સાતમા સત્ર દરમિયાન વિધાનસભા ગૃહમાં અસામાજિક પ્રવૃત્તિ અંગેનો ખરડો થયો પસાર

ગુજરાત વિધાનસભાના સાતમા સત્રના બીજા દિવસે અસામાજિક તત્વોને ડામવા પાસાની જોગવાઈમાં સુધારો કરતું બિલ રજૂ કરવામાં આવ્યું હતી. ગૃહમાં ગરમાગરમીના અંતે અધ્યક્ષે આ બિલ પર આખરી મહોર મારી પાસાની જોગવાઈમાં સુધારા અંગે ખરડો પસાર કર્યો છે. જેનાથી આગામી દિવસોમાં અસામાજિક પર અંકુશ મેળવી શકાય તેવું ગૃહપ્રધાનનું માનવું છે.

ગાંધીનગરઃ સમગ્ર ગુજરાત છેલ્લા 15 વર્ષથી કરફ્યુ મુક્ત બન્યું છે. ત્યારે હજુ પણ ગુજરાતની સલામતી જળવાઈ રહે અને પાસા એક્ટનો રાજકીય દુરુપયોગ અમારી સરકાર નહીં કરે તેવો વિશ્વાસ ગૃહપ્રધાન પ્રદીપસિંહ જાડેજાએ આપ્યો છે. જેને લઈ ગુજરાત વિધાનસભામાં મંગળવારના રોજ કોંગ્રેસના ધારાસભ્ય ઈમરાન ખેડાવાલાએ ગુજરાત અસામાજિક પ્રવૃત્તિઓ અટકાવવા બાબતનું સુધારા વટહુકમના મંજૂર કરતો પ્રસ્તાવ ગૃહમાં રજૂ કર્યો હતો.

તો બીજી તરફ કોંગ્રેસ નામંજૂર કરવા માટે કરેલા પ્રસ્તાવનો ગૃહપ્રધાને પ્રદીપસિંહ જાડેજાએ તેમના ઉત્તરમાં રાજકીય નિવેદન કરતા ગૃહમાં કોંગ્રેસના સભ્યો અકળાયા હતા. પરિણામે ગૃહનું વાતાવરણ તંગ બન્યું હતું. કોંગ્રેસના ધારાસભ્ય ઈમરાન ખેડાવાલા ગુજરાત અસામાજિક પ્રવૃત્તિઓ અટકાવવા બાબત સરકારે લાવેલ આ સુધારા વટહુકમને ના મંજૂર કરતો પસ્તાવો વ્યક્ત કર્યો હતો. જેમાં તેમણે આ વટહુકમ અંગે પોતાના વિચારો વ્યક્ત કરતાં ગૃહમાં જણાવ્યું હતું કે ગુજરાતમાં ગુનાખોરી વધી રહી છે અને આજે પણ ઠેરઠેર દારૂ-જુગારના અડ્ડાઓ ધમધમી રહ્યા છે. જોકે પોલીસને ખબર હોવા છતા સત્તાના કારણે આવા પ્રકારના અડ્ડાઓ બંધ થતા નથી, તો બીજી તરફ વ્યાજખોરોનો ત્રાસ પણ વધી ગયો છે, જેના કારણે કેટલાય નાગરિકોના અપહરણ થાય છે અને વધુ વ્યાજ વસૂલ કરવા માટે ધાક ધમકીઓ આપવામાં આવતી હોવાનો ઉલ્લેખ કર્યો હતો. આ તબક્કે તેમણે એવો આક્ષેપ કર્યો હતો કે પાસા એક્ટના નામે રાજકીય વિરોધીઓને દૂર કરવાની દહેશત સમાજમાં ઊભી થઈ છે. જો કે રાજ્યના મંદિરોમાં સાધુઓની લવસ્ટોરીના કિસ્સાઓ પણ દિન-પ્રતિદિન વધતા ગયા છે અને શોષિત વ્યક્તિઓ પોલીસ પકડથી કેમ દૂર રહ્યા છે ? તેવો પ્રશ્ન ઉપસ્થિત કર્યો હતો.

આ ઉપરાંત સરકારની આડે હાથ લેતા ઈમરાન ખેડાવાલાએ એવો આક્ષેપ કર્યો કે આજે લાંચ લેતા પકડાયેલા સરકારી અધિકારીઓ પાસેથી પોલીસ પૈસા લઈને કેસ રફેદફે કરે છે. એટલું જ નહીં કેટલાક કિસ્સાઓમાં તો વધુ પૈસા લેવા માટે પોલીસ પાસના નામે ડરાવતી હોવાનો સીધો આક્ષેપ કર્યો હતો. વિધાનસભા ગૃહમાં નામંજૂર કરતા પ્રસ્તાવ સમયે કોંગ્રેસના ધારાસભ્યએ કરેલા આક્ષેપોનો વળતો જવાબ આપતા ગૃહપ્રધાન પ્રદીપસિંહ જાડેજાએ રાજકીય ટિપ્પણી કરતાં ગૃહમાં જણાવ્યું હતું કે આ વટહુકમ ગૃહમાં આવે તે પહેલા આ સત્ર ઈતિહાસીક બની રહેશે તેવી ખાતરી પત્રકારોને આપી હતી અને એટલે જ ગુજરાતમાં શાંતિ સલામતી અને સુરક્ષા માટે પાસાના કાયદા સુધારા વટહુકમ વિજયભાઈ રૂપાણીની સરકાર લાવવી હોવાનો સ્વીકાર કર્યો હતો.

આ તબક્કે તેમણે કોંગ્રેસ પર આક્ષેપ કર્યો હતો કે ભૂતકાળમાં બુલેટ પ્રુફ રથમાં ભગવાન જગન્નાથજીની રથયાત્રા નીકળી હતી. પરંતુ છેલ્લા 15 વર્ષથી ગુજરાત કરફ્યૂ મુક્ત બની ગયું છે. આ તબક્કે કોંગ્રેસના સભ્યો ઉપર આક્ષેપ કરતાં પ્રદીપસિંહ જાડેજાએ રાજકીય ટોણો માર્યો હતો કે ગુજરાતમાં વ્યાજખોરોનો ત્રાસ વધી રહ્યો છે. જેની સામે પાસા કાયદો સરકાર લાવે છે. ત્યારે કોંગ્રેસ વિરોધ શા માટે કરે છે મને એ નથી સમજાતું કે કોંગ્રેસનો એજન્ટ આ વ્યાજખોરો તરફથી છે કે તેની સામે ? ઈમરાન ખેડાવાલા વ્યાજખોરોના લાભાર્થી આવા ભાષણ એમ કરે છે તેવું નિવેદન કરતાં ગૃહમાં અશાંતિ થોડા સમય માટે સર્જાઇ હતી અને કોંગ્રેસના સભ્યોએ હોબાળો શરૂ કર્યો હતો.

જોકે ભારે હોબાળા વચ્ચે પ્રદીપસિંહ જાડેજાએ ઉત્તર આપવાનું ચાલુ રાખ્યું હતું અને આ સુધારા વટહુકમમાં સાયબર ક્રાઇમથી થતા ગુનાઓ અને પરિવારો ઉપર થતી વિપરીત અસરોની તલસ્પર્શી વિગતો ગૃહમાં રજૂ કરી હતી. આ તબક્કે જુગારના અડ્ડાઓથી જુગાર રમતા વ્યક્તિનું પરિવાર બરબાદ થાય છે અને તેના કારણે જ સરકારે આ કડક હથિયાર ઉગામ્યું હોવાનો ઉલ્લેખ કરતા ઈમરાન ખેડાવાલા ઉશ્કેરાઈ ગયા હતા અને ઉભા થઇ પ્રદિપસિંહનો વિરોધ કર્યો હતો, જો કે આ સમયે અધ્યક્ષે બેસી જવાની ચેતવણી આપતા મામલો શાંત થયો હતો.

જોકે આ સમયે પ્રદિપસિંહ જાડેજાએ એવું નિવેદન કર્યું કે, વિજયભાઈ રૂપાણીની સરકાર ગુનાહિત પ્રવૃત્તિઓને બંધ આંખે જોઈ રહે તેમ નથી. ભૂતકાળમાં કોંગ્રેસના શાસનમાં ભગવાન જગન્નાથજીની રથયાત્રા બુલેટ પ્રુફ રથમાં નીકળતી હતી, પરંતુ હવે શાંતિ સલામતી અને સુરક્ષા સાથે રથયાત્રા નીકળે છે, એવું કહેતા કોંગ્રેસના સભ્યો અકળાઈ ઉઠયા હતા. જે સૌ જાણે છે જેથી પાસાનો કાયદો જરૂરી છે. તેમ જણાવી આખરે આ કાયદો પસાર કરવામાં આવ્યો છે.

જ્યારે બીજી બાજુ વિપક્ષ નેતાએ કેટલીક આંકડાકીય માહિતી આપતા જણાવ્યું કે રાજ્યમાં આઇપીસી, સી.આર.પી.સી, એવિડન્સ એક્ટ, પાસા, ટાડા, જુગાર પ્રતિબંધ કાયદો, નશાબંધી, નાર્કોટીક્સ, શાહુકારી, સાઈબર, ગુજસીકેક સહિતના કાયદાઓ હોવા છતાં તેના અમલીકરણનો અભાવ છે. ખાખી વર્દીને ગુંડાગીરીનો પીળો પરવાનો આપવાથી નવી પેઢીને સમગ્ર ગુજરાતને ક્યાંક ગુલામ બનાવવાનું સરકાર ષડયંત્ર રચી રહી છે. કાયદાના હાથ હાથને ટૂંકા કરવાનું કામ સરકારે કર્યું એટલે ગુજરાતમાં સામાજિક પ્રવૃત્તિઓ ફૂલેફાલી છે. રાજ્યમાં દારૂ વેચવા માટે 31 માર્ચ 2018ની સ્થિતિએ છેલ્લા બે વર્ષમાં 28 હોટલોને સરકારે મંજૂરી આપી છે.

રાજ્યમાં 31 માર્ચ 2018ની સ્થિતિએ છેલ્લા 5 વર્ષમાં બળાત્કારના 4365 જેટલા કેસ નોંધાયા. 2408 સગીર દીકરી પર બળાત્કાર થયો છે. 96 જેટલી દીકરીઓ ઉપર નરાધમોએ સામૂહિક બળાત્કાર કર્યો. રાજ્યમાં 5399 જેટલા ખૂનના બનાવો નોંધાયા. સરકાર અસામાજિક પ્રવૃત્તિ ઉપર લગાવવા માટે થઈને કાયદો લઈને આવી છે. ત્યારે રાજ્યના મંદિરો પણ સલામત નથી. રાજ્યમાં કાયદાઓ અમલમાં હોવા છતાં સરકારની ઇચ્છાશક્તિના અભાવે રાજ્યમાં 24,040 જેટલા બાળકો ગૂમ થયા, તેમજ પાંચ વર્ષમાં 26,907 જેટલી મહિલાઓ ગુમ થયાની ફરિયાદો નોંધાઇ છે. રાજ્યમાં પોલીસના મંજૂર મહેકમ 81511ની સામે 15721 જગ્યાઓ ખાલી છે.

ગુજરાતના બેરોજગાર યુવાનો રોજગારી માટે દર-દર ભટકે છે. એલઆરડીના જવાનોને હવે સરકાર ઉપર વિશ્વાસ રહ્યો નથી. સરકાર કાયદો અને વ્યવસ્થા જાળવવામાં સંપૂર્ણપણે નિષ્ફળ નીવડી છે, ત્યારે પોતાની નિષ્ફળતા છુપાવવા માટે કાયદાને નવું અને નામ આપીને ક્રૂર જોગવાઇઓ સામેલ કરી છે. રાજ્યમાં પાસાનો કાયદો 1985થી છે. આ કાયદો ખૂબ જ કારગત નીવડયો છતા પણ આ કાયદો લાવવાનું કારણ શું છે? સરકાર પોતાના અંગત લાભ માટે તેનો દુરુપયોગ કરતી આવી હતી.