ખંભાત નગરપાલિકાની લાખોની વેરા વસૂલાત બાકી

ખંભાત પાલિકા દ્વારા વેરા વસૂલાત બાબતે સામાન્ય માણસોના ઘર ઢોલ નગારા વગાડી ખુલ્લા પાડવામાં આવી રહ્યા છે. ઉપરાંત નોટીસો ફટકારવામાં આવી રહી છે. જ્યારે બીજી તરફ ખંભાતની વિવિધ સરકારી કચેરીઓનો લાખો રૂપિયાનો વેરો બાકી છે. નગરપાલિકા દ્વારા કોઈ પગલા ન લેવાતા શહેરીજનોમાં ભારે રોષ વ્યાપ્યો છે. જોકે, નગરપાલિકા ચીફ ઓફિસરને વહીવટદાર તરીકે નિમણૂક મળતા 32 લાખ 24 હજારનો વેરો વસૂલ્યો હોવાનું પણ જાણવા મળ્યું છે.

• ખંભાત નગરપાલિકાની લાખોની વેરા વસૂલાત બાકી
• ઉમેદવારી નોંધાવનારા અનેક નેતાઓની વેરા ભરપાઈ બાકી
• ખંભાત પાલિકાની 62 લાખ 27 હજારની વેરા વસુલાત સરકારી કચેરીઓની બાકી

ખંભાત :નગરપાલિકામાં અનેક મોટા માથાઓ તથા રાજકારણીઓના ઘર દુકાનો તથા ઓફિસોના વેરા ભરવાના બાકી છે. છતાં આજદિન સુધી કોઈ કાર્યવાહી કરવામાં આવી નથી. જ્યારે છેલ્લા બે-ત્રણ દિવસથી નગરપાલિકામાં ઉમેદવારી નોંધાવનારા અનેક નેતાઓની વેરા ભરપાઈ બાકી હોવાથી તેઓ દ્વારા વેરાની ભરપાઈ માટે નગરપાલિકામાં લાંબી કતારો જોવા મળી રહી છે. સામાન્ય પરિવારમાંથી આવતા અનેક લોકોના વેરા બાકી હોઇ નગરપાલિકા દ્વારા ઘેર-ઘેર ઢોલ નગારા વગાડી વેરાની વસૂલાત કરાઈ હોવાનું પણ જાણવા મળે છે. આ ઉપરાંત નગરપાલિકા દ્વારા નોટિસ પાઠવવામાં આવી રહી છે.

નગરપાલિકાની લાખોની વેરા વસૂલાત બાકી

સરકારી કચેરીઓનો લાખોનો વેરો ભરપાઈ કરવાનો બાકીસરકારી કચેરીઓનો લાખોનો વેરો ભરપાઈ કરવાનો બાકી છે. જેમાં,જિલ્લા પોલીસ અધિકારી કચેરીનો 27,12,834, તાલુકા પંચાયત કચેરીનો 28,25,979, ગુજરાત સ્ટેટ સિવિલ સપ્લાયર કોર્પોરેશનનો 4,08,398, માર્ગ અને મકાન વિભાગ, પેટા વિભાગ નાયબ કાર્યપાલક ઇજનેર 1,47,582, ખેતીવાડી પેટા વિભાગીય અધિકારી 54109 અને કેનેડી હોસ્પિટલ 78,703 કુલ મળી 6,22,7645નો વેરો ચૂકવવાનું બાકી છે. છતાં પણ નગરપાલિકા દ્વારા આજ દિન સુધી આ કચેરીઓ બાબતે કોઈ પગલા ન લેવાતા શહેરીજનોમાં આ અંગે રોષ વ્યાપ્યો છે.