બોગસ વેબસાઈટ બનાવી 71 વિદ્યાર્થીઓ સાથે છેતરપીંડી

અમદાવાદમાં સંજય સુમરા નામના વ્યકિતએ સરકારના નામે બોગસ વેબસાઇટ બનાવીને વિદ્યાર્થી પાસેથી એક ટેબ્લેટ દીઠ 500 રૂપિયા પડાવીને છેતરપિંડી કરી હોવાનું સામે આવતા સાઇબર ક્રાઇમે તેની વિરુદ્ધ છેતરપિંડી, ડોક્યુમેન્ટમાં ચેડા તેમજ આઇટી એક્ટ હેઠળ ગુનો દાખલ કરીને તપાસ શરૂ કરી છે. વર્ષ 2018થી સંજય સુમરા નામનો વ્યક્તિ આ વેબસાઇટ ચલાવતો હતો. ત્રણ વર્ષ સુધી પોલીસ અને સરકારના કોઇપણ વિભાગનું તેના તરફ ધ્યાન ન જતા અનેક સવાલો ઊભા થયા છે.

• સરકારી સહાયના નામે સાઈબર ક્રાઈમ
• અમદાવાદમાં 500 રૂપિયામાં ટેબ્લેટ આપવાના નામે થઈ છેતરપીંડી
• પોલીસે કરી આરોપીની ધરપકડ

અમદાવાદ: રાજ્યમાં સાયબર ક્રાઇમના ગુનામાં વધારો જોવા મળી રહ્યો છે ત્યારે આરોપીએ વિદ્યાર્થીઓને પણ ના છોડ્યા. જેમાં રાજ્ય સરકારની ટેબ્લેટ આપવાની યોજનામાં ધો.12 પાસ કરેલા વિદ્યાર્થીઓને 500 રૂપિયામાં ટેબ્લેટ આપવાની જાહેરાતની આડમાં બોગસ વેબસાઇટ બનાવીને 71 વિદ્યાર્થીઓ પાસેથી સાઇબર ગઠીયાએ છેતરપિંડી કરી હોવાનો ચોંકાવનારો કિસ્સો સાઇબર ક્રાઇમમાં સામે આવ્યો છે. ગઠીયો વર્ષ 2018થી બોગસ વેબસાઇટ ચલાવતો હતો અને સરકારની લેપટોપ સહાય યોજનાની જાહેરાતની ખોટી પીડીએફ ફાઇલ બનાવીને સોશિયલ મીડિયામાં વાયરલ કરી હતી. સરકારી વેબસાઇટની જેમ આબેહૂબ લાગતી આ વેબસાઇટનું ટેક્નિકલ ટીમ દ્રારા એનાલિસીસ કરવામાં આવતા તે ફૅક હોવાનું સામે આવ્યું છે. આ મામલે પોલીસે બે આરોપીની ધરપકડ કરી છે.

ફેક વેબ સાઈટ દ્વારા છેતરવામાં આવતા હતા વિદ્યાર્થીઓને

ન્યૂ રાણીપમાં રહેતા અને નોલેજ કોન્સોટીયમ ઑફ ગુજરાત શિક્ષણ વિભાગમાં કન્સલ્ટન્ટ તરીકે ફરજ બજાવતા અપેક્ષાબેન શાહે સાઇબર ક્રાઇમ પોલીસ સ્ટેશનમાં એક વ્યકિત વિરુદ્ધ છેતરપિંડીની ફરિયાદ કરી છે. અપેક્ષાબેન નમો ઇ-ટેબ યોજના અંતર્ગત ટેબ્લેટ વહેંચણીની કરવાનું કામ કરે છે. અપેક્ષાબેનને જાણવા મળ્યું હતું કે સંજય સુમરા નામના વ્યકિતએ સરકારની લેપટોપ સહાય યોજનાની જાહેરાતની ખોટી પીડીએફ ફાઇલ તેમજ ફૅક વેબસાઇટ બનાવીને સોશિયલ મીડિયા પર વાયરલ કરી છે.ત્યારબાદ તેઓએ સાયબર ક્રાઇમમાં ફરિયાદ નોંધાવી હતી.

આ પણ વાંચો : સુરતમાં વીડિયો કોલ પર યુવતીને બિભત્સ ચેનચાળા કરનારા આરોપીની ધરપકડ

લેપટોપ સહાયના નામે 500 રૂપિયા

આ ઉપરાંત સંજય સુમરાએ ફૅક વેબસાઇટમાં લેપટોપ સ્કીમ નામે ઓનલાઇન અરજી વિદ્યાર્થીઓ પાસે કરાવીને તેમને લેપટોપ સહાયના નામે 500 રૂપિયા લેતો હતો. અપેક્ષાબેને આ મામલે વેબાઇસટના હોમ મેનુમાં ક્લિક કરતા જોયું તો રાજ્ય સરકારની વેબસાઇટ રિ-ડાયરેક્ટ થતી જોવા મળી હતી. અપેક્ષાબેનને શંકા જતા તેમણે ટેક્નિકલ ટીમ મારફતે વેબસાઇટનું એનાલિલીસ કરાવ્યું હતું. જ્યારે માલુમ પડ્યું હતું કે વિદ્યાએથીઓ પાસેથી 35 હજાર રૂપિયા ખંખેરી લીધા છે, જેમાં નમો ઇ-ટેબ યોજના અંતર્ગત ઘો.12ની પરીક્ષા પાસ કરીને કૉલેજના પ્રથમ વર્ષમાં પ્રવેશ મેળવેલા વિદ્યાર્થીઓને ટેબ્લેટ ફાળવવામાં આવે છે. હાલ ગુજરાત સરકારના શિક્ષણ વિભાગ તરફથી લેપટોપ સહાય યોજના નામની કોઇ યોજના બહાર પાડી નથી કે કોઇને ઓથોરાઇઝ્ડ કરી નથી.