કર્ણાટકના રાજ્યપાલનો કાર્યકાળ પૂરો કરી વજુબાપા પહોંચ્યા રાજકોટ

સંઘના પાયાના કાર્યકર્તા અને ભાજપના દિગ્ગજ નેતા તેમજ કર્ણાટકના ભૂતપૂર્વ ગવર્નર વજુભાઈ વાળા પોતાનો રાજ્યપાલ તરીકેનો કાર્યભાર પૂર્ણ કરીને પોતાના હોમટાઉન રાજકોટ ખાતે આવી પહોંચ્યા છે. આ તકે, વજુબાપાના સમર્થકો મોટી સંખ્યામાં એરપોર્ટ ખાતે પહોંચ્યા હતા. આ ઉપરાંત, ત્યાં વજુબાપાનું પોલીસ બેન્ડ સાથે તેમનું સ્વાગત કરવામાં આવ્યું હતું.

• ભૂતપૂર્વ ગવર્નર વજુભાઈ વાળાનું રાજકોટ એરપોર્ટ પર કરાયું સ્વાગત
• ભાજપના કાર્યકર્તાઓ અને મોટી સંખ્યામાં સમર્થકો એરપોર્ટ પહોંચ્યા હતા
• કર્ણાટકના રાજ્યપાલ તરીકેનો કાર્યભાર પુરો કરી વજૂબાપા પહોંચ્યા હોમટાઉન

રાજકોટ : તાજેતરમાં જ દેશનાં વિવિધ રાજ્યોના રાજ્યપાલની નિમણુંક થઈ છે. રાજકોટના વજુભાઈ વાળા પણ કર્ણાટકના રાજ્યપાલ હતા, ત્યારે તેમનો રાજ્યપાલ તરીકેનો કાર્યકાળ હવે પૂરો થતાં તેઓ પોતાના હોમટાઉન રાજકોટ ખાતે આજે રવિવારે આવી પહોંચ્યા હતા. રાજકોટમાં સાંજના સમયે વજુભાઈ એરપોર્ટ આવતાની સાથે જ ભાજપના કાર્યકર્તાઓએ તેમનું સ્વાગત કર્યું હતું. આ ઉપરાંત, પોલીસ બેન્ડ પણ તેમના સ્વાગત માટે રાખવામાં આવ્યું હતું. રાજકોટમાં સાંજના સમયે ભારે વરસાદ હોવા છતાં વજુભાઈ વાળાનું ભવ્ય સ્વાગત કરવામાં આવ્યું હતું. પોતાની આગવી શૈલી માટે જાણીતા વજુબાપા હોમ ટાઉન રાજકોટ ખાતે આવતા જ ભાજપના કાર્યકર્તાઓમાં પણ ખુશીનો માહોલ જોવા મળી રહ્યો છે.

આ પણ વાંચો:રાજ્યપાલ તરીકેનો કાર્યકાળ પૂર્ણ થતાં વજુભાઈ વાળા વતન પરત ફરશે, મિત્ર સાથે કરી વાત

વજુભાઈ વાળા પહોંચ્યા રાજકોટ એરપોર્ટ

રાજકોટમાં આજે રવિવારે બપોર બાદ અનેક વિસ્તારોમાં ભારે વરસાદ જોવા મળ્યો હતો. આ દરમિયાન, કર્ણાટકના ભૂતપૂર્વ ગવર્નર વજુભાઈ વાળા રાજકોટ એરપોર્ટ ઉપર આવ્યા હતા. જેને લઇને ભાજપના કાર્યકર્તાઓ તેમજ વજુબાપાના સમર્થકો મોટી સંખ્યામાં એરપોર્ટ ખાતે પહોંચ્યા હતા. જ્યાં વજુભાઈની કાર એરપોર્ટની બહાર આવતા જ પોલીસ બેન્ડ સાથે તેમનું સ્વાગત કરવામાં આવ્યું હતું. આ સાથે તેમને સલામી આપવામાં આવી હતી. ત્યારબાદ, ભાજપના કાર્યકર્તાઓ અને વજુબાપાના મિત્રોએ તેમને શુભેચ્છાઓ પાઠવી હતી.

વજુભાઈ મિત્રો સાથે હવે રાજકોટમાં માણસે ડાયરાની મોજ

વજુભાઈ વાળાનો કર્ણાટકના રાજ્યપાલ તરીકેનો કાર્યકાળ હવે પૂરો થતા તેઓએ રાજકોટના તેમના જુના મિત્ર એવા સરગમ કલબના પ્રમુખ ગુણુભાઈ ડેલાવાળા સાથે ફોનમાં વાતચીત કરી હતી. જેમાં વજુબાપાએ જણાવ્યું હતું કે, હવે રાજકોટના હેમુ ગઢવી હોલમાં ડાયરો અને નાટકની મજા માણવાની ઇચ્છા છે. વજુબાપાને ડાયરો અને નાટક જોવું ખૂબ જ ગમે છે, ત્યારે પોતાનો રાજ્યપાલ તરીકેનો કાર્યકાળ પૂર્ણ થયા બાદ રાજકોટમાં તેઓ ડાયરા અને નાટકની મજા માણશે તેવું તેમના મિત્રને જણાવ્યું હતું.

આ પણ વાંચો:ETV Bharatના પ્રશ્નો પર મુંઝાયા ઈસુદાન ગઢવી

વર્ષ 2001માં નરેન્દ્ર મોદી માટે બેઠક કરી હતી ખાલી

વડાપ્રધાન અને ગુજરાત રાજ્યના પૂર્વ મુખ્યપ્રધાન નરેન્દ્ર મોદીને પણ ધારાસભ્યની ચૂંટણી લડવા માટે વર્ષ 2001માં વજુભાઈ વાળાએ પોતાની બેઠક ખાલી કરીને વડાપ્રધાનને રાજકોટમાંથી ચૂંટણી જીતાવી હતી. જે વાતને હજુ પણ ભાજપના દિગ્ગજ નેતાઓ હજુ ભૂલ્યા નથી. વજુભાઈ વાળાને સંઘના પાયાના કાર્યકર્તા અને ભાજપના દિગ્ગજ નેતા માનવામાં આવે છે. તેઓ ગુજરાતના નાણાપ્રધાન તેમજ ગુજરાત વિધાનસભાના સ્પીકર પણ રહી ચૂક્યા છે. આ બાદ, તેઓ કર્ણાટકના રાજ્યપાલ તરીકેનો કાર્યકાળ તાજેતરમાં પૂર્ણ કરીને ફરી રાજકોટ ખાતે આવ્યા છે. ત્યારે, વજુબાપાએ મીડિયા સમક્ષ બોલવાનું ટાળ્યું હતું.