ગુજરાત યુનિવર્સિટીમાં ABVP દ્વારા શુદ્ધિ યજ્ઞ કરાયો, જાણો કારણ...

ગુજરાત યુનિવર્સિટીમાં એડમિશન પ્રક્રિયામાં ભ્રષ્ટાચાર થતો હોવાના આક્ષેપ સાથે સોમવારે ABVPએ વિરોધ પ્રદર્શન કર્યું હતું. જે અંતર્ગત તેણણે ગુજરાત યુનિવર્સિટી ખાતે શુદ્ધિકરણ યજ્ઞ યોજ્યો હતો. જેમાં ABVPએ એડમીશનના નામે પૈસા ઉઘરાવતા લોકો સામે FIR કરવી અને પ્રવેશ પ્રક્રિયામાંથી ખાનગી એજન્સીઓને દૂર કરવાની માગ કરી છે.

અમદાવાદઃ ગુજરાત યુનિવર્સિટીની પ્રવેશ પ્રક્રિયામાં ગડબડી મામલે ગત એક અઠવાડિયાથી ABVP અલગ-અલગ રીતે વિરોધ પ્રદર્શન કરી રહ્યું છે. આ વિરોધ પ્રદર્શનને આગળ વધારતા સોમવારે ABVPના કાર્યકરોએ પ્રવેશ શુદ્ધિ યજ્ઞ કરી વિરોધ નોંધાવ્યો હતો. આ યજ્ઞ ગુજરાત યુનિવર્સિટીમાં આવેલી VCની ચેમ્બર નીચે કરવામાં આવ્યો હતો.

ઉલ્લેખનીય છે કે, આ અગાઉ વિરોધના ભાગરૂપે રજિસ્ટ્રારને બંગડી આપવી, કુલપતિની ચેમ્બર બહાર બંગડી લટકાવવી, શાકભાજીની લારી લઈને કેમ્પસમાં આવવું વગેરે જેવા કાર્યક્રમો કરવામાં આવ્યા છે. આ તમામ કાર્યક્રમ થકી ABVP ગુજરાત યુનિવર્સીટીના વિવિધ કોર્ષની પ્રવેશ પ્રક્રિયામાં જે સભ્યોની નિમણૂક કરાઈ છે તેમને બદલવાની માગ કરી રહ્યું છે.

ગત વર્ષે યુનિવર્સીટી દ્વારા સરકારી બેઠકો પહેલા ખાનગી કૉલેજોની બેઠકો ભરવામાં આવી હતી. જેનો ABVPએ વિરોધ કર્યો હતો. આ વર્ષે પણ ABVP પ્રવેશ કમિટીના સભ્યો બદલવામાં આવે તેવી માગ કરી રહ્યું છે. આ સાથે જ ખાનગી બેઠકો પહેલાં સરકારી તમામ બેઠકો પર પ્રવેશ પ્રક્રિયા હાથ ધરવામાં આવે તેવી માગ કરી રહ્યું છે.

ABVPએ ગુજરાત યુનિવર્સીટીના VC, પ્રોવીસી, રજિસ્ટ્રાર અને શિક્ષણ પ્રધાનને ભગવાન સદબુદ્ધિ આપે. આ ઉપરાંત તમામને ભ્રષ્ટાચારમાંથી મુક્ત રાખે તેવા મંત્રોચ્ચાર કરી રામધૂન પણ બોલાવી હતી.