અમદાવાદની GLS યુનિવર્સિટીમાં પ્રવેશ ગેરરીતિના આક્ષેપ સાથે NSUIએ કર્યો વિરોધ

અમદાવાદના લૉ ગાર્ડન પાસે આવેલી GLS યુનિવર્સિટીમાં નકલી માર્કશીટનું કૌભાંડ ચાલતું હોવાનો NSUI દ્વારા આક્ષેપ કરવામાં આવ્યો છે. NSUIના કાર્યકર્તાઓએ આજે GLS યુનિવર્સિટીમાં પ્રવેશ માટે ગેરરીતિ થતી હોવાના આક્ષેપ સાથે વિરોધ પ્રદર્શન કર્યું હતું. GLS યુનિવર્સિટીમાં 10 વિદ્યાર્થીઓએ ગેરરીતિથી પ્રવેશ લીધા હોવાનો NSUIના કાર્યકર્તાઓએ આક્ષેપ કર્યો છે

અમદાવાદઃ.પહેલા સેમેસ્ટરમાં પરીક્ષા આપ્યા વગર જ બીજા સેમેસ્ટરમાં પ્રવેશ આપી દીધા હોવાના આક્ષેપ સાથે NSUIએ GLS યુનિવર્સિટીના રજિસ્ટ્રારને મૌખિક રજૂઆત કરી ગેરરીતિમાં સંડોવાયેલા કર્મચારીઓ અને પ્રોફેસર વિરુદ્ધ કાર્યવાહી કરવા NSUI દ્વારા માંગણી કરવામાં આવી છે. GLS યુનિવર્સિટી દ્વારા આ મામલે જો 24 કલાકમાં યોગ્ય નિર્ણય લેવામાં નહીં આવે તો GLS બંધની ચિમકી પણ NSUI દ્વારા આપવામાં આવી છે. યુનિવર્સિટીના રજિસ્ટ્રાર મુજબ વિદ્યાર્થીઓએ રીમીડિયલ પરીક્ષા આપ્યા બાદ જ બીજા સત્રમાં પ્રવેશ મેળવ્યો છે.

જો.કે સમગ્ર ઘટનામાં એક તરફ GLS યુનિવર્સિટીના સંચાલકો ક્યાંક પોતાને બચાવવાનો પ્રયાસ કરી રહ્યા છે. ત્યારે હવે જોવાનું રહ્યું કે નકલી માર્કશીટના આધારે એડમિશન થયું છે કે નહીં? અને થયું છે તો કોની બેદરકારી ગણવામાં આવશે.