અમદાવાદ: ડાબા હાથના બેટ્સમેન ડેવોન કોનવે અને રચિન રવિન્દ્રની શાનદાર સદી અને તેમની વચ્ચેની રેકોર્ડ ભાગીદારીની મદદથી ન્યૂઝીલેન્ડે ગુરુવારે અહીં ODI વર્લ્ડ કપની શરૂઆતની મેચમાં ઈંગ્લેન્ડને 82 બોલ બાકી રહેતા 9 વિકેટે હરાવીને તે 2019ની ફાઇનલમાં મળેલી હારનો બદલો પણ લીધો હતો.
ન્યુઝીલેન્ડને 283 રનનો ટાર્ગેટ મળ્યો હતો:સુકાની કેન વિલિયમસન વિના રમતી ન્યુઝીલેન્ડને 283 રનનો ટાર્ગેટ મળ્યો હતો જે તેણે 36.2 ઓવરમાં 1 વિકેટ ગુમાવીને હાંસલ કરી લીધો હતો. કોનવેએ 121 બોલમાં 19 ચોગ્ગા અને 3 છગ્ગાની મદદથી અણનમ 152 રન બનાવ્યા હતા, જ્યારે રવિન્દ્રએ 96 બોલમાં 123 રનની અણનમ ઇનિંગ રમી હતી જેમાં 11 ચોગ્ગા અને પાંચ છગ્ગાનો સમાવેશ થતો હતો. બંનેએ પોતાની કારકિર્દીનો સર્વોચ્ચ સ્કોર બનાવ્યો.
273 રનની અતૂટ ભાગીદારી: કોનવે અને રવિન્દ્રએ બીજી વિકેટ માટે 273 રનની અતૂટ ભાગીદારી કરી હતી. ન્યૂઝીલેન્ડ દ્વારા વર્લ્ડ કપમાં કોઈપણ વિકેટ માટે આ સૌથી મોટી ભાગીદારી છે. આ બહાદુર પ્રયાસોથી, ન્યુઝીલેન્ડ 2019ની ફાઈનલની કડવી યાદોને પાછળ છોડવામાં સક્ષમ હતું જ્યારે તે બાઉન્ડ્રી ગણતરી પર ઈંગ્લેન્ડ સામે ટાઇટલ હારી ગયું હતું.
ઇંગ્લેન્ડ પ્રથમ દાવ: પ્રથમ બેટિંગ માટે આમંત્રિત કર્યા પછી, ઇંગ્લેન્ડ નિયમિત અંતરે વિકેટ ગુમાવવાને કારણે 9 વિકેટે 282 રન જ બનાવી શક્યું હતું. અનુભવી બેટ્સમેન જો રૂટે સૌથી વધુ 77 રનનું યોગદાન આપ્યું હતું. ન્યૂઝીલેન્ડના સ્પિનર ગ્લેન ફિલિપ્સે 3 ઓવરમાં 17 રન આપીને 2 વિકેટ લીધી હતી, જેમાં રૂટ અને ઓલરાઉન્ડર મોઈન અલી (11) જેવા ખેલાડીઓ સામેલ હતા. મિશેલ સેન્ટનરે 37 રનમાં 2 અને મેટ હેનરીએ 10 ઓવરમાં 48 રન આપીને 3 વિકેટ ઝડપી હતી.
આ પણ વાંચો:
- World Cup 2023: ઓસ્ટ્રેલિયા સામેની પ્રથમ મેચ પહેલા ભારતીય ટીમને ઝટકો, શુભમન ગિલને થયો ડેન્ગ્યુ
- World Cup 2023: જાણો 'પ્લેયર ઓફ ધ ટુર્નામેન્ટ' પસંદગીની શરુઆત ક્યારે થઈ, કોણ બનશે વર્લ્ડ કપ 2023નો સર્વશ્રેષ્ઠ ખેલાડી?
