સુરત સિવિલના કોરોના વોર્ડમાં 2 આરોપી સિગારેટ પીતા જોવા મળ્યા

પોલીસે ઘરપકડ કરેલા આરોપીના કોરોના ટેસ્ટ કરવામાં આવે છે. જેથી જે આરોપીમાં કોરોનાના લક્ષણ દેખાય છે, તે આરોપીઓને સિવિલના કોરોના વોર્ડમાં દાખલ કરવામાં આવે છે. આવા જ દાખલ કરાયેલા 2 આરોપી કોરોના વોર્ડમાં સિગારેટ પીતા અને ગેમ રમતા જોવા મળ્યા છે. આ વીડિયો સોશિયલ મીડિયામાં ખૂબ વાયરલ થઈ રહ્યો છે. જેથી ફરી એક વખત નવી સિવિલ હોસ્પિટલ વિવાદમાં આવી છે. આ સમગ્ર મામલા અંગે તપાસના આદેશ આપવામાં આવ્યા છે.

સુરત: નવી સિવિલ હોસ્પિટલના કોરોના વોર્ડનો એક વીડિયો સોશિયલ મીડિયામાં વાયરલ થઇ રહ્યો છે. આ વીડિયોમાં 2 આરોપીઓ સિગારેટના કસ મારતા અને મોબાઈલ ફોનમાં ગેમ રમતા જોવા મળી રહ્યા છે.

ઉલ્લેખનીય છે કે, ઝડપાયેલા આરોપીને કોર્ટમાં રજૂ કરવા અગાઉ તેમનો કોરોના ટેસ્ટ કરવામાં આવે છે. જેથી આ બન્ને આરોપીનો કોરોના ટેસ્ટ કરવા માટે તેમને નવી સિવિલ હોસ્પિટલના કોરોના વોર્ડમાં દાખલ કરવામાં આવ્યા હતા. જ્યાં આ બન્ને આરોપી સિગારેટ પીતા અને મોબાઈલમાં ગેમ રમતા જોવા મળ્યા છે. આરોપી પાસે સિગારેટ અને મોબાઈલ આવવાથી સિવિલ સ્ટાફ અને પોલીસની ભૂમિકા પર પણ સવાલો ઉભા થયા છે.

આ વીડિયો વાયરલ થતાં ઇન્ચાર્જ સુપ્રિટેન્ડેન્ટ રાગીનીએ જણાવ્યું હતું કે, સમગ્ર ઘટના અંગે તપાસના આદેશ આપવામાં આવ્યા છે અને પોલીસને પણ આ અંગેની જાણકારી આપી દેવામાં આવી છે. આ સાથે જ બોર્ડમાં હાજર સ્ટાફની પણ પૂછપરછ કરવામાં આવશે.