જૂનાગઢના માનસિક વિકલાંગ બાળકોએ તૈયાર કરી અવનવી રાખડી

રક્ષાબંધનનો તહેવાર નજીક આવી રહ્યો છે ત્યારે જૂનાગઢની માનસિક વિકલાંગ લોકોની સારવાર કરતી અને તેને આત્મનિર્ભર બનાવવા માટે કામ કરતી આશાદીપ સંસ્થાના વિકલાંગ બાળકો રાખડી તૈયાર કરીને ઓનલાઈન વેચાણ કરીને વળતર મેળવી રહ્યાં છે.

જૂનાગઢઃ રક્ષાબંધનનો તહેવાર થોડા દિવસો બાદ આવી રહ્યો છે ત્યારે કોરોના વાયરસને કારણે રાખડી બજારમાં હજુ પણ ચહલપહલ જોવા મળતી નથી. ત્યારે જૂનાગઢમાં માનસિક વિકલાંગો માટે કામ કરતી આશાદીપ સંસ્થાએ વિકલાંગોને આ સમયમાં રોજગારી મળી શકે તે માટે બાળકો દ્વારા તૈયાર કરવામાં આવેલી અવનવી રાખડીઓ બજારમાં વેચાણ માટે મૂકી છે.

જૂનાગઢના માનસિક વિકલાંગ બાળકોએ તૈયાર કરી અવનવી રાખડી

આશાદીપ સોસાયટીમાં માનસિક વિકલાંગ બાળકો દ્વારા કાચા મટિરિયલમાંથી રાખડીઓ બનાવવાથી લઇને તેનું પૅકેજિંગ સહિતની કામગીરી વિકલાંગ બાળકો દ્વારા કરવામાં આવે છે. તૈયાર કરવામાં આવેલી રાખડીઓ બજારમાં વેચાણ અર્થે મૂકવામાં આવી છે. આ વર્ષે કોરોના વાયરસને કારણે રાખડી ખુલ્લી બજારમાં નહીં મૂકીને તેનું ઓનલાઇન વેચાણ કરવામાં આવી રહ્યું છે. આ રાખડીના વેચાણમાંથી મળતી આવક માનસિક વિકલાંગ બાળકોના પરિવારોને આપવામાં આવે છે અને જેના થકી ઘણા પરિવારો આત્મનિર્ભર બનવાની દિશામાં આગળ વધી રહ્યાં છે.