રક્ષક જ ભક્ષક બન્યો, પોલિસકર્મીની દાદાગીરી આવી સામે

અમદાવાદના કૃષ્ણનગરમાં પોલીસ કર્મચારીની દાદાગીરી સામે આવી છે. જેમાં સોસાયટીના એક સિનિયર સિટીઝન પર હુમલો કરતા પોલીસકર્મી સહિત ચાર વ્યક્તિઓ વિરુદ્ધ ફરિયાદ નોધાઇ છે. જ્યારે અગાઉ કરેલી ફરિયાદની અદાવત રાખીને પોલીસ કર્મચારી અને તેના પરિવારે મિત્રોને બોલાવી આ હુમલો કર્યો હોવાનું સામે આવ્યું છે.

• કૃષ્ણનગરમાં પોલીસની દાદાગીરી સામે આવી
• અગાઉ કરેલી ફરિયાદને લઈને પોલીસકર્મીએ સિનિયર સિટીઝન પર હુમલો કર્યો
• મિત્ર ભાર્ગવ પટેલે સોસાયટીની ઓફીસમાં પ્રવેશ કરીને ધમકી આપતા ફરિયાદ નોંધાઈ

અમદાવાદ: કૃષ્ણનગર વિસ્તારમાં આવેલી મહાસુખનગર સોસાયટીમાં પોલીસ કર્મચારી અને તેના મિત્રો રીતસરની દાદાગીરી કરતા નજરે પડ્યા હતા. એટલું જ નહી એક સિનિયર સીટીઝન એક્ટિવા પર ઘરે પરત ફરતા તેમને અટકાવીને હુમલો કર્યો હતો. ત્યારે ઘટનાની વાત કરીએ તો કૃષ્ણનગર મહાસુખનગરમાં રહેતા 63 વર્ષીય કનકભાઈ શાહે અગાઉ પોલીસ કર્મચારી ભાવેશ રાવલ અને તેના મિત્ર ભાર્ગવ પટેલે સોસાયટીની ઓફીસમાં પ્રવેશ કરીને ધમકી આપતા ફરિયાદ નોંધાઈ હતી.

આ પણ વાંચો- રાજકોટમાંથી કાર ચોરી કરનારા આરોપી ઝડપાતા રાજસ્થાનના 2 પોલીસકર્મીની હત્યાનો ભેદ ઉકેલાયો

આરોપી ભાવેશ રાવલ ગાંધીનગરમાં CID ક્રાઇમના સીઆઈ સેલમાં ફરજ બજાવે છે

આ ફરિયાદની અદાવત રાખીને ભાવેશ રાવલ, ભાર્ગવ પટેલ અને તેના મિત્રો તેમજ પરિવાજનોએ લાકડા અને પાઇપોથી કનકભાઈ પર હુમલો કરતા તેઓ ગંભીર રીતે ઇજાગ્રસ્ત થયા હતા. હાલ તેમને સારવાર માટે ખાનગી હોસ્પિટલમાં ખસેડવામાં આવ્યા છે. જ્યારે આરોપી ભાવેશ રાવલ ગાંધીનગરમાં CID ક્રાઇમના સીઆઈ સેલમાં ફરજ બજાવે છે અને છેલ્લા 10 વર્ષથી મહાસુખનગર સોસાયટીમાં રહે છે.

મિત્ર ભાર્ગવ પટેલની સોસાયટીમાં દાદાગીરી હોવાનો આરોપ રહીશોએ લગાવ્યો છે

આરોપી અને તેના મિત્ર ભાર્ગવ પટેલની સોસાયટીમાં દાદાગીરી હોવાનો આરોપ રહીશોએ લગાવ્યો છે. જેમાં અગાઉ પણ માર્ચ મહિનામાં સોસાયટીના ચેરમેનનું ઇલેક્શન હતું, ત્યારે ભાર્ગવ પટેલ ઇલેક્શનમાં ઉભા હતા, પરંતુ ઇલેક્શન હારી જતા તેઓએ સોસાયટીના કમિટી મેમ્બર સાથે તકરાર અને દાદાગીરી શરૂ કરી હતી. સોસાયટીમાં પ્રવેશ ગેટ લગાવતા મે મહિનામાં ભાવેશ રાવલે કમિટી મેમ્બર કનક શાહ સાથે ઝઘડો કરીને ધમકી આપી હતી.

આ પણ વાંચો-બોમ્બની ખોટી અફવા ફેલાવનારા 2 આરોપીની ધરપકડ

ભાવેશ સામે ફરિયાદ પણ પોલીસ ચોપડે નોંધાઈ હતી

અગાઉ ભાવેશ સામે ફરિયાદ પણ પોલીસ ચોપડે નોંધાઈ હતી. આ ફરિયાદની અદાવત રાખીને કનકભાઈ પર ફરી હુમલો કરવામાં આવ્યો. એટલું જ નહીં આ બન્ને મિત્રોએ સોસાયટીના અનેક લોકોને માર માર્યો હોવાનો આક્ષેપ રહીશોએ કર્યો હતો. હાલમાં કૃષ્ણનગર પોલીસે ગુનો નોંધી વધુ તપાસ શરૂ કરી છે. સોસાયટીના રહીશો પોલીસ કર્મચારીની આવી દાદાગીરીથી પરેશાન છે. એક તરફ કાયદાનો રક્ષક કાયદો હાથમાં લઈને દાદાગીરી કરે છે, ત્યારે સોસાયટીના વિવાદ વચ્ચે ફરી પોલીસની છબી પર સવાલ ઉઠ્યા છે.