વિરોધ પક્ષના નેતા પરેશ ધાનાણીએ રાજ્ય ચૂંટણી અધિકારી સમક્ષ કરી ફરિયાદ

આગામી 3 નવેમ્‍બરના રોજ રાજ્‍યમાં ધારી, કરજણ, લીંબડી, અબડાસા, મોરબી, ડાંગ, કપરાડા, ગઢડા વિધાનસભાની પેટાચૂંટણીઓ યોજાનાર છે. જે અંગેની ચૂંટણી પ્રક્રિયાઓ ચાલી રહી છે. ત્યારે અમરેલી જિલ્લાના ધારી વિધાનસભા મતદાર વિભાગની પેટા ચૂંટણી યોજાનાર છે. જેમાં ચૂંટણી અધિકારી દ્વારા કોંગ્રેસ પક્ષના ઉમેદવાર સાથે ભેદભાવભર્યું વલણ દાખવવામાં આવતું હોવાની માહિતી મળી હોવાની ફરિયાદ વિરોધ પક્ષના નેતા પરેશ ધાનાણીએ રાજયના મુખ્ય ચૂંટણી અધિકારી સમક્ષ કરી છે.

• વિરોધ પક્ષના નેતાએ રાજ્ય ચૂંટણી અધિકારી સમક્ષ કરી ફરિયાદ
• સમગ્ર તંત્ર શાસક પક્ષના તાબે થઇ ગયું હોવાનો કોંગ્રેસ વિરોધ પક્ષના નેતાનો આરોપ
• મતદાર યાદી ચૂંટણી પૂર્વે ઉમેદવારને ન આપી હોવાનો આરોપ

અમદાવાદઃવિરોધ પક્ષના નેતા પરેશ ધાનાણીએ રાજ્યના મુખ્ય નિર્વાચન અધિકારીને ઉદ્દેશીને પત્ર લખ્યો છે. તેની નકલ અમરેલી, વડોદરા, સુરેન્દ્રનગર, કચ્છ, મોરબી, ડાંગ, વલસાડ તથા બોટાદના જિલ્લાના જિલ્લા ચૂંટણી અધિકારી તથા કલેકટરને મોકલી છે. જેમાં જણાવ્યું છે કે, વિધાનસભા મતદાર વિભાગની માર્ક કોપી સહિતની મતદાર યાદી ઉમેદવારને ચૂંટણી પૂર્વે આપવાની હોય છે. પરંતુ હજુ સુધી આપી નથી. આ અંગે R.O. Handbookની સૂચનાઓનું પાલન કર્યું નથી. તેમ જ દિવ્‍યાંગ તથા 80 વર્ષની ઉંમરના સીનીયર સીટીઝનનો તથા કોવીડ-19 સંક્રમિત મતદારોની યાદી ઉમેદવારને આપવાની હોય છે, તે પણ આપી નથી.

ધારી વિધાનસભા મતવિભાગના 7,000 આસપાસ આવા મતદારોને આપના દ્વારા જાણ કરવામાં આવેલ છે, જે અન્‍વયે ફક્‍ત 500 મતદારો તરફથી બેલેટ મારફત મતદાન કરવા માટે નિયત નમુનામાં ફોર્મ ભરવામાં આવેલ છે, આ બાબત પણ શંકા ઉપજાવનારી છે, તેમજ ચૂંટણી પ્રક્રિયામાં આવા મતદારોને સાંકળી લેવા માટેની કામગીરી પરત્‍વે તંત્રની શિથિલતા જણાઈ આવે છે. આ ઉપરાંત ચૂંટણી એજન્‍ટની નિમણુંક નિયમોનુસાર કરવા માટે ફોટા વિગેરે વિગતો ચૂંટણી અધિકારીને રજૂ કરવા છતા પણ નિમણુંક અંગેની જાણ કે ચૂંટણી એજન્‍ટનું કાર્ડ હજુ સુધી આપ્યા નથી. જેના કારણે ઉમેદવારે જાતે વિવિધ કચેરીઓમાં જવું પડે છે.

ચુંટણી તંત્રની શિથિલતા તથા અનિયમિતતાઓ અંગે રજૂઆત

પરેશ ધાનાણીએ વધુમાં કહ્યું કે, લોકપ્રતિનિધિ અધિનિયમ તથા અન્‍ય નિયમોની જોગવાઈ મુજબ ઈવીએમ, વીવીપેટ રેન્‍ડમાઈઝેશન વગેરે ચૂંટણીને લગતી પ્રક્રિયામાં ઉમેદવાર કે તેના ચૂંટણી એજન્‍ટ હાજર રહી શકે તે માટે તેઓને નિયમોનુસાર લેખિતમાં 48 કલાક અગાઉ જાણ કરીને તેઓની હાજરીમાં પારદર્શક કામગીરી કરવાની હોય છે. તેમ છતા ધારીના ચૂંટણી અધિકારી દ્વારા ખૂબ જ ટૂંકી મુદ્દતની નોટીસથી અગત્‍યની પ્રક્રિયાઓ ઉમેદવારોની ગેરહાજરીમાં કરવામાં આવી છે, જે બાબતો શંકા ઉપજાવનારી છે. આ ઉપરાંત ચૂંટણી તંત્રની શિથિલતા તથા અનિયમિતતાઓ અંગે રજૂઆત કરી છે.

વિરોધ પક્ષના નેતા પરેશ ધાનાણીએ રાજય ચૂંટણી અધિકારી સમક્ષ કરી ફરિયાદ

પેટા ચૂંટણીઓ પારદર્શક અને નિષ્‍પક્ષ રીતે યોજાય તેવી માંગ

રાજ્‍યમાં યોજાનારી પેટા ચૂંટણીઓ પારદર્શક અને નિષ્‍પક્ષ રીતે યોજાય તે માટે સંબંધકર્તા ચૂંટણી અધિકારીઓને યોગ્‍ય સૂચના આપવા અને સમગ્ર ચૂંટણી પ્રક્રિયા નિયમોનુસાર થાય તેમજ ચૂંટણી પ્રક્રિયા ઉમેદવાર તથા તેના ચૂંટણી એજન્‍ટની હાજરીમાં જ થાય તેવી કાર્યવાહી થવી જોઈએ. જેના બદલે એકપક્ષીય રીતે ચાલી રહેલ પ્રક્રિયા શંકા ઉપજાવનારી છે અને સમગ્ર તંત્ર શાસક પક્ષના તાબે થઈ ગયેલ હોય તેવું ઉક્‍ત વિગતો જોતા જણાઈ આવે છે.

વિરોધ પક્ષના નેતા પરેશ ધાનાણીએ રાજય ચૂંટણી અધિકારી સમક્ષ કરી ફરિયાદ

પૂર્વ તૈયારીઓ અને પૂર્વાયોજનનો પણ અભાવ-કોંગ્રેસ

એટલું જ નહીં પરંતુ ચૂંટણી સાથે સંકળાયેલ તમામ અધિકારીઓ અને કર્મચારીઓ ચૂંટણી સંચાલન અંગેની અદ્યતન જાણકારી તેમજ પૂર્વ તૈયારીઓ અને પૂર્વાયોજનનો પણ અભાવ જણાય છે. તો તમામને યોગ્‍ય સૂચના આપવા ભલામણ કરી છે.

જે બાબતે ચૂંટણી તંત્રની શિથિલતા અને અનિયમિતતાઓ નીચે મુજબ હોવાનો કોંગ્રેસનો પત્રમાં આક્ષેપ

(1) R.O. Handbook પારા 12.3.7 અનુસાર ‘‘Training/Awareness'' માટેના EVMs અને VVPATsની યાદી માન્‍ય રાજકીય પક્ષો અને ઉમેદવારોને આપવાની થાય છે, જે યાદી પણ ચૂંટણી તંત્ર દ્વારા પૂરી પાડવામાં આવેલ નથી.

(2) પારા 12.3.8 અનુસાર First Level Randomization બાદ સંબંધિત વિધાનસભા બેઠકની ચૂંટણી માટે ઉપયોગમાં લેવાનાર CUs, BUs અને VVPATsની અલાયદી યાદી પણ તંત્ર દ્વારા સમયસર પૂરી પાડવામાં આવેલ નથી અને પક્ષની કચેરીએ પહોંચાડી તેની રસીદ મેળવવાની ફરજ પણ અદા કરેલ નથી. તેવી જ રીતે ECI No. 51/8/7/2017.EMS dated 30-8-2017ની ચૂંટણી પંચની સૂચનાનુસાર ઉમેદવારીપત્રો પાછા ખેંચવાની તારીખ પછી તુરત જ તમામ ઉમેદવારોને પણ આવી યાદી પૂરી પાડવાની હોય છે.

(3) પારા 12.3.9 અનુસાર મતદાન મથકો પર ઉપયોગમાં લેવાનાર CUs, BUs અને VVPATsને સ્‍ટ્રોંગરૂમમાં સીલીંગ કરવા સમયે અમોને અમારા પક્ષના પ્રતિનિધિને પોતાનું સીલ લગાવવાની તકથી પણ વંચિત રાખી શંકાસ્‍પદ કાર્યવાહી કરેલ છે.

(4) પારા 12.3.10 અનુસાર ઉમેદવારીપત્ર પાછા ખેંચવાની તારીખના તુરંત બાદ ચૂંટણી અધિકારીએ EVMs અને VVPATs તૈયાર કરવા (Candidate Set) માટેની તારીખ નક્કી કરી ઉમેદવારોને તે અંગેની લેખિત જાણ કરવાની થાય છે તથા ECI No. 51/8/7/2017.EMS dated 30-8-2017 અનુસાર ચુસ્‍તપણે પાલન કરવાની ફરજમાં ચૂક આચરેલ છે અને Balloting Unit પર પીંક પેપર સીલ પર ઉમેદવારની સહી કરવાની જોગવાઈથી વંચિત રાખવામાં આવેલ છે.

ઉક્‍ત વિગતે રાજ્‍યમાં યોજાનાર પેટા ચૂંટણીઓ પારદર્શક અને નિષ્‍પક્ષ રીતે યોજાય તે માટે સંબંધકર્તા ચૂંટણી અધિકારી ઓને આપના મારફત યોગ્‍ય સૂચના આપવા અને સમગ્ર ચૂંટણી પ્રક્રિયા નિયમોનુસાર થાય તેમજ ચૂંટણી પ્રક્રિયા ઉમેદવાર તથા તેના ચૂંટણી એજન્‍ટની હાજરીમાં જ થાય તેવી કાર્યવાહી થવી જોઈએ. જેના બદલે એકપક્ષીય રીતે ચાલી રહેલ પ્રક્રિયા શંકા ઉપજાવનારી છે અને સમગ્ર તંત્ર શાસક પક્ષના તાબે થઈ ગયેલ હોય તેવું ઉક્‍ત વિગતો જોતા જણાઈ આવે છે.