જામનગરઃ જામનગરમાં રેલવે બ્રિજ પાસે આવેલા 20 વર્ષ જૂના જર્જરિત આવાસ મામલે જામનગર મહાનગરપાલિકા દ્વારા નોટિસ ઇસ્યુ કરવામાં આવી છે. ટૂંક સમય ચોમાસુ સિઝન શરૂ થવાની છે ત્યારે જર્જરિત હાલતમાં રહેલા આવાસો ગમે ત્યારે તૂટી પડે તેવી શક્યતા હોવાના કારણે જામનગર મહાનગરપાલિકા દ્વારા નોટિસ આપવામાં આવી છે. તેમજ જે જર્જરિત હાલતમાં આવાસો છે તે આવાસનું સમારકામ કરવાની જે તે આવાસના માલિકોની જવાબદાર હોવાનું મહાનગરપાલિકાના સિવિલ એન્જિનિયર એ જણાવ્યું છે.
આવાસ યોજનાનાં જર્જરિત ફ્લેટનું રીનોવેશન કરવાની જવાબદારી મકાન માલિકોની:JMC જામનગરમાં રેલવે બ્રિજની પાસે આવેલા આવાસ યોજનામાં 114 જેટલા બ્લોક બનાવવામાં આવ્યા છે અને આ બ્લોકમાંથી 46 જેટલા બ્લોક ખુબ જ જર્જરીત હાલતમાં છે. જે ગમે ત્યારે પડે તેવી શક્યતા છે. જામનગર ખંભાલીયા હાઈવે પર અંધાશ્રમની સામે આવેલા 1404 આવાસ યોજનાના રહેવાસીઓને સુચના આપવામાં આવી છે કે, જો કોઈ આવાસો ભયજનક સ્થિતિમાં જણાય તો તકેદારીના ભાગ રૂપે આવાસોનું મરામત તાત્કાલિક કરાવીને સલામત સ્થિતિએ જવુ અથવા આવા આવાસોનો રહેણાંક તરીકે વપરાશ બંધ કરીને અન્યત્ર વ્યવસ્થા કરવા સહિતના જરૂરી તમામ પગલા લેવાના રહેશે.
જામનગર મહાનગરપાલિકા દ્વારા કરવામાં આવેલા ભાડા કરાર જોગવાઈ મુજબ 1404 આવાસ યોજનાની મરામત તથા નિભાવણી જે તે ફ્લેટ ધારકોએ કરવાની રહે છે. જો કોઈ આવાસની મરામત અને નિભાવણી ન થવાને કારણે કે અન્ય કોઈ કારણે કોઈ આવાસનો બ્લોક કે ફ્લેટ ભયજનક સ્થિતિમાં લાગે તો સાવચેતીના પગલા લેવા જે તે ફ્લેટ ધારકો કે વપરાશકર્તાઓની ફરજ છે. આ અંગે મહાનગરપાલિકાની જવાબદારી રહેતી નથી. તેથી જ જામનગર મહાનગરપાલિકા દ્વારા નોટિસ ઇસ્યુ કરવામાં આવી છે.
