GTUની પરીક્ષા રદ કરાતા NSUI અને કોંગ્રેસે ફટાકડા ફોડી કરી ઉજવણી

રાજ્ય સરકારે બુધવાર બપોરે શિક્ષણ પ્રધાન ભૂપેન્દ્રસિંહ ચુડાસમાએ GTUની પરીક્ષા રદ કરવાની જાહેરાત કરી હતી. જે બાદ NSUI અને કોંગ્રેસે ફટાકડા ફોડી ઉજવણી કરી હતી. આ ઉજવણીમાં કોંગ્રેસ પ્રમુખ અમિત ચાવડા સહિત તમામ NSUIના કાર્યકર્તાઓ અને કોંગ્રેસના આગેવાનો હાજર રહ્યા હતા. આ ઉજવણીમાં કોંગ્રેસી નેતાઓ કોરોનાને કોરાણે મુકી સોશિયલ ડિસ્ટન્સ અને ફરજીયાત માસ્કના નીયમોના લીરે લીરા ઉડાવ્યા હતા.

અમદાવાદઃ GTUની પરિક્ષા રદ થતા NSUI અને કોંગ્રેસ દ્વારા મોટાપાયે ઉજવણી કરવામાં આવી હતી. કોંગ્રેસ ભવન ખાતે કોંગ્રેસ પ્રમુખ અમિત ચાવડા સહિત કોંગ્રેસના આગેવાનો અને NSUIના આગેવાનોની ઉપસ્થિતિમાં ફટાકડા ફોડી તેમજ એકબીજાને પેંડા ખવડાવી NSUIના કાર્યકરોએ ઉજવણી કરી હતી.

• NSUI અને વિદ્યાર્થી સંગઠન દ્વારા હોબાળો
• NSUI અને કોંગ્રેસ દ્વારા સરકારને વારંવાર પરીક્ષા રદ કરવાની રજૂઆત
• સરકારે NSUI અને કોંગ્રેસની રજૂઆત ધ્યાનમાં ન લીધી
• ગુજરાત સરકારે GTU અને તમામ યુનિવર્સિટીની પરીક્ષા રદ કરવાનો નિર્ણય લીધો
• GTUની પરિક્ષા રદ થતા NSUI અને કોંગ્રેસ દ્વારા મોટાપાયે ઉજવણી કરવામાં આવી

દેશ આખો કોરોના મહામારી સામે ઝઝૂમી રહ્યો છે, તેવામાં GTUની પરીક્ષા લેવામાં આવી રહી છે. તેવા સમાચાર મળતા જ NSUI અને વિદ્યાર્થી સંગઠન દ્વારા હોબાળો કરવામાં આવ્યો હતો. આ સાથે જ કોંગ્રેસ પ્રમુખ અમિત ચાવડા દ્વારા મુખ્ય પ્રધાન વિજય રૂપાણીને પત્ર લખી પરીક્ષા રદ કરવાની માગણી ઊઠી હતી.

સોશિયલ ડિસ્ટન્સ અને ફરજીયાત માસ્કના નીયમોના લીરે લીરા ઉડાવ્યા

જેને ધ્યાનમાં રાખી રાજ્ય સરકારના શિક્ષણ પ્રધાન ભૂપેન્દ્રસિંહ ચુડાસમાએ યુનિવર્સિટી તથા GTUની પરીક્ષા રદ કરવાનો નિર્ણય કર્યો હતો. જેને લઈ NSUI સંગઠન અને કોંગ્રેસ ભવન ખાતે ઉજવણીનો માહોલ છવાઈ ગયો હતો.

રાજ્યમાં કોરોનાની પરિસ્થિતિ વચ્ચે પરીક્ષાને લઈ ભારે અસમંજસની સ્થિતિ સર્જાઈ હતી, ત્યારે NSUI અને કોંગ્રેસ દ્વારા સરકારને વારંવાર પરીક્ષા રદ કરવાની રજૂઆત કરવામાં આવી હતી. જો કે, સરકારે NSUI અને કોંગ્રેસની રજૂઆત ધ્યાનમાં લીધી ન હતી.

ગુરૂવારથી પરીક્ષા લેવાશે તેવી જાહેરાત કરી હતી. જો કે, કેન્દ્ર સરકારના આદેશ બાદ ગુજરાત સરકારે તાત્કાલિક બેઠક બોલાવી હતી. જેમાં ગુજરાત સરકારે GTU અને તમામ યુનિવર્સિટીની પરીક્ષા રદ કરવાનો નિર્ણય લીધો હતો. જેને લઇ NSUI અને કોંગ્રેસ જાણે મોટો વિજય થયો હોય તેમ ઉજવણી કરી હતી.

કોંગ્રેસ ભવનમાં ઉજવણીમાં મસ્ત કોંગ્રેસી નેતાઓએ લોકડાઉનના નિયમોનું ઉલ્લંઘન કર્યું હતું. કોંગ્રેસ પ્રમુખ અમિત ચાવડા સહિત તમામ NSUIના કાર્યકર્તાઓ અને કોંગ્રેસના આગેવાનોમાં કેટલાક લોકો સોશિયલ ડિસ્ટન્સ અને માસ્ક પહેર્યા વગર નજરે પડી રહ્યા હતા.