આવાસ યોજનામાં મકાન આપવાની લાલચ આપી લાખોની છેતરપિંડી કરનાર ઝડપાયો

અમદાવાદઃ શહેરમાં આવાસ યોજનામાં ઔડાના મકાન આપવાની લાલચ આપી લોકો પાસેથી પૈસા પડાવવાનો કિસ્સો સામે આવ્યો હતો. 10 અલગ અલગ લોકો પાસેથી પૈસા પડાવીને મકાન આપ્યું ન હતુ જેની દરિયાપુર પોલીસ સ્ટેશનમાં ફરિયાદ નોંધાઈ હતી અને પોલીસે આરોપીની ધરપકડ કરી હતી.

શહેરના દરિયાપુર વિસ્તારમાં રહેતા મહેશભાઈએ ફરિયાદ નોંધાવી હતી કે ઝાકીર નામના ઇસમે 2015માં રિવર ફ્રન્ટ બન્યું ,ત્યારે ત્યાંના મકાનોની અવેજીમાં સરકાર દ્વારા ઔડાના મકાનો આપવાના છે, તેવું કહીને લોકો પાસેથી પૈસા લીધા હતા અને રિવર ફ્રન્ટમાં તેમનું મકાન હતું તેવું સાબિત કરીને તેમને ઔડાના મકાન આપશે. ઝાકીરે અલગ અલગ લોકો પાસેથી કુલ 9.43 લાખ રૂપિયા લઈ લીધા હતા.

રુપિયા લીધા બાદ ઝાકીરે કોઈને પણ મકાન આપ્યું ના હતુ.જે અંગે દરિયાપુર પોલીસ સ્ટેશનમાં ફરિયાદ નોંધાઈ હતી.પોલીસે ફરિયાદના આધારે તપાસ શરૂ કરી હતી અને આરોપીને ઝડપી પાડ્યો હતો.પોલીસે આ સિવાય અન્ય કેટલા પાસેથી રુપિયા લીધેલા છે તે દિશામાં તપાસ હાથ ધરી છે.