જૂનાગઢના વંથલી નજીક બિરાજી રહ્યાં છે ભયંકરનાથ મહાદેવ, ભક્તોની આસ્થાનું કેન્દ્ર

જૂનાગઢ જિલ્લાના વંથલી નજીક પાંડવો દ્વારા સ્થાપવામાં આવેલું ભયંકરનાથ મહાદેવનું મંદિર શિવભક્તોમાં ભારે આસ્થાનું કેન્દ્ર બની રહ્યું છે. પ્રાચીન સમયમાં અતિ દુર્ગમ વિસ્તારમાં પાંડવો દ્વારા મહાદેવની સ્થાપના કરવામાં આવી હતી. ત્યારથી આ મહાદેવ ભયંકરનાથ મહાદેવ તરીકે આજે પણ તેમના ભક્તજનોમાં ભારે આસ્થાનું કેન્દ્ર બની રહ્યાં છે.

જૂનાગઢઃ સોમનાથ, વૈજનાથ, પશુપતિનાથ, ભૂતનાથ, ભવનાથ, માંગનાથ, બિલનાથ, કાશી વિશ્વનાથ આ બધા નામો દેશમાં આવેલા શિવાલયોના છે. પરંતુ આજે અમે આપને એક એવા નાથ વિશે જાણકારી આપવા જઈ રહ્યાં છીએ, જેનું નામ સાંભળીને પ્રથમ આપને આંચકો જરૂર લાગશે. જૂનાગઢ જિલ્લાના વંથલી નજીક શાપુર ગામમાં ભગવાન ભયંકરનાથ ૫૦૦ કરતા વધુ વર્ષોથી બિરાજી રહ્યાં છે. ભયંકરનાથ નામ સાંભળીને નવાઈ લાગીને, પણ આ ભયંકરનાથ આજે પણ અનેક ભક્તોની આસ્થાનું કેન્દ્ર છે. શ્રાવણ માસ અને મહાશિવરાત્રી સિવાય સમગ્ર વર્ષ દરમિયાન મોટી સંખ્યામાં ભગવાન ભયંકરનાથના ભક્તો અહીં શિશ ઝૂકાવીને મહાદેવની કૃપા પ્રાપ્ત કરતાં હોય છે.

સદીઓ પહેલાં પાંડવો વનવાસ દરમ્યાન વિચરણ કરી રહ્યાં હતાં ત્યારે આ શિવલિંગની સ્થાપના કરી હોવાનું માનવામાં આવે છે. જે તે સમયે પાંડવો દ્વારા આ શિવલિંગનું સ્થાપન કરવામાં આવ્યું હતું ત્યારે આ જગ્યા અતિ વિરાન અને ગીચ જંગલની વચ્ચે જોવા મળતી હતી. જેને કારણે લોકો ધોળા દિવસે પણ અહીં આવતા ભયના માર્યા થરથરતાં હતાં તેને કારણે જ આ મહાદેવનું નામ ભયંકરનાથ મહાદેવ રાખવામાં આવ્યું હોવાના પૂરાવા આજે પણ જોવા મળી રહ્યાં છે.ભયંકરનાથ મહાદેવ જગ્યાનો વિકાસ ધીમેધીમે શરૂ થયો અને આજે શિવરાત્રી અને શ્રાવણ માસ દરમિયાન ખૂબ મોટી સંખ્યામાં ભગવાન ભોળાનાથના ભક્તો અહીં દર્શનાર્થે આવે છે. ભયંકરનાથ મહાદેવ એક એવું શિવાલય છે કે અહીં આરતીના સમયને બાદ કરતાં કોઈપણ મહિલા અને પુરુષ શિવભક્ત પોતાની મનોકામના મુજબ ભગવાન ભયંકરનાથને અભિષેક કરી શકે છે જે આ શિવાલયની આજે પણ વિશેષતા છે. મોટા ભાગના શિવાલયોમાં પંડિતો દ્વારા જ અભિષેક કરવામાં આવતો હોય છે, ત્યારે આ મંદિરમાં સૌ કોઈને અભિષેક કરવાની વિશેષ તક મળે છે જેને કારણે ભયંકરનાથ મહાદેવ તેમના ભક્તોમાં ભારે આસ્થાનું કેન્દ્ર બની રહ્યાં છે.