એક સમય હતો જ્યારે ગુજરાતમાં આઠથી દશ દિવસના ગણેશ ઉત્સવ બાદ પ્રતિમાઓની દુર્દશા જોઈ શ્રદ્ધાળુઓનું હૈયું ચિત્કારી ઊઠતું. રાજ્યભરમાં નદીઓ, તળાવોમાં પ્લાસ્ટર ઓફ પેરિસ (પીઓપી) અને કેમિકલવાળા રંગોના મિશ્રણથી બનેલી પ્રતિમાઓ પધરાવવામાં આવતી. આ કારણે અઢળક ગંદકી અને પ્રદુષણ પાણીમાં થતું। ક્યારેક તો તેમાં વપરાતા ઝેરી કેમિકલ્સને કારણે માછલીઓ સહિતના જળચર જીવોનાં મોટા પ્રમાણમાં મૃત્યુ થવાના અહેવાલો આવતા.
હવે જ્યારે રાજ્ય સરકારે પણ ઇકો ફ્રેન્ડલી ગણેશ ઉત્સવને આવકાર્યો છે અને ઇકો ફ્રેન્ડલી ગણેશ ઉત્સવમાં વિશેષ રસ દાખવી સરકાર પણ આવી પ્રતિમાઓને પ્રોત્સાહન આપી રહી છે. જો કે છેલ્લા કેટલાક સમયથી રાજ્યભરમાં ગણેશ ઉત્સવને એક નવી જ રીતે ઊજવવાનું ચલણ વધી રહ્યું છે અને ઇકો ફ્રેન્ડલી ગણેશ ઉત્સવનું અભિયાન રૂપ લઈ રહ્યું છે. જો કે શરૂ-શરૂમાં લોકોને આ પ્રતિમાઓમાં ખૂબ જ ઓછો રસ પડતો હતો.
પરંતુ ધીરે ધીરે લોકોને અવેરનેસ આવતી ગઈ અને પી.ઓ.પી.માંથી બનેલ ગણેશ પ્રતિમાઓના નુકસાન અને માટીમાંથી બનેલ ઇકો ફ્રેન્ડલી પ્રતિમાના ફાયદા સમજવા લાગ્યા છે. પરિણામ એ આવ્યું કે પાછલા એક દાયકામાં ગણેશભક્તોમાં ખાસ્સું એવું પરિવર્તન આવ્યું છે. હવે તો ઘરે ઘરે લોકો માટીમાંથી બનેલી ગણેશ પ્રતિમાના સ્થાપનનો આગ્રહ રાખવા લાગ્યા છે.