રાયપુર :છત્તીસગઢ વિધાનસભા ચૂંટણીની તૈયારીઓ લગભગ પૂર્ણ થઈ ગઈ છે. ચૂંટણી પંચના આંકડા મુજબ છત્તીસગઢમાં કુલ 1 કરોડ 96 લાખ મતદારો છે. 100 વર્ષથી ઉપરની ઉંમરના 2948 મતદારો છે. અને 1 લાખ 47 હજાર દિવ્યાંગ મતદારો છે. ચૂંટણી પંચે આજે આ અંગે માહિતી આપી હતી.
મહિલા મતદારોની સંખ્યા : રાયપુરમાં મુખ્ય ચૂંટણી કમિશનર રાજીવ કુમારે જણાવ્યું કે, છત્તીસગઢમાં 98.2 લાખ પુરુષ મતદારો અને 98.5 લાખ મહિલા મતદારો છે. એટલે કે પુરૂષો કરતા મહિલા મતદારોની સંખ્યા વધુ છે. ટ્રાન્સજેન્ડર 762 છે. 80 વર્ષથી વધુ વયના મતદારોની સંખ્યા 2.02 લાખ છે. પ્રથમ વખત મત આપતા મતદારોની સંખ્યા 4 લાખ 33 હજાર છે.
મતદાન મથકોની સંખ્યા : રાજ્યમાં કુલ મતદાન મથકોની સંખ્યા 24109 છે. જેમાં સરેરાશ 815 જેટલા મતદારો છે. શહેરી વિસ્તારમાં 4853 મતદાન મથકો અને ગ્રામ્ય વિસ્તારમાં 19256 મતદાન મથકો છે. યુવા સંચાલિત મતદાન મથકોની સંખ્યા 90 છે. મહિલાઓ દ્વારા સંચાલિત બુથની સંખ્યા 900 છે. આ બૂથમાં સમગ્ર બુથનું કામ મહિલાઓ દ્વારા કરવામાં આવે છે. બુથની સુરક્ષા પણ મહિલાઓ જ કરે છે. વિકલાંગ કર્મચારીઓ 90 મતદાન મથકોનું સંચાલન કરશે. 50 ટકા મતદાન મથકોનું વેબ કાસ્ટિંગ થશે. તમામ મતદાન મથકો પર દિવ્યાંગો માટે શૌચાલય, પીવાનું પાણી, વ્હીલચેર, હેલ્પ ડેસ્ક, રેમ્પ ઉપલબ્ધ રહેશે.
ઘરેથી મતદાન કરી શકાશે :મુખ્ય ચૂંટણી કમિશનરે જણાવ્યું કે, 80 વર્ષથી વધુ ઉંમરના મતદારો ઘરેથી જ મતદાન કરી શકે છે. પ્રથમ વખત આ સુવિધા છત્તીસગઢમાં શરૂ કરવામાં આવી રહી છે. નોમિનેશન પછી 5 દિવસમાં ફોર્મ 12D ભરવાનું રહેશે, ત્યારબાદ ચૂંટણી ટીમ તેમના ઘરે જઈને મતદાન કરાવશે. આ સુવિધા દિવ્યાંગોને પણ મળશે. જેમની વિકલાંગતા 40 ટકાથી વધુ છે તેમને ઘરેથી મતદાન કરવાનો અધિકાર મળશે.
એક મતનું મૂલ્ય : છત્તીસગઢમાં ઘણી જગ્યા એવી છે જે દૂરના વિસ્તારોમાં છે. 112 બુથ એવા છે જ્યાં મોટર વાહનો જઈ શકતા નથી. ભરતપુર સોનહટ કોરિયામાં મતદાન મથક માટે 12 મતદારોની નોંધણી છે. અહીં ટીમ ગાઢ જંગલો અને નદીઓ પાર કરીને 80 કિલોમીટરનું અંતર કાપ્યા બાદ ત્યાં જશે. મતદાન મથક 143માં માત્ર 5 મતદારો છે. વિતરણ કેન્દ્રથી તેનું અંતર 120 કિલોમીટર છે. મતદાન કર્મચારીઓએ 15 કિલોમીટરની મુસાફરી કરવી પડશે. 3 કિલોમીટરનું અંતર પગપાળા જ કાપવાનું રહેશે. બુથ નંબર 162 કે જે ગુરુ ઘાસીદાસ નેશનલ રિઝર્વ ફોરેસ્ટ હેઠળ છે તેમાં 23 મતદારો છે. ઓડિશા-છત્તીસગઢ સરહદ પર તુલસી ડોંગરી ટેકરીઓ પર સ્થિત ચાંદમેટામાં પ્રથમ વખત મતદાન મથક નંબર 246 સ્થાપિત કરવામાં આવ્યું છે. મુખ્ય ચૂંટણી કમિશનરે કહ્યું કે,
એક વ્યક્તિનો મત ખૂબ જ મૂલ્યવાન છે. એટલા માટે મતદાન કર્મચારીઓ સખત મહેનત કરશે અને દરેક દૂરના વિસ્તારોમાં જશે. ચૂંટણી દરમિયાન મફત અને અન્ય વસ્તુઓનો દુરુપયોગ થવો જોઈએ નહીં. દરેકને અપીલ કરીએ છીએ કે દરેકે મતદાન કરવા આવવું જોઈએ. -- રાજીવ કુમાર (મુખ્ય ચૂંટણી કમિશનર, ચૂંટણી પંચ)
મફતખોરો પર નજર :મુખ્ય ચૂંટણી કમિશનરે કહ્યું કે, ચૂંટણી દરમિયાન દારૂ, રોકડ અને અન્ય વસ્તુઓના વિતરણને રોકવા માટે સામાન્ય નાગરિકોની મદદની જરૂર છે. ચૂંટણી પંચે આ માટે cVIGIL એપ બનાવી છે. આ એપ્લિકેશન દ્વારા કોઈપણ પોતાની ફરિયાદ કરી શકે છે. જો કોઈ સમસ્યા હોય તો તમે ફોટો, ટેક્સ્ટ અથવા બાઈટ લઈને તમારી ફરિયાદ મોકલી શકો છો. આ વિશે માહિતી મળ્યા પછી તંત્ર જાતે ત્યાંનું સ્થાન જાણી અને 100 મિનિટમાં ટીમ ત્યાં પહોંચીને તપાસ કરશે. આમાં પણ ગુપ્તતા જાળવવામાં આવશે. મતદારો માટે વોટર હેલ્પલાઇન એપ બનાવવામાં આવી છે. જેમાં મતદારો તમામ પ્રકારની માહિતી મેળવી શકે છે.
ઉમેદવારો માટે સુવિધા પોર્ટલ : ઉમેદવારો અને રાજકીય પક્ષો માટે સુવિધા પોર્ટલ શરૂ કરવામાં આવ્યું છે. જો કોઈ ઉમેદવારને કોઈ સુવિધા જોઈતી હોય તો તે ઓનલાઈન સુવિધા પોર્ટલ પર અરજી કરી શકે છે. જે લોકો પહેલા આવશે તેમને પહેલા પરવાનગી આપવામાં આવશે. સુવિધા પોર્ટલ પરથી વાહન પરમિશન, ફીલ્ડ પરમિશન અને ગ્રાઉન્ડ પરમીશન સહિત અન્ય દરેક પરમિશન લઈ શકાશે.
વૃદ્ધ અને વિકલાંગ માટે સુવિધા : રાજ્યના વરિષ્ઠ અને વિકલાંગ મતદારોની સુવિધા માટે મતદાન મથક પર તમામ વ્યવસ્થા કરવામાં આવશે. વૃદ્ધો અને દિવ્યાંગજનોને મદદ કરવા માટે રાજ્યના તમામ બૂથ પર મતદાતા મિતાન ઉપલબ્ધ રહેશે. દિવ્યાંગ મતદારોને મતદાન મથકમાં કોઈપણ પ્રકારની સુવિધાની જરૂર હોય તો તેઓ સક્ષમ એપ્લિકેશન દ્વારા કોઈપણ પ્રકારની સુવિધાની માંગ કરી શકે છે. જેમાં વ્હીલચેરની સાથે આસિસ્ટન્ટ પણ ઉપલબ્ધ રહેશે.
સુરક્ષા વ્યવસ્થા :છત્તીસગઢની 105 ચેકપોસ્ટના સમારકામ માટે સૂચનાઓ: છત્તીસગઢની સરહદ 7 રાજ્યો સાથે વહેંચાયેલ છે. જેમાં કુલ 105 ચેક પોસ્ટ છે. પોલીસની 23, આબકારી વિભાગમાં 31, વાહનવ્યવહાર વિભાગમાં 16, રાજ્યના વન વિભાગમાં 35 ચેકપોસ્ટ છે. CEC જણાવ્યું કે, ચેકપોસ્ટની મરામત કરવા અને સીસીટીવી કેમેરા સાથે અસરકારક કાર્યવાહી કરવા કડક સૂચના આપવામાં આવી છે. તમામ એજન્સીઓએ એકબીજા સાથે સંકલન કરીને કામ કરવા કહેવામાં આવ્યું છે. કેન્દ્રીય એજન્સી અને રાજ્યની એજન્સીને માહિતીની આપ-લે કરી દારૂ, રોકડ ફ્રીબી અને ડ્રગ્સ જેવી વસ્તુઓને સંપૂર્ણપણે રોકવા સૂચના આપવામાં આવી છે. ચેક પોસ્ટમાં સીસીટીવીથી મોનીટરીંગ શરૂ કરવામાં આવશે.
નાણાકીય વ્યવહાર પર વિશેષ નજર : મુખ્ય ચૂંટણી કમિશનરે કહ્યું કે, SLBC, RBIને ચૂંટણી દરમિયાન કેશ વાનની સંપૂર્ણ વિગતો પ્રદાન કરવા નિર્દેશ આપવામાં આવ્યો છે. કોઈ પણ સંજોગોમાં વિગતો વિના રોકડની કોઈ હિલચાલ થશે નહીં. એટીએમમાં રોકડ જમા કરાવવા માટે ઉપયોગમાં લેવાતા વાહનો નિર્ધારિત સમય સુધી જ આવી શકશે અને જઈ શકશે. ઓફિસનો સમય અને નિયત સમયપત્રક સિવાય અન્ય કોઈ હિલચાલ થશે નહીં.
સોશિયલ મીડિયા સેલ : ચૂંટણી પંચ દ્વારા સોશિયલ મીડિયા સેલ બનાવવામાં આવશે. જો કોઈ ફેક ન્યૂઝ કે ફેક કન્ટેન્ટ બનાવશે તો તેના પર ત્વરીત કાર્યવાહી કરવામાં આવશે. જો તે સંપૂર્ણપણે ફેક કન્ટેન્ટ હશે તો તે ફેક કન્ટેન્ટ કોણે પોસ્ટ કર્યું છે, તે શોધવાનો પણ પ્રયાસ કરવામાં આવશે. તેની સામે કાયદેસરની કાર્યવાહી પણ કરવામાં આવશે. કોઈપણ સોશિયલ મીડિયા દ્વારા ચૂંટણી પ્રક્રિયાને બગાડવાનો પ્રયાસ થવો જોઈએ નહીં અને જો કોઈ આવું કરશે તો તેની સામે કડક કાર્યવાહી કરવામાં આવશે.
રાજકીય પ્રચાર કામગીરી : ચૂંટણી પંચે પણ રાજકીય પક્ષોને પર્યાવરણને સ્વચ્છ બનાવવા માટે પ્લાસ્ટિકનો વધુ ઉપયોગ ન કરવા અપીલ કરી છે. પર્યાવરણ ફ્રેન્ડલી સિસ્ટમ જાળવવાની ખાસ કાળજી રાખવા જણાવ્યું હતું. ઉપરાંત રાજકીય પક્ષે પ્રચાર સામગ્રી મોકલવા માટે વાહનોની સંખ્યા વધારવાની માંગ કરી હતી. તેમાં એકથી ચાર વાહનો સુધીનો વધારો કરવામાં આવ્યો છે. ચાર વાહનોને તમામ રાષ્ટ્રીય પક્ષો અને પ્રાદેશિક પક્ષોને પ્રચાર સામગ્રી મોકલવાની મંજૂરી આપવામાં આવશે.
મતદાર જાગૃતિ અભિયાન : મુખ્ય ચૂંટણી કમિશનરે કહ્યું કે, પાંચ રાજ્યોમાં ચૂંટણી યોજાવાની છે. જેમાં અમારી પ્રથમ મુલાકાત છત્તીસગઢ રાજ્યમાં કરવામાં આવી હતી. અમે સતત મતદારોની ટકાવારી વધારી રહ્યા છીએ. જે જિલ્લાઓમાં મતદાનની ટકાવારી ઓછી છે, ત્યાં બૂથ સ્પેશિયલ પ્રોગ્રામ ચલાવવા માટે કલેક્ટરને ખાસ કાર્યક્રમનું આયોજન કરવા કહેવામાં આવ્યું છે. જે વિધાનસભા મતવિસ્તારોમાં મતદાનની ટકાવારી ઓછી છે, ત્યાં ખાસ કાર્યક્રમ ચલાવવામાં આવશે તેમ જણાવ્યું છે.
- Madhyapardesh Assembly Election: ગુજરાતના 48 ધારાસભ્યો મધ્યપ્રદેશની 48 વિધાનસભા બેઠકોનું કરશે રીયાલિટી ચેક
- કૉંગ્રેસના આ દિગ્ગજ નેતા આજથી ગુજરાત પ્રવાસે
