Ahmedabad Crime: બર્થ ડેના દિવસે ડોનગીરી, તલવારથી કેક કાપતા વીડિયો એ જેલભેગા કર્યા

સમયાંતરે જન્મદિવસનું સેલિબ્રેશન ઘાતક રૂપ લઈને સામે આવી રહ્યું છે. જન્મદિવસના દિવસે બર્થ ડે બોય કે ગર્લને હેરાન પરેશાન કરીને સેલિબ્રેશન કરવામાં આવે છે. જેના કેટલાય વીડિયો સોશિયલ મીડિયા પર વાયરલ થયા છે. આ વાયરલ વીડિયોની યુવાનો ઉપર માઠી અસર થઈ રહી છે. જેનો તાજો કિસ્સો અમદાવાદ શહેરના દરિયાપુર વિસ્તારમાંથી સામે આવ્યો છે. જેમાં એક વ્યક્તિએ પોતાના જન્મદિવસ પર જાહેરમાં તલવારથી કેક કાપીને ઉજવણી કરી હતી.

અમદાવાદ: જન્મદિવસના દિવસે આતશબાજી કરી, ફટાકડા ફોડી તેમજ એકબીજા ઉપર સ્પ્રે છાંટીને સેલિબ્રેશન કરવાના કિસ્સા સમાજમાં યુવાનોને મુશ્કેલીમાં મૂકી રહ્યા છે. અમદાવાદના દરિયાપુર વિસ્તારમાં પણ આ પ્રકારનું સેલિબ્રેશન થયું હતું. જેમાં દરીયાપુર કિંગ નામથી ટેગ કરીને એક વીડિયો તૈયાર કરવામાં આવ્યો હતો. પોલીસે આ વીડિયોના આધારે બે શખ્સોની ધરપકડ કરી છે. બર્થ ડે ના દિવસે ડોનગીરી કરી રહેલા અને તલવારથી કેક કાપનારા યુવાનની પોલીસે ધરપકડ કરીને કાયદાનો પાઠ ભણાવ્યો છે. જ્યારે વીડિયોને લઈને પણ આકરી કામગીરી કરી છે. આ વીડિયો દરિયાપુરના કમ્યુનિટી હોલ પાસેનો હોવાનું જાણવા મળ્યું છે. દરિયાપુરમાં રહેતા તેજસ ઉર્ફે તેજીયો ઠાકોર તેમજ મયુર ઉર્ફે ભિયો રાવત અને પ્રવીણ ઉર્ફે જેણીઓ ઠાકોર નામના ત્રણેય મિત્રો સામે ગુનો નોંધ્યો છે.

તલવારથી કેક કાપી:અમદાવાદના દરિયાપુર વિસ્તારમાં કોમ્યુનિટી હોલ પાસે જાહેર રોડ ઉપર રાત્રે અજાણ્યા યુવકો દ્વારા જાહેરમાં તલવારથી કેક કાપીને જન્મદિવસની ઉજવણી કરવામાં આવતી હોય તે અંગેનો વીડિયો સોશિયલ મીડિયામાં વાયરલ થયો હતો. તે વીડિયોમાં દેખાતા યુવકો અંગે પોલીસે તપાસ કરતા સામે આવ્યું હતું કે, દરિયાપુરમાં રહેતા તેજસ ઉર્ફે તેજીયો ઠાકોર તેમજ મયુર ઉર્ફે ભિયો રાવત અને પ્રવીણ ઉર્ફે જેણીઓ ઠાકોર નામના ત્રણેય મિત્રો દ્વારા બે એકટીવા ઉપર કેક મૂકીને જન્મ દિવસની ઉજવણી કરવામાં આવી હતી. જે કેક ઉપર તેજસ લખેલું હોય અને તેજસ દ્વારા હાથમાં અલગ અલગ તલવાર રાખી જાહેર જનતામાં ભયનો માહોલ ઊભો કરી તલવાર તેમજ મોટા છરા સાથે કેક કાપી રહ્યો હતો. આ બાબતે દરિયાપુર પોલીસે જાહેરનામા ભંગની કલમ હેઠળ ગુનો દાખલ કર્યો હતો.

ઉજવણીનું આયોજન: આ મામલે પોલીસે તરત જ વાયરલ વીડિયોના આધારે કાર્યવાહી હાથ ધરી અને વીડિયોમાં દેખાનારા ત્રણ યુવકોને ઝડપી પાડ્યા છે. આરોપીઓની તપાસમાં સામે આવ્યું હતું કે તેજસ ઠાકોર નામના યુવકનો જન્મદિવસ હોય તેના મિત્રો દ્વારા આ સમગ્ર પ્રકારે જન્મદિવસની ઉજવણીનું આયોજન કરવામાં આવ્યું હતું. તે ઉજવણી કરતા સમયનો વિડીયો બનાવીને પોતાના સોશિયલ મીડિયા પર પણ મૂકવામાં આવ્યો હતો. જેમાં દરીયાપુર કિંગ લખાણ લખવામાં આવ્યું હતું. ત્યારે દરીયાપુર પોલીસે કહેવાતા દરિયાપુર કિંગ અને તેના મિત્રોને ઝડપીને ગુનામાં વપરાયેલી તલવાર અને છરો કબજે કરી કાયદાનો પાઠ ભણાવ્યો છે.

જન્મદિવસની ઉજવણી:આ અંગે દરિયાપુર પોલીસ સ્ટેશનના PI વનરાજસિંહ વાઘેલાએ etv ભારત સાથે ટેલિફોનિક વાતચીત કરતા જણાવ્યું હતું કે' વાયરલ વિડીયો અમારા ધ્યાને આવતા તેના આધારે ગુનામાં સામેલ ત્રણેય યુવકોની ધરપકડ કરી હથિયાર કબજે કરવામાં આવ્યા છે. પોલીસની યુવાનોને નમ્ર અપીલ છે કે અન્ય લોકોને ભયમાં મૂકીને આ પ્રકારે જાહેર રોડ ઉપર હથિયારો સાથે જન્મદિવસની ઉજવણી કરવામાં ન આવે.