સુરતના અડાજણ હેલ્થ સેન્ટરમાં 14 લાખ ડોઝ સ્ટોર થઈ શકે તેટલી કેપિસિટી

સુરત મહાનગરપાલિકા દ્વારા કોવિડ-19 વેક્સીનેશન માટેની તૈયારીઓ કરવામાં આવી રહી છે. અડાજણ હેલ્થ સેન્ટરમાં કોરોના વેકસીન રખાશે. કોવિડ 19ને માત આપી સાજા થયેલા મેયર ડૉ. જગદીશ પટેલ બીજા દિવસે જ આ વેક્સીનેશન સેન્ટર જોવા માટે પહોંચ્યાં હતાં.

• સુરત મેયરે વેક્સીનેશન સેન્ટરની મુલાકાત લીધી
• અડાજણ હેલ્થ સેન્ટરમાં રખાશે કોરોના રસી
• 14 લાખ ડોઝ સ્ટોર થઈ શકે તેટલી કેપિસિટી
  
  સુરતઃ સુરતના અડાજણ હેલ્થ સેન્ટર ખાતે વેક્સિનેશન સ્ટોર છે. સુરતમાં વેક્સિન ક્યારે આવશે તે હાલ નક્કી નથી, પરંતુ વેક્સિન આવ્યા બાદ તેનું આયોજન કેવી રીતે કરવું તે માટેની કવાયત શરૂ થઇ ગઇ છે. સુરત મહાનગરપાલિકાના શાસકોની ટીમ અડાજણના હેલ્થ સેન્ટરની મુલાકાતે આ સંદર્ભે આવી પહોંચી હતી.

• કુલ 7000 લીટર રસીના સ્ટોરેજની ક્ષમતા

સુરતના મેયર જગદીશ પટેલ પોતે કોરોનાનું સંક્રમણ ભોગવી ચૂક્યાં છે. ત્યારે આ રોગની ભયાનકતાથી વાકેફ છે. જેથી કોરોનાની સારવારમાં શક્ય એટલી ઝડપથી સારવાર માટે રસી મહત્ત્વની બની રહેનાર છે. ત્યારે મેયર ડૉ. જગદીશ પટેલે હેલ્થ સેન્ટરની મુલાકાત બાદ જણાવ્યું હતું કે, 14 લાખ ડોઝ સ્ટોર થઈ શકે તેટલી આ સેન્ટરની કેપિસિટી છે. આ હેલ્થ સેન્ટર ખાતે 1235 લીટર સ્ટોરેજ ક્ષમતા છે. અન્ય હેલ્થ સેન્ટર ખાતે પણ 5760 લીટર મળી કુલ 7 હજાર લીટર રસીના સ્ટોરેજની ક્ષમતા છે. રસીકરણ માટે સરકારની સૂચનાઓ મુજબ હેલ્થ વર્કરની યાદી બાદ હવે ફ્રન્ટ વર્કરની યાદી તૈયાર કરાશે.