સોમવારથી AMTS- BRTS બસ 50 ટકા પ્રવાસી સાથે થશે શરૂ

લોકડાઉન 4.0 પૂર્ણ થઈ રહ્યું છે, ત્યારે ગુજરાત રાજ્યમાં સોમવારથી અનલોક-1 લાગુ થશે. ત્યારે અમદાવાદમાં AMTS, BRTS બસ સેવા પણ શરૂ કરવામાં આવશે. સોમવારથી 50 ટકા પ્રવાસી સાથે બસ સેવા શરૂ કરવામાં આવશે. AMTSની સોમવારથી 50 ટકા બસો દોડાવવામાં આવશે. આશરે 350 જેટલી બસ દોડાવશે તેમજ 125 રૂટમાંથી 61 રૂટ પર બસ સેવા શરૂ કરવામાં આવશે. તે માટે બસોમાં ડિઝાઇન્ફેકટની કામગીરી તેમજ સ્ટીકર લગાવાની કામગીરી શરૂ થઈ ગઈ છે.

અમદાવાદ : એક અઠવાડિયા સુધી પૂર્વથી પશ્ચિમમાં બસ સેવા શરૂ કરવામાં નહીં આવે. તેમજ ડ્રાઈવરો અને પ્રવાસી માટે માસ્ક ફરજિયાત રહેશે. એક બસમાં 16 પ્રવાસી બેસી શકશે. નક્કી કરાયેલા રૂટ પર બસ સવારના 6 થી રાત્રિના 8 સુધી દોડશે.

કન્ટેન્મેન્ટ ઝોનમાં લોકડાઉન 30 જૂન સુધી વધારવામાં આવ્યું છે, તો નોન કન્ટેન્મેન્ટ ઝોનની બહારની પ્રતિબંધિત પ્રવૃત્તિઓ તબક્કાવાર ખોલવામાં આવશે. 8 જૂનથી ધાર્મિક સ્થળો, હોટલ, રેસ્ટોરાં વગેરે ખોલવાની પરવાનગી આપવામાં આવી છે. તેમજ આરોગ્ય મંત્રાલય દ્વારા માર્ગદર્શિકા જારી કરવામાં આવશે. આ સિવાય કેન્દ્ર સરકારે કોરોનાને અટકાવવા 10 રીતો આપી છે, જેથી ચેપ ફેલાતો રોકી શકાય.