મનપામાં આસિસ્ટન્ટ મ્યુનિસિપલ કમિશ્નરની ભરતીમાં ખાલી પડેલી જગ્યા વેઇટિંગ લિસ્ટ મુજબ ભરતી કરવા કોર્ટમાં બીજી અરજી

ગુજરાત હાઇકોર્ટમાં મનપાની આસિસ્ટન્ટ મ્યુનિસિપલ કમિશ્નરની ભરતીને લઇ અરજી કરવામાં આવી છે. અરજીમાં સીધા બહારથી લેવાના ઉમેદવારોની બહાર પડેલી 10 જગ્યાઓમાંથી 1 જગ્યા ખાલી રહેતા તેને વેઇટિંગ લિસ્ટમાં જે ઉમેદવારનું નામ પ્રથમ હોય તેને આપવા અરજી કરવામાં આવી હતી. મહત્વનું છે કે, મનપામાં 2019માં 25 જગ્યાઓ ભરવા જાહેરાત કરવામાં આવી હતી.

• મનપામાં બહારના ઉમેદવારો માટે થયેલી ભરતીને લઈ કોર્ટમાં અરજી
• નવા 10 ઉમેદવારોની થનારી ભરતીમાંથી માત્ર 9 જગ્યા ભરાતા થઈ અરજી
• બાકી રહેલી એક જગ્યા વેઇટિંગ લિસ્ટ મુજબ ભરવા કરાઇ અપીલ

અમદાવાદઃ વર્ષ 2019માં મનપાએ 25 આસિસ્ટન્ટ મ્યુનિસિપલ કમિશ્નરની ભરતી કરવા જાહેરાત બહાર પાડી હતી. જેમાંથી 15 જગ્યા સીધા મનપાના ઇન્ટરનલ રીતે અને એક્સટર્નલ એટલે કે બહારથી 10 જગ્યાઓ ભરવાની હતી, પરંતુ બન્ને ઇન્ટરનલ અને એક્સટર્નલ જગ્યાઓમાં દરેકમાં 1-1 જગ્યા ખાલી રહેતા વેઇટિંગ લિસ્ટ મુજબ જગ્યા ભરવા માટે એક અરજી અગાઉ અને આજે શુક્રવારે બીજી અરજી ગુજરાત હાઇકોર્ટમાં થઈ છે. આજે શુક્રવારે થયેલી અરજીમાં બહારથી એટલે કે સીધી ભરતીમાં ખાલી પડેલી 1 જગ્યા માટે અરજી થઈ છે.

આ પણ વાંચોઃ ગુજરાત હાઇકોર્ટમાં સુઓમોટો અરજી: કોરોનાની સારવારમાં આયુર્વેદિક દવાનો કોર્સ થાય તેવી માંગણી

કઈ રીતે ખાલી પડી એક જગ્યા?

અરજીમાં ઉલ્લેખ કરવામાં આવ્યો છે કે, અગાઉ મનપાના અધિકારી દેવેન ભટ્ટે ઇન્ટરનલ અને એક્સટર્નલ ભરતી આમ બન્ને કેટેગરીમાંથી ફોર્મ ભર્યાં હતા. પરિણામ આવતા તેમને ઇન્ટર્નલ જગ્યામાંથી પસંદગી લેતા સીધી ભરતીની જગ્યા ખાલી પડી છે. આમ 10માંથી માત્ર 9 જ જગ્યા ભરાતા એક જગ્યા વેઇટિંગ લિસ્ટ પ્રમાણે ભરવા નામદાર હાઇકોર્ટ આદેશ કરે તે માટે અરજી કરવામાં આવી છે.

રાજ્ય સરકારના જી.આર.પ્રમાણે વેઇટિંગ લિસ્ટ રાખવું અનિવાર્ય

રાજ્ય સરકારના જનરલ એડમિનિસ્ટ્રેશન વિભાગના વર્ષ 2018ના જી.આર મુજબ ભરતીના પરિણામોની સાથે વેઇટિંગ લિસ્ટ પણ જાહેર કરવું અને જો જગ્યા કોઈ કારણસર ખાલી પડે તો વેઇટિંગ લિસ્ટ મુજબ જગ્યાઓ ભરવા કહેવાયું છે. મનપા માટે પણ નિયમ યથાવત રહે છે, પરંતુ આજ દિન સુધી ઇન્ટરનલ અને એક્સટર્નલ બન્ને કેટેગરીમાંથી 1-1 જગ્યા ખાલી છે. જે ભરવામાં નથી આવી. જો આમ કરવામાં આવે તો એક્સટર્નલ જગ્યા માટે નીરજ પાંડે અને ઇન્ટર્નલ જગ્યા માટે સારંગ મોદીને આ જગ્યા મળી શકે છે. કારણ કે, તેઓ વેઇટિંગ મેરિટમાં પ્રથમ સ્થાને છે.

અગાઉ પણ ભરતી માટે થઈ ચૂકી છે અરજી

અગાઉ પણ મનપામાંથી અંદરના અધિકારીઓ માટેની 15 બેઠક પૈકી 1 જગ્યા ખાલી રહેતા તેને ભરવા નામદાર હાઇકોર્ટમાં અરજી કરવામાં આવી હતી. જો કે, હજુ તેની સુનાવણી બાકી છે. આજે શુક્રવારે થયેલી અરજીની મુદત 9 જૂને રાખવામાં આવી છે. આ માટે નામદાર હાઇકોર્ટે નોટિસ પણ ઈશ્યુ કરી છે.