Published : Nov 29, 2023, 9:36 PM IST
નવી દિલ્હી:સુપ્રીમ કોર્ટે બુધવારે 2020ના દિલ્હી રમખાણો પાછળના કાવતરામાં કથિત સંડોવણી અંગે આતંકવાદ વિરોધી કાયદા UAPA હેઠળ દાખલ કેસમાં ભૂતપૂર્વ JNU વિદ્યાર્થી અને કાર્યકર્તા ઉમર ખાલિદની જામીન અરજી પર સુનાવણી 10 જાન્યુઆરી સુધી મુલતવી રાખી છે.
જસ્ટિસ બેલા એમ ત્રિવેદી અને સતીશ ચંદ્ર શર્માની બેન્ચે ખાલિદનું પ્રતિનિધિત્વ કરતા વરિષ્ઠ વકીલ કપિલ સિબ્બલ અને એડિશનલ સોલિસિટર જનરલ એસવી રાજુ ઉપલબ્ધ ન હોવાથી મામલો સ્થગિત કર્યો હતો. ખાલિદની અરજી UAPA ની વિવિધ જોગવાઈઓને પડકારતી અરજીઓની બેચ સાથે સૂચિબદ્ધ હતી.
ખંડપીઠે કહ્યું કે આ મામલે દલીલ કરવા જઈ રહેલા વરિષ્ઠ વકીલોની ઉપલબ્ધતા ન હોવાને કારણે અપીલકર્તા અને ભારતીય સંઘ વતી સંયુક્ત વિનંતી કરવામાં આવી છે. ખંડપીઠે આ મામલાની વધુ સુનાવણી 10 જાન્યુઆરીના રોજ નક્કી કરી હતી અને નિર્દેશ આપ્યો હતો કે આ દરમિયાન આ મામલે દલીલો પૂર્ણ કરવામાં આવે.
સુપ્રીમ કોર્ટના ન્યાયાધીશ જસ્ટિસ પ્રશાંત કુમાર મિશ્રાએ 9 ઓગસ્ટે ખાલિદની અરજી પર સુનાવણી કરવાથી પોતાને અલગ કરી લીધા હતા. દિલ્હી પોલીસે સપ્ટેમ્બર 2020 માં ખાલિદની ધરપકડ કરી હતી અને તેના પર ગુનાહિત કાવતરું, રમખાણો, ગેરકાયદેસર એસેમ્બલી તેમજ ગેરકાનૂની પ્રવૃત્તિઓ (નિવારણ) અધિનિયમ (UAPA) ની કેટલીક કલમોનો આરોપ મૂક્યો હતો.
ખાલિદે 18 ઑક્ટોબર, 2022ના રોજ આપેલા દિલ્હી હાઈકોર્ટના આદેશને પડકારતી સુપ્રીમ કોર્ટમાં દાખલ કરી હતી. આ મામલે તેની જામીન અરજી ફગાવી દીધી હતી. હાઈકોર્ટે કહ્યું હતું કે તે અન્ય સહ-આરોપીઓ સાથે સતત સંપર્કમાં છે અને તેની સામેના આરોપો પ્રથમ દૃષ્ટિએ સાચા છે.
