JEE ગુજરાતી માધ્યમના પ્રશ્નપત્રમાં છબરડા અંગે NTAએ હાઈકોર્ટમાં કહ્યું અંગ્રેજીનો પ્રશ્નપત્ર રિફર કરવું જોઈએ

અમદાવાદઃ દેશમાં આવેલી વિવિધ NIT અને IITમાં બી-ટેક અને બીઈના અલગ અલગ સ્ટ્રીમમાં પ્રવેશ માટે નેશનલ ટેસ્ટીંગ એજન્સી (NTA) દ્વારા લેવાતી જોઈન્ટ એન્ટરર્ન્સ એકઝામના (JEE) ગુજરાતી માધ્યમના ફિઝિક્સ અને મેથેમેટિક્સના પ્રશ્નપત્રમાં છબરડાના મામલે હાઈકોર્ટમાં જાહેરહીતની અરજી દાખલ કરવામાં આવી હતી. આ મુદ્દે નેશનલ ટેસ્ટીંગ એજન્સી દ્વારા જવાબ રજૂ કરતા અરજદારના તમામ આક્ષેપ ખોટા હોવાનો દાવો કર્યો હતો. NTA અંગ્રેજી ભાષાના પ્રશ્નપત્રને ફાઈનલ માનતું હોવાથી વિધાર્થીઓએ તેને રિફર કરવાની જરૂર હોવાનુ જણાવ્યું હતુ.

હાઈકોર્ટમાં જસ્ટીસ બેલા ત્રિવેદીની કોર્ટમાં નેશનલ ટેસ્ટીંગ એજન્સી દ્વારા જવાબ રજુ કરતા દલીલ કરવામાં આવી હતી કે, પ્રશ્નપત્રમાં છબરડા હોવાના અરજદારના આક્ષેપ ખોટા છે અને કોઈને સમજવામાં તકલીફ પડે તો સાથે આપેલા અંગ્રેજી ભાષાના પ્રશ્નપત્રમાંથી સમજીને વિકલ્પ પંસદ કરી શકાય. NTAએ અરજદારના દાવાની તપાસ જે તે વિષયના એક્સપર્ટ પાસેથી કરાવી હોવાની પણ રજૂઆત કરી હતી.અરજદારે ગુજરાતી ભાષાના ફિઝિક્સ પેપરમાં વિવાદાસ્પદ પ્રશ્નમાં જવાબની પંસદગી કરી નથી. જેથી બોનસ ગુણ મેળવવાની માંગ માની શકાય નહિ. આજ રીતે ગણિતના પેપરમાં અરજદારે ખોટો વિકલ્પ પંસદ કર્યો હતો અને જે પ્રશ્નમાં ટાઈપિંગ ભુલ થઈ હતી તેનું અંગ્રેજી પ્રશ્નપત્રથી સમજી શકાય છે.

અગાઉ જસ્ટીસ વી.પી પટેલે કેન્દ્રિય માનવ સંશાધન મંત્રાલય અને નેશનલ ટેંસ્ટીગ એજન્સીને (NTA) નોટીસ પાઠવી ખુલાસો માંગ્યો હતો.અરજદાર અનુરાગ પાઠકનો આક્ષેપ છે કે, ગુજરાતી માધ્યમના બે ફિઝિક્સ અને મેથેમેટિક્સના પેપરમાં છબરડા બદલ તમામ 5 થી 6 હજાર જેટલા ઉમેદાવારોને બોનસ ગુણ આપવામાં આવે અને ફરીથી રિઝલ્ટ જાહેર કરવામાં આવે. જેથી ગુજરાતી માધ્યમના વિધાર્થીઓના કોમન રેન્ક લિસ્ટમાં (CRL) વધારો જોવા મળી શકે. પરીક્ષાના રિઝલ્ટ બાદ કોમન રેન્ક લિસ્ટ (CRL) તૈયાર કરવામાં આવે છે, જેના આધારે વિદ્યાર્થીઓેને બીટેક - બી.ઈની કોપ્યુટર સાઈન્સ , મીકેન્કલ સહિતની સ્ટ્રીમ અને કઈ કોલેજમાં પ્રવેશનું નક્કી થતું હોય છે.

ગુજરાતી માધ્યમના આશરે 5 થી 6 હજાર જેટલા વિદ્યાર્થીઓને જે ફિઝિક્સનો પ્રશ્નપત્ર આપવામાં આવ્યો હતો તેમાં પ્રશ્ન નં 7 ખોટો હતો અને આવી જ રીતે મેથેમેટિક્સમાં પ્રશ્ન નં 13ના તમામ વિકલ્પ ખોટા હોવાનો દાવો અરજદારે કર્યો છે. આ બંને પ્રશ્ન અંગ્રેજી અને હિન્દી મીડિયમના પ્રશ્નપત્રમાં સાચા અને યોગ્ય હોવાથી ગુજરાતી માધ્યમના વિદ્યાર્થીઓને 04 માર્ક બોનસ અને જો એ પ્રશ્નમાં વિકલ્પ પંસદ કર્યું હોય તો એમાં 01 ગુણ આમ કુલ 5 માર્કસ આપવામાં આવે એવી રજૂઆત કરવામાં આવી હતી.

15મી એપ્રિલના રોજ નેશનલ ટેસ્ટીંગ એજન્સી દ્વારા દરેક વિદ્યાર્થીને મોકલવામાં આવતી પ્રોવિઝનલ આન્સર કી માં ગુજરાતી માધ્યમના છબરડાવાળા પ્રશ્નો અંગે કોઈ ખુલાસો આપવામાં આવ્યો ન હતો. જેથી અરજદાર દ્વારા ઈ-મેલ થકી પ્રતિવાદીઓને એટલે કે જવાબદાર સંસ્થાઓને જાણ કર્યા હોવા છતાં પગલા ન લેવાતા હાઈકોર્ટમાં રિટ દાખલ કરી હતી. ગત 9મી એપ્રિલના રોજ સમગ્ર દેશના વિવિધ કેન્દ્રો પર જોઈન્ટ એન્ટરર્ન્સ એકઝામ(JEE) લેવામાં આવી હતી. ત્યારબાદ 29મી એપ્રિલના રોજ પરિણામ જાહેર કરી દેવામાં આવ્યો હતો. JEEની પરીક્ષા ગુજરાતી, અંગ્રેજી અને હિન્દી ભાષામાં લેવામાં આવી હતી.