હાઈકોર્ટની વીજ કંપનીઓને લપડાક, 4 વર્ષમાં વસૂલેલી વધારાની રકમ ગ્રાહકોને પરત કરવી પડશે

ગુજરાત હાઈકોર્ટ (Gujarat High Court)માં વીજ કંપનીઓ દ્વારા ટ્રાન્સફોર્મર તેમજ વધારાના ચાર્જ વસૂલવામાં આવતા હોવા અંગે અરજી કરવામાં આવી હતી. આ અરજીના પગલે હાઈકોર્ટે વીજ કંપનીઓને વર્ષ 2011થી 2014 સુધીમાં વસૂલવામાં આવેલા વધારાનો ચાર્જ પરત કરવા આદેશ કર્યો છે.

• Gujarat High Court દ્વારા વીજ કંપનીઓને આપવામાં આવી લપડાક
• વર્ષ 2011થી 2014 દરમિયાન વસૂલાયેલો વધારાનો ચાર્જ પરત કરવો પડશે
• વધારાનો ચાર્જ પરત મેળવવા માટે ગ્રાહકોએ કરવી પડશે ફરિયાદ

ન્યૂઝ ડેસ્ક : ગુજરાતમાં વીજ કંપનીઓના ઉપભોક્તાઓ માટે રાહતના સમાચાર સામે આવ્યા છે. ટ્રાન્સફોર્મર તેમજ વધારાના ચાર્જીસ વસૂલવા અંગે ગુજરાત હાઈકોર્ટ (Gujarat High Court) દ્વારા વીજ કંપનીને ઝટકો આપવામાં આવ્યો છે. હાઈકોર્ટે વધારાના રૂપિયા અરજદારોને પરત આપવા હુકમ કર્યો છે. હાઈકોર્ટના આ આદેશ બાદ વર્ષ 2011થી 2014 સુધીમાં જે ગ્રાહકોએ આ વધારાનો ચાર્જ ચૂકવ્યો હશે, તેની ફરિયાદ કરવા પર વીજ કંપનીઓએ ચાર્જ પરત આપવો પડશે.

જાણો હાઈકોર્ટનો આદેશ

ગુજરાત હાઈકોર્ટ (Gujarat High Court)ના આદેશ પ્રમાણે અરજદારોને 4 અઠવાડિયામાં લીધેલી રકમ પરત કરાશે. હાઈકોર્ટના આદેશ બાદ 2011થી 2014 સુધીમાં જે ગ્રાહકો પાસેથી વીજ કંપનીઓએ વધારાનો ચાર્જ વસૂલ્યો હશે અને જો ગ્રાહકો ફરિયાદ કરશે તો એ ચાર્જ પરત આપવો પડશે. ઉલ્લેખનીય છે કે, નવા કનેક્શન માટે વદુ રકમ વસૂલાતી હોવાનો મામલો ગ્રાહક સુરક્ષા કોર્ટ (Consumer Court) માં પહોંચ્યો હતો. જ્યાં ચુકાદો વીજ કંપનીઓની તરફેણમાં આવ્યો હતો.

જાણો શું છે GERC

GERC (Gujarat Electricity Regulatory Commission) એ ઉત્તર ગુજરાત વીજ કંપની લિમિટેડ (UGVCL), મધ્ય ગુજરાત વીજ કંપની લિમિટેડ (MGVCL) સહિત રાજ્યની ચારેય વીજ કંપનીઓ માટે બનાવવામાં આવેલી રેગ્યુલેટરી બોડી છે. આ બોડી વીજ કંપનીઓ માટે જે માર્ગદર્શિકા ઘડે તેનું વીજ કંપનીઓએ કાયદાની રીતે પાલન કરવું પડે છે.

GERC ની સૂચના હોવા છતાય વીજ કંપનીઓ વસૂલતી હતી ચાર્જ

આ મુદ્દે એડવોકેટ રવિન્દ્ર શાહે જણાવ્યું હતું કે, આજે શુક્રવારે ગુજરાત હાઇકોર્ટે જે ચુકાદો આપ્યો છે તે હજારો ગ્રાહકોને ફાયદો પહોંચાડશે.વીજ કંપનીઓ ઈન્ફ્રાસ્ટ્રક્ચર ડેવલોપમેન્ટ (Infrastructure Development) ના નામે લખો રૂપિયાની રકમ એક સ્કીમ હેઠળ ગ્રાહકો પાસેથી વસૂલતી હતી. પણ આ ચાર્જ વસૂલ કરવાની GERCએ ના પાડી હતી. GERCએ આ પ્રકારના ચાર્જ વસૂલવાનો સ્પષ્ટ ઈનકાર કર્યો હતો.તેમ છતાં ચારેય સરકારી વીજ કંપનીએ આ ચાર્જ વસૂલવાનો ચાલુ રાખ્યો હતો.