબાજીથી ખેડૂત સંવાદ યાત્રાનો પ્રારંભ કર્યો
• બનાસકાંઠા જિલ્લાના કોંગ્રેસના ધારાસભ્યો પણ રાકેશ ટિકૈતના સ્વાગત કાર્યક્રમમાં જોડાયા
• રાજસ્થાનના સૂરપગલા ખાતે રાકેશ ટિકૈતે ખેડૂતોની સભાને સંબોધિત કરી

બનાસકાંઠાઃ દિલ્હી-હરિયાણા બોર્ડર પર કેન્દ્ર સરકારના કૃષિ કાયદા વિરોધ ખેડૂતો આંદોલન કરી રહ્યા છે. જે આંદોલનને વાંચા આપવા માટે ખેડૂત આંદોલનના પ્રણેતા રાકેશ ટિકૈત બે દીવસીય ગુજરાતની મુલાકાતે આવ્યા છે. રાજ્યના ખેડૂતોની હાલત જાણવા અને તેમને ન્યાય અપાવવા માટે રાજ્યના પૂર્વ મુખ્યપ્રધાન શંકરસિંહ વાઘેલા સાથે રાકેશ ટિકૈતે અંબાજીથી પોતાની ખેડૂત સંવાદ યાત્રાનો પ્રારંભ કર્યો હતો. આજે રવિવારે સવારે રાકેશ ટિકૈત ટ્રેન માર્ગે આબુરોડ આવી પહોંચ્યા હતા. જ્યાં રાષ્ટ્રીય કિસાન મોરચાના આગેવાનો તેમજ સેવા દળના કાર્યકર્તાઓ દ્વારા તેમનું સ્વાગત કરવામાં આવ્યું હતું. આ પ્રસંગે બનાસકાંઠા જિલ્લાના કોંગ્રેસના ધારાસભ્યો પણ રાકેશ ટિકૈતના સ્વાગતમાં જોડાયા હતા. રાકેશ ટિકૈટ દ્વારા આયોજિત કાર્યક્રમ દરમિયાન ગુજરાતની સરહદ નજીક રાજસ્થાનના સૂરપગલા ખાતે ખેડૂતોની સભાને પણ સંબોધિત કરી હતી. આ ઉપરાંતના 20 જેટલા ટ્રેક્ટરો સાથે ખેડૂતો આ યાત્રામાં જોડાયા હતા. રાજસ્થાનના સૂરપગલા ખાતે તેમનું સ્વાગત થયા બાદ રાકેશ ટિકૈતને રેંટીયો અર્પણ કરી તેમજ માથે સાફો બાંધી કાર્યકરો દ્વારા તેમનું સ્વાગત કરાયું હતું.

આ પણ વાંચો:ખેડૂત નેતા રાકેશ ટિકૈત બનાસકાંઠા પહોંચ્યા, ટ્રેક્ટર રેલી સાથે અંબાજી જશે

રાજસ્થાનના 500 જેટલા ખેડૂતોની પોલીસે અટકાયત કરી

સૂરપગલામાં સ્વાગત બાદ રાકેશ ટિકૈતની યાત્રા ગુજરાત તરફ આવતા રાજ્યની સરહદ નજીક રાકેશ ટિકૈતે વિશાળ પોલીસ કાફલા સાથે ગુજરાતમાં પ્રવેશ કર્યો હતો. જોકે આ પ્રવાસ દરમિયાન રાકેશ ટિકૈત દ્વારા કોઈપણ જાતના RT-PCR ટેસ્ટનું સર્ટીફીકેટ બતાવ્યું ન હતું. છતા છાપરી ખાતે કેટલાક ખેડૂતો દ્વારા તેમનું સ્વાગત કરવામાં આવ્યું હતું અને હળ અર્પણ કરાવ્યું હતું. ગુજરાતની સરહદમાં તેમની યાત્રા દરમિયાન રાજસ્થાનથી આવતા 500 ઉપરાંત ખેડૂતોને સરહદ છાપરી બોર્ડરે પોલીસ દ્વારા અટકાવવામાં આવ્યા હતા.

ખેડૂતોએ સોશિયલ ડિસ્ટન્સ અને માસ્કના નિયમોનો ભંગ કર્યો

પોલીસને રજૂઆત કર્યા બાદ તમામ ખેડૂતોએ ધક્કામુક્કી કરી ગુજરાતમાં પ્રવેશ કર્યો હતો. ઉપરાંત ખેડૂતોએ સોશિયલ ડિસ્ટન્સ અને માસ્કના નિયમોનો સરેઆમ ભંગ કર્યો હતો, એટલું જ નહીં આબુરોડથી સાથે જોડાયેલા 20 ઉપરાંત ટ્રેક્ટરોને ગુજરાતની સરહદ છાપરીએ અટકાવી દેવામાં આવ્યા હતા. ત્યારે સરહદ છાપરીથી અંબાજી સુધી મોટી સંખ્યામાં બાઈક ચાલકો એક રેલી મારફતે રાકેશ ટિકૈત સાથે અંબાજી મંદિર પહોંચ્યા હતા. જ્યાં માતાજીના ગર્ભગૃહના બહારથી જ દર્શન કર્યા હતા તેમજ મંદિરમાં પણ માસ્કના નિયમનનો છડેચોક ભંગ કર્યો હતો.

ટિકૈતે શંકરસિંહ વાઘેલા તરફ ઈશારો કરી કહ્યું કે, બુઢા શેર બહાર નીકલા હૈ...

રાકેશ ટિકૈતે ભટ્ટજી મહારાજની ગાદી ઉપર મહારાજના આશિર્વાદ મેળવ્યા હતા અને તેઓ દર્શન કર્યા બાદ એક રેલી સ્વરૂપે પોતાની ખેડૂત યાત્રાનો પ્રારંભ કર્યો હતો. જ્યાં આદીવાસી લોકોએ ઢોલ-નગારા સાથે તેમનું સ્વાગત કર્યુ હતું અને અંબાજી સર્કલ પાસે પોતાના રથ ઉપરથી જ રાકેશ ટિકૈતે સભાને સંબોધિત કરી હતી. રાકેશ ટિકૈતે ભાષણ દરમિયાન નિવેદન આપતા જણાવ્યું હતું કે, ગુજરાતમાં સંપૂર્ણ તૈયારીઓ સાથે આ આંદોલન માટે નીકળ્યા છીએ. રાકેશ ટિકૈતે નવ જવાનોની જગ્યાએ શંકરસિંહ વાઘેલા તરફ ઈશારો કરતા તેમણે કહ્યું હતુ કે, બુઢા શેર બહાર નીકલા હૈ. હમ પુરાને ઓજારો કે સાથ આંદોલન કરેંગે.

આ પણ વાંચો:રાકેશ ટિકૈતની ગુજરાત મુલાકાતને લઈને રાજકીય નેતાઓએ આપી પ્રતિક્રિયા

કોઇપણ જાતનો બનાવ બનશે તો 20 મિનિટમાં આખું ભારત બંધ થઈ જશે

તેમણે વધુમાં જણાવ્યું હતું કે, તેઓ સંપૂર્ણ તૈયારીઓ સાથે ગુજરાતમાં આવ્યા છે અને કોઇપણ જાતનો બનાવ બનશે તો 20 મિનિટમાં આખું ભારત બંધ થઈ જશે એવી પણ ચિમકી ઉચ્ચારી હતી. ગુજરાતમાં રાજનીતિની લડાઈ છે. ત્યારે આગામી સમયમાં પ્રેસ મુક્તિ અભિયાન, કિસાન મુક્તિ અભિયાન, નવ જવાન મુક્તિ અભિયાનના ભાગ સ્વરૂપે ગુજરાતમાં એક મોટું આંદોલન ઊભું કરવાની પણ ચીમકી તેમને પોતાના રથ પરથી ઉચ્ચારી હતી. તેમણે ખાસ કરીને ખેડૂતોને તેમની જમીન પરત કરવા તેમજ સરકારના ત્રણ કાળા કાયદા પાછા ખેંચવા સાથે જે રીતે દિલ્હીમાં આંદોલન થયું છે તે જ રીતે ગુજરાતમાં પણ આંદોલન થશે તેમ તેમણે જણાવ્યું હતું. વધુમાં કહ્યું કે, આ આંદોલન ત્રણ ટી એટલે કે ખેડૂતો ટ્રેકટર, સાથે નવયુવાન ટ્વીટર સાથે અને દેશનો જવાન ટેન્કરો સાથે આ લડાઈ લડશે અને જો ખેડૂતોને હેરાન કરવામાં આવશે તો ભાજપના એકપણ ધારાસભ્ય રોડ ઉપર ફરવા નહીં દેવામાં આવે તેવી પણ તેમને ખુલ્લી ધમકી ઉચ્ચારી હતી. મીડિયા દ્વારા પૂછાયેલા એક પ્રશ્નમાં પોતે શક્તિ પ્રદર્શન કરી કોંગ્રેસમાં પ્રવેશ કરવા માંગી રહ્યા છે તેવા સવાલ સામે જવાબ આપ્યો કે, આ લડાઈ કોઈ પાર્ટી, કોઈપણ જાતના ધર્મની નથી. આ આંદોલન માત્ર ખેડૂતોનું છે.

પૂર્વ મુખ્યપ્રધાન શંકરસિંહ વાઘેલાએ ટિકૈતને આવકાર્યા

ગુજરાતમાં પ્રવેશેલા રાકેશ ટિકૈટને રાજ્યના ખેડૂતોને સાથ આપવા બદલ પૂર્વ મુખ્યપ્રધાન શંકરસિંહ વાઘેલાએ પણ ટિકૈતને આવકાર્યા હતા અને ગુજરાતમાં તેઓ ખેડૂતોના અવાજ બનવા માટે અને દુઃખમાં ભાગ લેવા માટે તે આવ્યા છે. આ સાથે જ કહ્યું કે, સરદારનું ગુજરાત છે તે કોઈના બાપની માલિકી નથી તેવા શબ્દો સાથે સરકાર પર ચાબખા કર્યા હતા.