રાજકોટમાં ગાંધીજી જ્યાં ભણ્યા તે શાળામાં બન્યું વિશ્વકક્ષાનું મ્યુઝિયમ

રાજકોટ મહાનગરપાલિકા દ્વારા જે સ્થળે ગાંધીજીએ અભ્યાસ કર્યો હતો ત્યાં મ્યુઝિયમ બનાવ્યું છે જે મ્યુઝિયમમાં ગાંધીજીના જન્મથી લઈને તેમના વિવિધ આંદોલનો તેમનું જીવન અને વિચારો સહિતના પ્રસંગોની ઝાંખી જોવા મળે છે. અત્યારની પેઢી ગાંધીજીના જીવન અંગે જાણે તેમજ તેમના વિચારોને અનુસરે તે માટે આલ્ફ્રેડ હાઈસ્કૂલને મ્યુઝિયમ તરીકે વિકસાવ્યું છે. આ મ્યુઝિયમનું લોકાર્પણ દેશના વડાપ્રધાન નરેન્દ્ર મોદી કર્યું હતું. ગાંધી મ્યુઝિયમના લોકાર્પણ બાદથી લઈને અત્યાર સુધી એટલે કે વર્ષ 2021 સુધીમાં દેશ-વિદેશના એક લાખ 75 હજાર જેટલા લોકોએ મુલાકાત કરી છે.

• ગાંધીજીના જન્મથી લઈને તેમના વિવિધ આંદોલનો તેમનું જીવન અને વિચારો સહિતના પ્રસંગોની ઝાંખી જોવા મળે છે
• મ્યુઝિયમનું લોકાર્પણ દેશના વડાપ્રધાન નરેન્દ્ર મોદી કર્યું હતું
• ગાંધી મ્યુઝિયમના નિર્માણ અગાઉ આ શાળા આલ્ફ્રેડ હાઈસ્કૂલના નામે ચાલતી હતી
• મહાત્મા ગાંધીજીએ આ હાઇસ્કૂલમાં 1880ની સાલમાં પ્રવેશ મેળવ્યો હતો.

રાજકોટઃ રાષ્ટ્રપિતા મહાત્મા ગાંધીએ રાજકોટમાં પણ અભ્યાસ કર્યો હતો. ગાંધીજીએ રાજકોટની જુબેલીબાગ ખાતે આવેલી આલ્ફ્રેડ હાઈસ્કૂલમાં થોડો સમય અભ્યાસ કર્યો હતો એટલે ગાંધીજીની યાદો રાજકોટ સાથે પણ જોડાયેલી છે. રાજકોટ મહાનગરપાલિકા દ્વારા જે સ્થળે ગાંધીજીએ અભ્યાસ કર્યો હતો ત્યાં મ્યુઝિયમ બનાવ્યું છે જે મ્યુઝિયમમાં ગાંધીજીના જન્મથી લઈને તેમના વિવિધ આંદોલનો તેમનું જીવન અને વિચારો સહિતના પ્રસંગોની ઝાંખી જોવા મળે છે. અત્યારની પેઢી ગાંધીજીના જીવન અંગે જાણે તેમજ તેમના વિચારોને અનુસરે તે માટે આલ્ફ્રેડ હાઈસ્કૂલને મ્યુઝિયમ તરીકે વિકસાવ્યું છે. આ મ્યુઝિયમનું લોકાર્પણ દેશના વડાપ્રધાન નરેન્દ્ર મોદી કર્યું હતું.

મ્યુઝિયમનું વડાપ્રધાન મોદીએ કર્યું હતું લોકાર્પણ

વડાપ્રધાન નરેન્દ્ર મોદીએ 30 સપ્ટેમ્બર 2018ના રોજ ગાંધી મ્યુઝિયમ લોકાર્પણ કર્યું હતું. હાલ ગાંધી મ્યુઝિયમના લોકાર્પણ થયાને ચાર વર્ષ જેટલો સમય વીત્યો છે. રાજકોટ મહાનગરપાલિકા દ્વારા ગાંધી મ્યુઝિયમને અંદાજીત રૂ.26 કરોડના ખર્ચે તૈયાર કરી આંતરરાષ્ટ્રીય કક્ષાનું મ્યુઝિયમ બનાવ્યું છે. રાજકોટ સહિત સૌરાષ્ટ્રની મુલાકાતે આવતાં દેશ-વિદેશના લોકો અચુક ગાંધી મ્યુઝિયમની પણ મુલાકાત લે છે. આ મ્યુઝિયમની ખાસ વિશેષતા એ છે કે તેમાં ગાંધીજીના જીવન ચરિત્રથી લઈને તેમના આંદોલનનો સહિતની બાબતોની 3D મુવી પણ દર્શાવવામાં આવી છે. અહીં આવતા દેશ-વિદેશના લોકોને પણ ગાંધીજીના જીવન અંગેની બાબતો સહેલાઇથી સમજાય તે પ્રકારે તેને સંપૂર્ણ રીતે તૈયાર કરવામાં આવ્યું છે. આ મ્યુઝિયમની મુલાકત નાના બાળકોથી માંડીને વડિલો પણ લે છે.

આ પણ વાંચો : Gandhinagar Corporation Election 2021: પ્રચાર પડઘમ શાંત, રવિવારે યોજાશે મતદાન

1,75,000 જેટલા લોકોએ લીધી મુલાકાત

વર્ષ 2018માં ગાંધી મ્યુઝિયમના લોકાર્પણ બાદથી લઈને અત્યાર સુધી એટલે કે વર્ષ 2021 સુધીમાં દેશ-વિદેશના એક લાખ 75 હજાર જેટલા લોકોએ મુલાકાત કરી છે. વૈશ્વિક કોરોનાની મહામારીના કારણે થોડો સમય માટે આ ગાંધી મ્યુઝિયમ બંધ રાખવામાં આવ્યું હતું. પરંતુ હાલ કોરોનાની ગાઇડલાઇન પ્રમાણે ગાંધી મ્યુઝિયમને ફરી શરૂ કરવામાં આવ્યું છે. દેશ-વિદેશના લોકો અહીં ગાંધીજીના જીવન અંગેના મૂલ્યો તેમજ ગાંધીજીના વિચારો અને તેમને અપનાવેલા અહિંસાનો માર્ગ સહિતની બાબતો અંગે જાણવા માટે ફરી આવતા થયા છે. આંતરરાષ્ટ્રીય કક્ષાના આ ગાંધી મ્યુઝિયમનું હાલ રાજકોટ મહાનગરપાલિકા દ્વારા સંચાલન કરવામાં આવી રહ્યું છે.

સંપૂર્ણ આધુનિકતા સાથે તૈયાર કરાયું મ્યુઝિયમ

મ્યુઝિયમમાં મહાત્મા ગાંધીજીના વિદ્યાર્થીકાળનાં સંસ્મરણો તથા જીવનચરિત્ર બાબતે લોકોને માહિતી મળી રહે એ માટે ટેક્નોલોજીનો ઉપયોગ કરાયો છે, જેમાં મલ્ટીમીડિયા મિની થિયેટર, મોશન ગ્રાફિક્સ એનિમેશન, થ્રીડી પ્રોજેક્શન, મલ્ટીપલ સ્ક્રીન્સ, ઓગમેન્ટેડ રિયાલિટી, સર્ક્યુલર વીડિયો પ્રોજેક્શ, થ્રીડી પ્રોજેક્શન મેપિંગ ફિલ્મ, વિશાળ વીડિયો આર્ક વોલ, મોન્યુમેન્ટલ લાઇટિંગ સહિતની ટેક્નોલોજીનો ઉપયોગ કરાયો છે. આ ઉપરાંત મ્યુઝિયમમાં મહાત્મા ગાંધીજીના જીવનચરિત્ર સાથે સંકળાયેલી લાઇબ્રેરી, મ્યુરલ, પ્રાર્થના હોલ અને ઇન્ટરએક્ટિવ મોડ ઓફ લર્નિંગની સુવિધા પણ ઉપલબ્ધ કરાઇ છે. આ ઉપરાંત સોવિનિયર શોપ, વર્કશોપ, લાઇબ્રેરી તેમજ સાત્ત્વિક ભોજન મળી રહે એ માટે ફૂડ કોટ, વી.વી.આઈ.પી. ઓફિસ, અદ્યતન પાર્કિંગ, ટિકિટ બારી, સ્ટોરરૂમ વગેરે સુવિધા પણ ઉપલબ્ધ છે.

આ પણ વાંચો :CM નો નિર્ણય: ઇ-ગ્રામ વિશ્વગ્રામ કેન્દ્રો તરફથી આપવામાં આવતા આવક પ્રમાણપત્ર 3 વર્ષ સુધી માન્ય

ગાંધીજીએ વર્ષ 1880માં શાળામાં મેળવ્યો હતો પ્રવેશ

રાજકોટમાં ગાંધી મ્યુઝિયમના નિર્માણ અગાઉ આ શાળા આલ્ફ્રેડ હાઈસ્કૂલના નામે ચાલતી હતી. જ્યારે વર્ષ1853ની સાલમાં સૌરાષ્ટ્રમાં આ પ્રથમ હાઇસ્કૂલ બની, જેનું નામ રાજકોટ ઇંગ્લિશ સ્કૂલ રાખવામાં આવ્યું હતું. આ સમયે હાઇસ્કૂલ બ્રિટિશ એજન્સી ચલાવતી હતી, જેમાં પ્રારંભમાં 40 જેટલા વિદ્યાર્થીઓ અભ્યાસ કરતા હતા. ત્યારબાદ 1866માં આ શાળાનું મુંબઇ યુનિવર્સિટી સાથે જોડાણ થયું અને ત્યાર પછી સ્કૂલનું નામ બદલીને કાઠિયાવાડ હાઇસ્કૂલ રાખવામાં આવ્યું હતું. મહાત્મા ગાંધીજીએ આ હાઇસ્કૂલમાં 1880ની સાલમાં પ્રવેશ મેળવ્યો હતો.

દેશ વિદેશના લોકો લે છે મુલાકાત: મેયર

રાજકોટના મેયર ડો. પ્રદીપ ડવે ઇટીવી ભારત સાથેની વાતચીતમાં જણાવ્યું હતું કે "ગાંધીજીની કેટલીક યાદો રાજકોટ સાથે સંકળાયેલી છે, જેને લઈને આ યાદોને રાજકોટવાસીઓ સહિત દેશ વિદેશના લોકો જાણી શકે, તેમજ ગાંધીજીના બાળપણથી લઈને તેમના વિવિધ આંદોલનો સહિતની તેમના જીવનના સંઘર્ષ અંગે લોકોને વધુમાં વધુ જાણકારી મળે તેવા હેતુથી કોર્પોરેશન દ્વારા આ મ્યુઝિયમ સંપૂર્ણ રીતે આધુનિકતાથી તૈયાર કર્યું છે. અત્યાર સુધીમાં કોર્પોરેશનને રૂ.40 લાખની આવક પણ આ ગાંધી મ્યુઝિયમ દ્વારા થઈ છે.