પરિણીતાએ પતિના દબાણથી કંટાળીને ગળેફાંસો ખાઈ કર્યો આપઘાત

અમદાવાદ: શહેરમાં આવેલા નારણપુરા વિસ્તારમાં રહેતા પતિને શેરબજારમાં દેવું થઈ ગયું હતું. જેના કારણે તે પત્નીને પિયરમાંથી પૈસા મંગાવવાનું દબાણ કરતો હતો. જેને લઈને પરિણીતાએ કંટાળીને આપઘાત કરી લીધો હતો. આ મામલામાં પરિણીતાના પિતાએ ઘાટલોડિયા પોલીસ સ્ટેશનમાં પતિ તેમજ તેના પરિવાર વિરૂદ્ધ ફરિયાદ નોંધાવી છે. પોલીસે પરિણીતાના પતિ અને તેના સસરાની પણ ધરપકડ કરી છે.

અમદાવાદના નારણપુરા વિસ્તારમાં સરદાર પટેલનગરમાં રહેતો નિપુલ શાહને શેરબજારમાં સટ્ટો રમવાની આદત હતી. જેના કારણે તેના પર દેવું થઈ ગયું હતું. આ દેવું થઈ જવાના કારણે નિપુલે તેની પત્ની આનલ શાહને પિયરમાંથી પૈસા લાવવા દબાણ કર્યું હતું. આ બાબતે અવારનવાર બંને વચ્ચે ઝઘડા પણ થતા હતા.

ત્યારબાદ અંતે કંટાળીને આનલે ગળેફાંસો ખાઈને આપઘાત કરી લીધો હતો. જે અંગે આનલના પિતાએ નિપુલ અને તેના પરિવાર વિરૂદ્ધ ઘાટલોડિયા પોલીસ સ્ટેશનમાં આપઘાત કર્યાનો તેમજ દુષ્પ્રેરિત કર્યા હોવાની ફરિયાદ નોંધાવી હતી. જે અંગે પોલીસે આરોપી પતિ અને સસરાની ધરપકડ પણ કરી છે.