અમદાવાદનું આ 'હેપ્પી ફ્રીઝ' ઠંડુ પાણી નહીં પણ ભૂખ્યાને ફ્રીમાં ભોજન આપે છે...

દેશમાં આજે પણ રાતે લોકો ભૂખ્યા પેટે સુઈ જતા હોય છે, ત્યારે કેટલાક લોકોને ઘરમાં કે સામાજિક પ્રસંગમાં જરૂર કરતાં વધારે જમવાનું બનાવવામાં આવે છે અને જમવાનું વધતા તેને ફેંકી દેવામાં આવે છે, ત્યારે બંને સંજોગોને ધ્યાનમાં રાખીને પાલડી વિસ્તારના શાંતિ ટાવરના રહીશોએ એક અનોખી પહેલ શરૂ કરી છે.

અમદાવાદઃ શહેરના પાલડી વિસ્તારમાં આવેલ શાંતિ ટાવરમાં રહેતા રહીશોને વિચાર આવ્યો કે, આપણી સોસોયટી ઉપરાંત બીજા વિસ્તારમાં રોજે રોજ લોકોના ઘરે જમવાનું બનેે છે અને ક્યારેક જમવાનું બનાવ્યા બાદ વધે પણ છે. આવા વધતા ભોજનને ફેંકી દેવા કરતા ભોજનને બેસ્ટ તરીકે ઉપયોગ કરી કોઈકના પેટમાં જાય તેવું કરવામાં આવે. આ વિચારને લઈને સોસાયટીના રહીશોએ સોસાયટીના દરવાજા પાસે ફ્રીઝ મૂક્યું છે, જેનું નામ પણ HAPPY ફ્રીઝ આપવામાં આવ્યું છે.

20 દિવસ અગાઉ મુકેલ આ ફ્રીઝ મુકવાનો ઉદ્દેશ્ય એ છે કે, કોઈપણ વ્યક્તિના ઘરે જ્યારે જમવાનું કે અન્ય ખાવાની વસ્તુ વધે છે અને તે સારી ગુણવત્તાવાળી હોય તો તેને ફેંકવાની જગ્યાએ આ HAAPY ફ્રીઝમાં મુકવી. જેથી રસ્તે જનાર કોઈ પણ ભૂખ્યો વ્યક્તિ તેને જોઈને ભૂખ સંતોષવા ખાઈ શકે. જ્યારે વસ્તુ ફેંકવામાં જાય છે ત્યારે તેનો બગાડ જ થાય છે, તેના બદલે કોઈ વ્યક્તિના પેટમા જાય તો તેનો સાચો ઉપયોગ થાય અને કોઈને રાટ્વિ ભૂખ્યું ન સૂવું પડે.

આ ઉદ્દેશ્ય એટલો સફળ રહ્યો કે, રોજ 200-250 લોકો HAPPY ફ્રીઝમાં ખાવાની વસ્તુઓ મૂકી જાય છે અને જરૂરિયાત મંદ તેને લઈ પણ જાય છે. માત્ર શાંતિ ટાવરના રહીશો જ નહીં, પરંતુ આસપાસના અને અન્ય વિસ્તારના લોકો પણ હવે અહીં આવતા હોય છે અને HAPPY ફ્રીઝનો ઉપયોગ કરે છે. આ ફ્રીઝ અંગેનો મેસેજ પણ હવે લોકને વૉટસએપના માધ્યમથી મળવા લાગ્યો છે, એટલે હવે લોકો પણ અહીંયા વધુ આવવા લાગ્યા છે.સોસાયટીના રહીશો સાથેની વાતચીતમાં જણાવ્યું હતું કે, આ ફ્રીઝની કાળજી રાખવી તે તેમની જવાબદારી છે અને તે લોકો તે કરી રહ્યાં છે. જમવાનું મુક્યા ઉપરાંત રાતે ફ્રીઝને લોક કરવું અને તેની સાફ સફાઈ રાખવાની તમામ તકેદારી રાખવામાં આવે છે. લોકો અહીંયા તાજું અને ખાવાલાયક ખોરાક મૂકે અને વાસી ખોરાક ન મૂકે તેનું પણ ધ્યાન રાખવામાં આવે છે. આ ફ્રીઝ જો અમદાવાદના તમામ વિસ્તારમાં મુકવામાં આવે તો કોઈને પણ રાતે ભૂખ્યુ ન સુઈ જવું પડે તેવું સોસાયટીના રહીશોએ જણાવ્યું હતું.