કોર્ટ મિત્ર અને GPCBએ નદીનું કર્યું ઇન્સ્પેકશન, સ્થિતિ ખૂબ ગંભીર

ગુજરાત હાઇકોર્ટે અગાઉ નદીને દૂષિત કરનારાઓને ઓળખવા સ્થળના ઇન્સ્પેકશન માટે કોર્ટ મિત્ર તરીકે હેમાંગ શાહને જવાબદારી આપી હતી. આ મુદ્દે હેમાંગ શાહ અને GPCBની ટીમે સાબરમતી નદીની મુલાકાત લીધી હતી. હવે ટૂંક સમયમાં જ તેઓ કોર્ટમાં રિપોર્ટ રજૂ કરશે.

• સાબરમતી નદીમાં ફેલાતા પ્રદૂષણનો વિવાદ
• કોર્ટમિત્રે સ્થળની કરી મુલાકાત
• ટૂંક સમયમાં રિપોર્ટ કોર્ટમાં રજૂ કરાશે

અમદાવાદ: અગાઉ ગુજરાત હાઇકોર્ટે સાબરમતી નદીને દૂષિત કરનારાઓને ઓળખવા કોર્ટ મિત્ર તરીકે હેમાંગ શાહને ઇન્સ્પેક્શન માટે જવાબદારી આપી હતી. આ સાબરમતી નદીના પ્રદૂષણને લઇને હેમાંગ શાહ અને GPCBની ટીમે સાબરમતી નદીની મુલાકાત લીધી હતી. તેમણે મીડિયાને જણાવ્યું હતું કે, સ્થિતિ ખૂબ ગંભીર છે, આપણને લાગે છે કે આપણે ચોખ્ખા પાણીમાંથી ઉગેલી શાકભાજી ખાઈ રહ્યા છે, પણ એવું નથી.

ગઈ કાલે ટીમે કરી મુકલાત

કોર્ટ મિત્ર હેમાંગ શાહ અને પ્રદુષણ નિયત્રણ બોર્ડે સ્થળની મુલાકાત લીધી હતી. નદીમાં ઠાલવતા તમામ પ્લાન્ટ્સ, જેમાં સુવેજ ટ્રીટમેન્ટ પ્લાન્ટ્સ અને ઔદ્યોગિક એકમના ઈન્ફ્લૂઅન્ટ પ્લાન્ટ્સ દૂષિત પાણી ટ્રીટમેન્ટ વગર જ છોડતા હોય તે પ્રકારની તસવીરો સામે આવી છે. તપાસ દરમિયાન આવા કનેક્શન મળી આવ્યા છે. આવું દૂષિત પાણી નદીમાં ડાઉનસ્ટ્રીમમાં જતું હોવાના કારણે તે નદી આસપાસના મેદાનોમાં થતી ખેતીમાં પહોંચી રહ્યું છે. જેના કારણે પ્રદુષિત પાણીમાંથી જ પકવાતો પાક લોકો સુધી પહોંચી રહ્યો છે.

અગાઉ પણ કોર્ટે નદીને દૂષિત કરનારા સામે કડક પગલાં લેવા કહ્યું હતું

ઉલ્લેખનીય છે કે, અગાઉ કોર્ટે નદીને દૂષિત કરનારાઓ સામે કડક પગલાં લઇ કોઈને છોડવામાં નહીં આવે તેવું જણાવ્યું હતું. કોર્ટે કહ્યું હતું કે, એક એકને પકડીને સીધા કરવામાં આવશે તેવું જણાવ્યું હતું.

કોર્ટે ગત સુનાવણીમાં પોતે સ્થળ તપાસ કરશે તેવી શકયતા વ્યક્ત કરી હતી

ગત સુનાવણીમાં કોર્ટ મિત્ર હેમાંગ શાહે કોર્ટમાં રજૂઆત કરી હતી કે, તેઓ જ્યારે નદીને દૂષિત કરતા એકમોની તપાસ માટે જાય છે, ત્યારે તેમને પ્રવેશ આપવામાં નથી આવતો. કોર્ટે આ સામે જવાબ આપતા જણાવ્યું હતું કે, જો તમને પ્રવેશ લેતા કોઈ અટકાવશે તો અમે બન્ને જજ સ્થળ મુલાકાત લઈશું. કોર્ટે શરૂઆતથી જ નદીને દૂષિત કરવા મામલે ગંભીરતા દાખવી છે. અગાઉ પણ કોર્ટે પ્રદુષણ નિયંત્રણ બોર્ડને જવાબદાર સામે પગલાં લેવા જણાવ્યું હતું. આ મુદ્દે વધુ સુનાવણી આગામી દિવસોમાં કરવામાં આવશે.