તૌકતે વાવાઝોડાને પગલે સૌરાષ્ટ્રમાં પડી શકે અતિભારે વરસાદ, લોકોને સાવચેત રહેવા કરાઇ અપીલ

તૌકતે વાવાઝોડાની અસર હેઠળ સૌરાષ્ટ્રના દરિયાકાંઠાના વિસ્તારમાં આવેલા જિલ્લાઓ ગીર સોમનાથ, જૂનાગઢ, દ્વારકા અને અમરેલી સહિત મોટાભાગના સૌરાષ્ટ્રના જિલ્લાઓમાં વાવાઝોડાની અસરને પગલે ભારેથી અતિભારે વરસાદ પડવાની શક્યતા જૂનાગઢ હવામાન વિભાગે વ્યક્ત કરી છે. આ ઉપરાંત વાવાઝોડાની અસર હેઠળ ઉનાળુ પાકો તેમજ પશુધનને પણ નુકસાન થવાની ભીતિ હવામાન વિભાગે વ્યક્ત કરી છે. આ સાથે જ તમામ લોકોને સાવચેત રહેવા તેમજ કૃષિ પાકો તેમજ પશુધનને સલામત સ્થળે ખસી જવા વિનંતી કરી છે.

• તૌકતે વાવાઝોડાની અસરથી સૌરાષ્ટ્રમાં પડી શકે છે અતિભારે વરસાદ
• વાવાઝોડુ હાલ વેરાવળથી દક્ષિણ દક્ષિણ પૂર્વ 1,010 કિલોમીટરે થયું સ્થિર
• રવિવારથી વાવાઝોડાની અસરો વધી શકે

જૂનાગઢઃ સૌરાષ્ટ્ર પર તૌકતે વાવાઝોડાનો ખતરો ઉભો થયો છે. હાલ આ વાવાઝોડુ દક્ષિણ ભારતના દરિયા કિનારાથી દૂર સક્રિય થયું છે અને ધીમે ધીમે ગુજરાત તરફ આગળ વધી રહ્યું છે. જે આગામી 18 તારીખ અને મંગળવાર સુધીમાં સૌરાષ્ટ્રના દરિયાકાંઠાના વિસ્તારોને ટકરાશે તેવી પ્રબળ શક્યતાઓ જૂનાગઢ હવામાન વિભાગે વ્યક્ત કરી છે. વાવાઝોડાની અસર નીચે સૌરાષ્ટ્રના દરિયાકાંઠાના વિસ્તારોમાં ભારેથી અતિભારે વરસાદ પડવાની શક્યતાઓ પણ હવામાન વિભાગે વ્યક્ત કરી છે. દ્વારકા, પોરબંદર, જૂનાગઢ, ગીર-સોમનાથ, અમરેલી અને દીવ સુધીના દરિયાકાંઠાના વિસ્તારોમાં ભારેથી અતિભારે વરસાદ પણ પડી શકે છે. જેથી લોકોને સાવચેત રહેવા હવામાન વિભાગે સૂચના આપી છે.

આ પણ વાંચોઃ કચ્છમાં તૌકતે વાવાઝોડાની અસરના પગલે 3 દિવસમાં 496 માછીમારી બોટ પરત ફરી

વાવાઝોડાની અસર નીચે કૃષિ પાકો અને પશુધનને પણ થઈ શકે છે નુકસાન

તૌકતે વાવાઝોડું દક્ષિણ દક્ષિણ પૂર્વ પર 1,010 કિલોમીટરે સ્થિર થયું છે. જે આગળ વધીને વેરાવળ, પોરબંદર સહિત સૌરાષ્ટ્રના દરિયાકાંઠાના વિસ્તારોને ટકરાઈ શકે છે. વાવાઝોડાની અસર નીચે ૧૩૦થી 150 કિલોમીટરની ઝડપે પવન ફૂંકાવાની શક્યતા પણ હવામાન વિભાગે વ્યક્ત કરી છે. જેને લઇને ખેડૂતોએ પોતાના કૃષિ પાકો તેમજ પશુધનને સલામત સ્થળે ખસેડવાની કામગીરી તાકીદે શરૂ કરવી જોઇએ તેવી સલાહ પણ હવામાન વિભાગે જાહેર કરી છે. વધુમાં આગામી 16 તારીખ સુધીમાં હળવા વરસાદની પણ શક્યતાઓ હવામાન વિભાગે વ્યક્ત કરી છે. ત્યારબાદ 17 તારીખે કેટલાક દરિયાઈ વિસ્તારના જિલ્લાઓમાં ભારેથી અતિભારે વરસાદ પડવાની શક્યતાઓ પણ વ્યક્ત કરવામાં આવી છે. આ ઉપરાંત 18 તારીખને મંગળવારે અતિભારે વરસાદ વાવાઝોડાની અસર નીચે કેટલાક વિસ્તારોમાં પડી શકે તેવી શક્યતાઓ હવામાન વિભાગે વ્યક્ત કરી છે.