જરીનો ધંધો કરનાર શખ્સની ચપ્પુના ઘા ઝીંકી હત્યા

સુરત:લિંબાયત વિસ્તારમાં એક જરીનો ધંધો કરનાર શખ્સની ચપ્પુના ઘા ઝીંકી હત્યા કરવામાં આવી હતી. હત્યાની આ ઘટનાને લઈને આસપાસના વિસ્તારમાં ચકચાર મચી જવા પામી હતી. આ બનાવની જાણ થતા પોલીસ કાફલો ઘટના સ્થળે દોડી આવ્યો હતો. પોલીસે આરોપીની ધરપકડ કરી લીધી હોવાનું જાણવા મળ્યું છે.

• સુરતમાં વધુ એક હત્યાનો બનાવ સામે આવ્યો
• બાલાજી નગર પાસે ચપ્પુના ઘા ઝીંકી હત્યા
• યુવકની હત્યાને કારણે આસપાસના વિસ્તારમાં ચકચાર

સુરત: શહેરમાં વધુ એક હત્યાનો બનાવ સામે આવ્યો છે. સુરતના લિંબાયત વિસ્તારમાં આવેલી રત્નપ્રભા સોસાયટીમાં રહેતા 32 વર્ષીય લાલચંદ દશરથ ઉર્ફે લાલો નામના શખ્સની બાલાજી નગર પાસે ચપ્પુના ઘા ઝીંકી હત્યા કરવામાં આવી છે. લાલચંદની વહેલી સવારે 6:30થી 7:00 વાગ્યા વચ્ચે હત્યા થઈ હતી. પેટ, છાતી અને ગળાના ભાગે ચપ્પુના ઘા માર્યા હતા. હત્યા સંતોષ નામના શખ્સે કરી હોવાનું જાણવા મળ્યું છે. બીજી તરફ આ મામલે પોલીસ કાફલો ઘટના સ્થળે દોડી આવ્યો હતો અને સમગ્ર મામલે તપાસ હાથ ધરી છે. યુવકની હત્યાને કારણે આસપાસના વિસ્તારમાં ચકચાર મચી જવા પામી હતી. પોલીસે હત્યારા સંતોષની ધરપકડ કરી લીધી છે અને આ મામલે વધુ તપાસ હાથ ધરી છે.

બાલાજી નગરમાં તેની પ્રેમિકા રહેતી હતી

સુત્રો પાસેથી જાણવા મળ્યું હતું કે બાલાજી નગરમાં તેની પ્રેમિકા રહેતી હતી અને બંને લીવ ઇન રિલેશનશિપમાં રહેતા હતા. સંતોષ નામના શખ્સે તેની પ્રેમિકા સામે જ ચપ્પુના ઘા ઝીંકી હત્યા કરી છે. વધુમાં લાલચંદ બુટલેગર હોવાની અને તે દારૂના નશામાં હોવાની ચર્ચા છે.

પોલીસે કહ્યું કે જરીના ધંધાને લઈને હત્યા કરાઈ છે

DCP, ઝોન-1 સજ્જનસિંહ પરમાર જણાવ્યું હતું કે, લિંબાયતમાં હત્યાનો ગુનો બન્યો છે. મરનાર લાલચંદ અને મારનાર સંતોષ નિકમ છે. બંને મહારાષ્ટ્રીયન છે. બંને જરીના ધંધા સાથે સંકળાયેલા છે. જરીના ધંધાને લઈને બંને વચ્ચે ઝઘડો ચાલતો હતો. ગઈકાલે પણ સામાન્ય ઝઘડો થયો હતો. આજે લાલચંદે સંતોષને માથામાં લાકડાનો ફટકો માર્યો હતો, ત્યારબાદ સંતોષે લાલચંદની ચપ્પુના ઘા મારી હત્યા કરી નાખી હતી.