ઔરૈયાઃ ઉત્તર પ્રદેશ વિધાનસભા ચૂંટણી (UP Assembly Elections 2022) પહેલા ભાજપે કોંગ્રેસ અને સમાજવાદી પાર્ટીને મોટો ઝટકો આપ્યો છે. હવે મુલાયમ સિંહ યાદવના સાળા પ્રમોદ ગુપ્તા (Pramod gupta joins BJP) અને કોંગ્રેસની પોસ્ટર ગર્લ પ્રિયંકા મૌર્ય આજે ભાજપમાં જોડાઈ (Priyanka Maurya joins BJP ) ગયા છે. આ પહેલા મુલાયમ સિંહ યાદવની પુત્રવધૂ અપર્ણા યાદવ ભાજપમાં જોડાઈ હતી. ભાજપમાં જોડાતા પહેલા પ્રમોદ ગુપ્તાએ કહ્યું હતું કે અખિલેશ યાદવે મુલાયમ સિંહ યાદવને બંદી બનાવી લીધા છે. આજે પાર્ટીમાં તેમની સ્થિતિ ખરાબ છે. ગુપ્તાએ એમ પણ કહ્યું કે, આજે SPમાં ગુનેગારો અને જુગારીઓને લાવવામાં આવી રહ્યા છે.
પોસ્ટર ગર્લ બનેલી પ્રિયંકા મૌર્ય
અહીં પાર્ટીની પોસ્ટર ગર્લ બનેલી પ્રિયંકા મૌર્યએ ઉત્તર પ્રદેશમાં પોતાનો આધાર વધારવાની કોશિશ કરી રહેલી કોંગ્રેસને મોટો ઝટકો આપ્યો છે. કૉંગ્રેસના અભિયાન 'લડકી હૂં, લડ સક્તિ હૂં'ની પોસ્ટર ગર્લ પ્રિયંકા મૌર્ય ભાજપમાં જોડાઈ ગઈ છે. તેમણે આરોપ લગાવ્યો હતો કે પ્રિયંકા ગાંધીના સેક્રેટરીએ ટિકિટ માટે તેમની પાસેથી પૈસાની માંગણી કરી હતી. તમને જણાવી દઈએ કે, ઉત્તર પ્રદેશ કોંગ્રેસે ગત દિવસોમાં પોતાના મહિલા મેનિફેસ્ટો 'શક્તિ વિધાન'ના કવર પેજ પર ડૉ. પ્રિયંકા મૌર્યની તસવીર છાપી હતી. તેનું સૂત્ર છે- 'લડકી હૂં, લડ સક્તિ હૂં', ત્યારથી પ્રિયંકા મૌર્ય ચર્ચામાં આવી હતી, પરંતુ થોડા જ સમયમાં તેમનો કોંગ્રેસથી મોહભંગ થઈ ગયો છે.
પ્રમોદ ગુપ્તા કેમ ગુસ્સે થયા?
પ્રમોદ ગુપ્તા મુલાયમની બીજી પત્ની સાધના ગુપ્તાના સંબંધી છે. 2007માં, પ્રમોદ કુમાર ગુપ્તા સમાજવાદી પાર્ટી (Samajvadi party up) તરફથી વિધુના વિધાનસભાથી ધારાસભ્ય તરીકે ચૂંટાયા હતા. વિધુના સીટીંગ ધારાસભ્ય વિનય શાક્ય તાજેતરમાં જ SPમાં જોડાયા છે, જેના પર પ્રમોદ ગુપ્તાએ સવાલ ઉઠાવ્યા હતા. પ્રમોદ ગુપ્તા મુલાયમ સિંહ યાદવ તેમજ શિવપાલ યાદલના ખૂબ નજીક છે. પ્રમોદ ગુપ્તાએ એવો પણ આક્ષેપ કર્યો હતો કે અખિલેશ મુલાયમ સાથે સારું વર્તન નથી કરી રહ્યા. એવું કહેવામાં આવ્યું હતું કે અખિલેશ મુલાયમને પોતાની સાથે ઓફિસમાં લઈ જઈ અને તેમની સાથે લઈ જશે. એવો દાવો કરવામાં આવ્યો હતો કે મુલાયમનું માઈક પણ છીનવી લેવામાં આવ્યું હતું.