ચરોતરનું મલાતજ ગામ મનુષ્ય અને મગર વચ્ચેની મિત્રતા માટે આજે પ્રચલિત બન્યું

સોજીત્રા: મધ્ય ગુજરાતમાં મગરોના સૌથી મોટું આશ્રય સ્થાન ગણાતું હોય તો તે વડોદરામાં આવેલી વિશ્વામિત્રી નદી છે ત્યારબાદ બીજા ક્રમે આણંદ જિલ્લાનું એક એવું ગામ આવે છે કે જે ગામ મગર મિત્ર બની ગયું છે. ચાલો તમને આ ગામમાં લઇ જઇએ...

આણંદ જિલ્લાના સોજીત્રા થી આશરે સાત કિલોમીટર દૂર 6 હજારની વસ્તી ધરાવતું "મલાતજ" ગામ આજે ચરોતરમાં મગર મિત્ર ગામ તરીકે ઓળખ પામ્યું છે. તેનું કારણ છે ગામની નજીક આવેલા વૈજનાથ મહાદેવ પાસેનું મહાદેવ તળાવ. જેમાં અંદાજિત ૯૦ કરતા વધારે મગર વસવાટ કરે છે. ચોમાસાની ઋતુમાં જ્યારે ભારે વરસાદના કારણે તળાવ છલકાય છે ત્યારે તળાવના મગર ગામમાં ફરતા પણ નજરે ચડે છે. પરંતુ મહત્વની વાત એ છે કે વિક્રમ સંવત 1455 માં જ્યારે આ ગામ માં વસવાટ થવાનું ચાલુ થયું ત્યારથી આજ સુધી ગામની કોઈપણ વ્યક્તિને કે પશુને મગર દ્વારા કોઇપણ પ્રકારની નુકસાન પહોંચાડવામાં આવ્યું નથી.

ભારતમાં મગરની ત્રણ પેટા જાતિઓ જોવા મળે છે જેમાં મીઠા પાણીના મગર ખારા પાણીના મગર અને ઘડિયાલ મગર નો સમાવેશ થાય છે. મલાતજ ગામના તળાવમાં મોટાભાગના ઘડિયાળ જાતિના મગર વસવાટ કરે છે. માદા મગર દ્વારા તળાવને કાંઠે ઈંડા મૂકવામાં આવે છે તે મલાતજ ગામના બાળકો માટે રમતનું સાધન બની જાય છે. જ્યારે ઈંડામાંથી મગરનું બચ્ચુ બહાર આવે ત્યારે ગામના બાળકો બચ્ચાની સારસંભાળ રાખવાના કામમાં લાગી ગયેલા જોવા મળે છે. સામાન્ય રીતે અન્ય ગામોમાં બાળકો ગલુડિયાઓને રમાડતા નજરે પડે છે ત્યારે મલાતજના બાળકો મગરના બચાઓને રમાડતા નજરે પડે છે.

હાલમાં જ ગામના એક મકાનમાં રાત્રી દરમિયાન અંદાજિત નવ ફૂટ લાંબો મહાકાય મગર અચાનક આવી ચડ્યો હતો જેને ગામવાસીઓ દ્વારા રેસ્ક્યુ કરી ફરી નજીકના તળાવમાં છોડી મૂકવામાં આવ્યો... મહત્વની વાત એ છે કે રાત્રી દરમિયાન અંધકારમાં આવેલા મગર જે ઘરમાં ઘૂસ્યો હતો ત્યાં દુધાળા પશુઓના બચ્ચા પણ હતા અને ઘરમાં પણ નાના બાળકો મીઠી નિંદર માણતા હતા પરંતુ મગર એ કોઈને પણ નુકસાન પહોંચાડ્યું ન હતું.

પ્રકૃતિપ્રેમીઓ અને આસપાસના રહેવાસીઓ માટે મલાતજ ગામ,, એક પર્યટક સ્થળ છે, જ્યાં કુદરતી વાતાવરણમાં મગરને માણવા અનેક લોકો આવતા હોય છે. ત્યારે ગ્રામજનો ચોક્કસ એ પણ ધ્યાન રાખે છે બહારથી આવનાર વ્યક્તિઓ કે મુલાકાતીઓ મગરને હેરાન ન કરે.