કોરોના કાળમાં મુંબઇના હીરા ઉદ્યોગની પાયમાલી, વેપારીઓએ લીધું સુરતમાં શરણું

કોરોના કાળમાં મુંબઇના હીરા ઉદ્યોગના નાના વેપારીઓ કે જેઓ મુખ્યત્વે MSME સેક્ટરમાં વેપાર કરતા હોય તેમને ધંધા-રોજગાર પડી ભાંગતા ભારે આર્થિક સંકડામણનો સામનો કરવો પડી રહ્યો છે. તેવામાં સુરતમાં નિર્માણાધીન ડાયમંડ બુર્સને લીધે પરિસ્થિતીમાં ફેરફારની આશાએ મુંબઇ છોડી અનેક વેપારીઓ સુરતમાં સ્થાયી થઇ રહ્યા છે.

સુરત : મુંબઇમાં કોરોના મહામારીને પગલે હીરા ઉદ્યોગમાં મંદીનો માહોલ છવાયો છે. રોજગારના અભાવે ધીરે ધીરે મુંબઇમાં MSME સેક્ટરમાં વેપાર કરતા અનેક ધંધાર્થીઓ ડાયમંડ સિટી સુરતમાં સ્થાયી થઇ રહ્યા છે. સુરતમાં નિર્માણાધીન વડાપ્રધાન નરેન્દ્ર મોદીનો મહત્વાકાંક્ષી પ્રોજેક્ટ ડાયમંડ બુર્સ મુંબઇના હીરા ઉદ્યોગના અનેક વેપારીઓને આકર્ષી રહ્યો છે. હાલ જ મુંબઇના અનેક વેપારીઓ 150 થી વધુ દુકાનો ડાયમંડ બુર્સમાં બુક કરાવી ચૂક્યા છે.

મુંબઈથી સુરત તરફ વળી રહેલા હીરા ઉદ્યોગના વેપારીઓ વરાછા જેવા વિસ્તારો વધુ પસંદ કરી રહ્યા છે. 10 પૈકી 9 અલગ-અલગ પ્રકારના હીરા સુરતમાં તૈયાર થાય છે. પરંતુ મુંબઇમાં હીરાના એક્સપોર્ટથી માંડી તમામ વ્યવહારો થાય છે. સુરતમાં આવેલી ડાયમંડ કંપનીઓની કેટલીક કોર્પોરેટ ઓફિસો મુંબઈ ખાતેના ડાયમંડ બુર્સમાં પણ આવેલી છે, પરંતુ કોરોનાના કારણે મુંબઇમાં ધંધો ઠપ્પ થતા મોટા પ્રમાણમાં કોર્પોરેટ ઑફિસો બંધ થઇ રહી છે.

જો કે સુરતના ડાયમંડ બુર્સના પૂર્ણ નિર્માણને હજી એક વર્ષથી પણ વધુ સમય લાગી શકે છે. પરંતુ તે પહેલા જ મંદીથી અસરગ્રસ્ત હીરા વેપારીઓ મુંબઈથી સુરત તરફ વળી રહ્યા છે. સુરતમાં આશરે 250 થી વધુ કંપનીઓ પોતાના પરિવાર જોડે સુરત સ્થાયી થઈ હોવાનો અંદાજ GJEPCના સુરત ચેરમેન દિનેશ નાવડિયાએ લગાવ્યો છે.

સુરત ખાતે બની રહેલા ડાયમંડ બુર્સને લઈને વર્ષ 2022 સુધીમાં મુંબઈ થી 60 ટકા જેટલો હીરા ઉદ્યોગ સુરત આવે તેવી સંભાવના છે. જેનો સીધો ફાયદો સુરતના હીરા ઉદ્યોગને મળવાનો છે. જેના કારણે અલગ-અલગ ક્ષેત્ર સાથે સંકળાયેલા લોકોને પણ પૂરેપૂરી રીતે રોજગારી મળી રહેશે. આ સાથે જ મુંબઇથી સુરતમાં આવનાર હીરા વેપારીઓને લઇ મકાનોની ડિમાન્ડ પણ વધવાની છે અને જેના કારણે રિયલ એસ્ટેટને પણ મોટો બિઝનેસ મળવાની આશા છે.

- સુરતથી શ્વેતા સિંહનો વિશેષ અહેવાલ