બ્રિટન સમક્ષ ઓક્સફોર્ડ યુનિવર્સિટી જાતિવાદનો મામલો જરુર પડ્યે ઉઠાવીશુંઃ વિદેશપ્રધાન એસ. જયશંકર

ઓક્સફોર્ડ વિશ્વવિદ્યાલયના જાતિવાદના વિવાદ મામલે વિદેશપ્રધાન ડૉ. એસ. જયશંકરે કહ્યું કે અમે ક્યારેય જાતિવાદ જેવી ઘટનાઓને વણજોઇ નહીં કરીએ. જયશંકરે સંસદના બંને ભવનોમાં સ્પષ્ટપણે જણાવ્યું હતું કે ભારત જરુર જણાશે તો બ્રિટન સમક્ષ આ મામલો ઉઠાવશે.

• ઓક્સફોર્ડ વિશ્વવિદ્યાલયના જાતિવાદનો વિવાદ
• ભારતીય મૂળની વિદ્યાર્થિની રશ્મિ સામંતની ટિપ્પણીના વિવાદનો મામલો
• જાતિવાદ મામલે જરુર પડશે તો ભારત બ્રિટન સમક્ષ અવાજ ઉઠાવશે

નવી દિલ્હીઃ સંસદના બંને ભવનને સંબોધિત કરતાં વિદેશપ્રધાન ડૉ. એસ. જયશંકરે જણાવ્યું હતું કે અમે ક્યારેય જાતિવાદ જેવી ઘટનાઓને વણજોઇ ન કરી શકીએ. ભારત મહાત્મા ગાંધીની ધરતી છે. જયશંકરે રાજ્યસભામાં પ્રશ્નકાળ દરમિયાન ઓક્સફોર્ડ વિશ્વવિદ્યાલયના જાતિવાદના મામલા વિશે મત વ્યક્ત કરતાં આમ જણાવ્યું હતું. ઓડિશાના ભાજપના સાંસદ અશ્વિની વૈષ્ણવે આ મુદ્દો ઉઠાવ્યો હતો.

ભારત ઘટનાની તપાસ કરાવશે

તેમણે જણાવ્યું કે આ એટલા માટે પણ જરુરી છે કેમ કે આ એવા દેશની ઘટના છે જ્યાં મોટી સંખ્યામાં પ્રવાસી ભારતીય રહે છે. બ્રિટન સાથે ભારતના મજબૂત સંબંધ છે. જરુર જણાશે તો આવા મામલાઓને ઉઠાવવામાં આવશે. જયશંકરે વધુમાં જણાવ્યું કે અમે આ ઘટનાની ઊંડાણપૂર્વક જાંચ કરીશું. જરુર પડશે તો તેના વિરુદ્ધ અવાજ ઉઠાવીશું. એટલું જ નહીં, ભારત હંમેશા જાતિવાદ અને અસહિષ્ણુતાના અન્ય પ્રકારો સામેની લડાઈમાં સફળ થશે.

આ પણ વાંચોઃ સરહદ પારથી થઇ રહેલા આતંકવાદને દુનિયા સમક્ષ લાવ્યું છે ભારત : વિદેશપ્રધાન જયશંકર

શું છે મામલો

ઓક્સફોર્ડ વિશ્વવિદ્યાલયમાં ભારતીય મૂળની વિદ્યાર્થિનીની વિદ્યાર્થી સંઘના અધ્યક્ષ પદે પસંદગી કરવામાં આવી હતી. જેણે કરેલી એક ટિપ્પણી પર વિવાદ થયો હતો. તે બાદ વિદ્યાર્થિનીએ રાજીનામું આપી દીધું હતું. રશ્મિ સામંતની કેટલીક સોશિયલ મીડિયા પર કરેલી જૂની પોસ્ટ સામે આવી હતી, જેને કેટલાક વિદ્યાર્થીઓએે 'જાતિવાદી' અને 'અસંવેદનશીલ' બતાવી છે.