ચોરાયેલાં 57 મોબાઈલ ફોન રેલવે પોલીસે મૂળ માલિકોને પરત સોંપ્યાં

ચોરીની ઘટના બને ત્યારે જેની વસ્તુ ચોરાઈ ગઈ હોય તે ફરિયાદ કરે તો પણ ક્યાંકને ક્યાંક ધારી લે છે કે કદાચ તેની વસ્તુ હવે કદી પરત નહીં મળે. પણ સંયોગ ક્યારેક પોલીસના ખાતામાં સફળતા લખી દે તો મળી પણ શકે છે. પાલનપુર રેલવે સ્ટેશન વિસ્તારમાં ચોરાયેલાં 57 મોબાઈલ ફોન તેના મૂળ માલિકોને રેલવે પોલીસે પરત કર્યાં છે. લાંબા સમય બાદ ચોરાયેલાં કે ખોવાયેલાં ફોન મળતાં માલિકોની ખુશીનો પાર રહ્યો ન હતો.

પાલનપુરઃ બનાસકાંઠામાં પાલનપુર રેલવે સ્ટેશન હદ વિસ્તારમાં પ્રવાસીઓના ચોરાયેલાં 57 મોબાઇલ ફોન આજે રેલવે પોલીસે મૂળ માલિકોને પરત સોંપ્યાં છે. અલગ અલગ ગુનાઓનો ભેદ ઉકેલી મોબાઇલ પરત મળતાં લોકોએ હાશકારો અનુભવ્યો છે.

ચોરાયેલાં 57 મોબાઈલ ફોન રેલવે પોલીસે મૂળ માલિકોને પરત સોંપ્યાં

પાલનપુર રેલવે સ્ટેશનમાં દિવસ દરમિયાન હજારો પ્રવાસીઓ રેલવેનો પ્રવાસ કરતા હોય છે. જેમાં કેટલાક પ્રવાસીઓ પોતાના મોબાઇલ ઉપર વાત કરતાં કરતાં મોબાઇલ પ્લેટફોર્મ પર ભૂલી ટ્રેનમાં બેસી જતાં હોય છે. તો કેટલાક પ્રવાસીઓના મોબાઇલોને ગઠીયાઓ દ્વારા ચોરી કરવામાં આવતાં હોય છે. જે ફરિયાદોના આધારે પાલનપુર રેલવે પીએસઆઇ પી. એફ. પઠાણના માર્ગદર્શન હેઠળ મિસિંગ સ્કવોડ તૈયાર કરવામાં આવી હતી. જેમાં મિસિંગ સ્કવોડના સામળભાઇ ચૌધરી સહિત અલગ અલગ ટીમો છેલ્લા એક વર્ષમાં જુદાં જુદાં બિનવારસી 57 મોબાઇલ ફોન સી.ડી.આર રિપોર્ટના આધારે કબજે લેવામાં આવ્યાં હતાં. બાદમાં આ તમામ મોબાઇલધારકોના વાલીવારસોની શોધખોળ કરી મૂળ માલિકને આજે મોબાઇલ ફોન પરત કરવામાં આવ્યાં છે, વર્ષો પછી ચોરાયેલા કે ગુમ થયેલા મોબાઇલ મળી આવતાં લોકોએ ખુશી અનુભવી હતી.