રાજકોટમાં આયુર્વેદિક દવાઓના નામે એક્સપાયરી દવાનું કૌભાંડ, લાખોની દવા ઝડપાઇ

રાજકોટ સ્પેશિયલ ઓપરેશન ગ્રુપ દ્વારા ગુરુવારે પરેશ પટેલ નામના ડોક્ટરના ક્લિનીક પર દરોડો પાડ્યો હતો. શહેરની શ્રમજીવી સોસાયટીમાં આ ક્લિનીકમાંથી SOG ને આયુર્વેદિક દવાઓનો મોટો જથ્થો મળી આવ્યો હતો. જે મામલે SOG એ મનપાની આરોગ્ય ટિમ અને ફૂડ એન્ડ ડ્રગ્સ વિભાગની પણ મદદ લીધી હતી. આ દવાઓનો જથ્થો મોટા પ્રમાણમાં આયુર્વેદિક હતો. તપાસ દરમિયાન એવી પણ વાત સામે આવી છે કે, દવાઓ એક્સપાયરી ડેટ વાળી હતી. જેનું સ્ટીકર બદલાવીને નવા સ્ટીકર લગાડીને આ દવાઓનું વેંચાણ કરવામાં આવતું હતું. પોલીસે આ મામલે કહેવાતા તબીબ પરેશ પટેલની ધરપકડ કરી હતી. તેમજ તેની વિવિધ દુકાનો અને જ્યાંથી દવાઓનું વેંચાણ થતું હોય ત્યાં તેને સાથે રાખીને વધુ તપાસ કરવામાં આવી હતી.

• રાજકોટમાં આયુર્વેદિક દવાઓના નામે એક્સપાયરી દવાનું કૌભાંડ
• લાખોની દવા ઝડપાઇ
• ગોડાઉનમાંથી મળી આવ્યો લાખોની દવાઓનો જથ્થો

રાજકોટઃ SOG એ ગુરુવારે પરેશ પટેલના ક્લિનીક અને રહેણાંક વિસ્તારમાં આવેલા ગોડાઉનમાં દરોડો પાડ્યો હતો. અહીંથી લાખોની કિંમતની એક્સપાયરી ડેટ વાળી દવાઓ મળી આવી હતી. આ આયુર્વેદિક દવાઓ યોગ્ય છે કે નહીં તે મામલે SOG એ વધુ તપાસ શરૂ કરી છે. જેમાં ફૂડ એન્ડ ડ્રગ્સ તેમજ મહાનગરપાલિકાના આરોગ્ય વિભાગની મદદ લેવામાં આવી છે. આ ટિમ દ્વારા શુક્રવારે પરેશ પટેલની વધુ ત્રણ જેટકી અલગ અલગ દુકાનો પર દરોડા પાડવામાં આવ્યા હતા. જે દરમિયાન પણ આયુર્વેદિક દવાઓનો મોટો જથ્થો ઝડપાયો છે. હજુ પણ આ તપાસ શરૂ છે. સંપૂર્ણ તપાસ પૂર્ણ થયા બાદ ખરેખરમાં આ આખો મામલો શું છે તે બહાર આવી શકે છે.

આયુર્વેદિક દવાના નામે લોકોના આરોગ્ય સાથે ચેડા

પરેશ પટેલ આયુર્વેદિક દવાઓના નામે લોકોના આરોગ્ય સાથે ચેડા કરતો હોવાનું સામે આવ્યું છે. જેમાં તે જે તે કંપનીઓની એક્સપાયરી દવાઓનો જથ્થો એકઠો કરીને આ દવાઓ પર નવી તારીખના સ્ટીકર મારીને આ દવાઓ વેંચાણ અર્થે રાખતો હતો. આ આયુર્વેદિક દવાઓમાં સીરપ કે જે કફ, કિડની તેમજ અન્ય વિટામિનની દવાઓ, ચૂર્ણ તેમજ ચ્યવનપ્રાસ, ઇમ્યુનિટી બુસ્ટર, મધુમેહ નાશક જેવા રોગોની દવાઓનો સમાવેશ થાય છે. આ તમામ દવાઓ એક્સપાયરી ડેટની હોવા છતાં તેમાં નવી તારીખ નાખીને તેનું વેંચાણ કરવામાં આવતું હતું. જે અંગેની બાતમી SOG ને મળતા આ મામલે વધુ તપાસ શરૂ કરવામાં આવી હતી.

તમામ દવાઓને પરીક્ષણ માટે મોકલાશે

આ દવાઓના જથ્થામાં ખરેખરમાં શું મેળવવામાં આવતું હતું. તે અંગેની તપાસ આરોગ્ય વિભાગ અને ફૂડ એન્ડ ડ્રગ્સ વિભાગ દ્વારા શરૂ કરવામાં આવી છે. પરેશ હોટેલના ક્લિનીક, ગોડાઉન અને દુકાનોમાંથી મળી આવેલી દવાઓના સેમ્પલને લઈને તેના પરીક્ષણ માટે મોકલવામાં આવ્યા છે. આ દવાઓનો જથ્થો અંદાજીત રૂપિયા 1 કરોડની કિંમતનો હોવાનું હાલ ચર્ચાઈ રહ્યું છે. SOG, ફૂડ એન્ડ ડ્રગ્સ વિભાગ અને આરોગ્ય વિભાગ દ્વારા આ મામલે ગુરુવારે કાર્યવાહી શરૂ કરવામાં આવી હતી. જે શુક્રવારે બીજા દિવસે પણ યથાવત જોવા મળી રહી છે. હવે કાર્યવાહી પુરી થયા બાદ આ મામલે પણ અનેક ચોંકાવનારી વિગતો સામે આવી શકે છે.

લાયસન્સ અને ડોક્ટરની ડીગ્રી મામલે પણ તપાસ

હાલ પોલીસ દ્વારા પરેશ પટેલ નામના શખ્સની આ મામલે ધરપકડ કરી છે. પરેશ પટેલની ડોક્ટરની ડીગ્રી અંગે પણ વધુ તપાસ કરવામાં આવશે. તેમજ ડોક્ટર દ્વારા આ આયુર્વેદિક દવાઓનું વહેંચાણ અંગેનું લાયસન્સ છે કે કેમ તે મામલે પણ તપાસ કરાઈ રહી છે. આજે બીજા દિવસે પણ ચાલુ છે અને પરેશ પટેલની અન્ય જગ્યા પર દરોડો કરી ત્યાં પણ દવાનો જથ્થો ચકાસવામાં આવશે. ઉલ્લેખનીય છે કે, આ દરોડા દરમિયાન મોટી માત્રામાં દવાનો જથ્થો મળી આવ્યો છે. જેને પરીક્ષણ માટે મોકલી આ સાથે દવાની કંપની ખાતે ક્રોસ વેરિફિકેશન કરવામાં આવશે. જેમાં ખોટું થતું હોવાનું માલુમ થશે તો કાયદેસરની કાર્યવાહી હાથ ધરવામાં આવશે.