International Crime News : ખાલિસ્તાની સમર્થક હરદીપ સિંહ નિજ્જરની કેનેડામાં ગોળી મારી હત્યા

ભારતે કેનેડિયન સત્તાધિશોને પંજાબમાં આતંકવાદી પ્રવૃત્તિઓમાં કથિત સંડોવણી બદલ નિજ્જર વિરુદ્ધ કાર્યવાહી કરવા જણાવ્યું હતું. ગયા વર્ષે, પંજાબ પોલીસે નિજ્જરના પ્રત્યાર્પણની માંગ કરી હતી. કારણ કે, તે રાજ્યમાં આતંકવાદને પુનર્જીવિત કરવાના કૃત્યો સંબંધિત કેસોમાં વોન્ટેડ હતો.

ચંદીગઢ : વોન્ટેડ આતંકવાદી ખાલિસ્તાન તરફી નેતા હરદીપ સિંહ નિજ્જર કેનેડામાં રહે છે. જેની બ્રિટિશ કોલંબિયા પ્રાંતના સરે શહેરમાં ગુરુ નાનક શીખ ગુરુદ્વારાના પાર્કિંગમાં બે અજાણ્યા બંદૂકધારીઓએ ગોળી મારીને હત્યા કરી હતી. તેઓ ગુરુ નાનક શીખ ગુરુદ્વારાના પ્રમુખ હતા. જલંધરના એક ગામનો રહેવાસી નિજ્જર ભારતમાં પ્રતિબંધિત અલગતાવાદી સંગઠન શીખ ફોર જસ્ટિસ (SFJ) સાથે સંકળાયેલો હતો. તેણે બ્રામ્પટન શહેરમાં ખાલિસ્તાન જનમત મેળવવામાં મહત્વની ભૂમિકા ભજવી હતી.

નિજ્જર વિરુદ્ધ ચાર્જશીટ :નેશનલ ઇન્વેસ્ટિગેશન એજન્સી (NIA) એ ગયા વર્ષે 31 જાન્યુઆરી, 2021 ના ​​રોજ જલંધરમાં હિન્દુ પૂજારી કમલદીપ શર્માની હત્યાના કાવતરાના સંબંધમાં નિજ્જર સહિત ચાર લોકો વિરુદ્ધ ચાર્જશીટ દાખલ કરી હતી. આ કેસમાં અન્ય ત્રણ ચાર્જશીટમાં કમલજીત શર્મા અને રામ સિંહનો સમાવેશ થાય છે. જેમણે નિજ્જર અને તેના સહયોગી અર્શદીપ સિંહ ઉર્ફે પ્રભાના નિર્દેશ પર પૂજારી પર હુમલો કર્યો હતો. NIA ના જણાવ્યા અનુસાર, કેનેડામાં રહેતા આરોપી અર્શદીપ અને નિજ્જરે એક હિન્દુ પૂજારીની હત્યા કરીને પંજાબમાં શાંતિ અને સાંપ્રદાયિક સૌહાર્દને ભંગ કરવાનું કાવતરું ઘડ્યું હતું.

નિજ્જરના પ્રત્યાર્પણની માંગ : ભારતે કેનેડિયન સત્તાધિશોને પંજાબમાં આતંકવાદી પ્રવૃત્તિઓમાં કથિત સંડોવણી બદલ નિજ્જર વિરુદ્ધ કાર્યવાહી કરવા જણાવ્યું હતું. ગયા વર્ષે, પંજાબ પોલીસે નિજ્જરના પ્રત્યાર્પણની માંગ કરી હતી. કારણ કે તે રાજ્યમાં આતંકવાદને પુનર્જીવિત કરવાના કૃત્યો સંબંધિત કેસોમાં વોન્ટેડ હતો. 23 જાન્યુઆરી, 2015ના રોજ જારી કરાયેલા લુકઆઉટ સર્ક્યુલર અને 14 માર્ચ, 2016ના રોજ જારી કરાયેલી રેડ કોર્નર નોટિસના અનુસંધાનમાં પોલીસ તેના પ્રત્યાર્પણની માંગ કરી રહી હતી.

વ્યક્તિગત આતંકવાદી જાહેર :જુલાઈ 2020 માં કેન્દ્રીય ગૃહ મંત્રાલય (MHA) દ્વારા નિજ્જરને 'વ્યક્તિગત આતંકવાદી' તરીકે નિયુક્ત કરવામાં આવ્યો હતો. NIAએ જણાવ્યું હતું કે, નિજ્જર ભારતમાં આતંક ફેલાવવા માટે ખાલિસ્તાન તરફી આતંકવાદી મોડ્યુલની ભરતી, તાલીમ, ધિરાણ અને સંચાલનમાં સક્રિય રીતે સામેલ હતો. તે સોશિયલ મીડિયા પ્લેટફોર્મ દ્વારા ભડકાઉ અને નફરતભર્યા ભાષણો આપવામાં સામેલ હતો. અન્ય એક કેસમાં NIAએ નિજ્જરની પંજાબમાં તેના ગામમાં આવેલી મિલકત જપ્ત કરી હતી.

રૂ. 10 લાખનું ઈનામ : ખાલિસ્તાન તરફી સંગઠન ખાલિસ્તાન ટાઈગર ફોર્સના કેનેડા સ્થિત ચીફ નિજ્જર સામે રૂ. 10 લાખનું રોકડ ઈનામ જાહેર કરવામાં આવ્યું હતું. નિજ્જર પર ગયા વર્ષે રિપુદમન સિંહ મલિકની હત્યાનો આરોપ હતો, જેઓ સરેમાં 1985માં એર ઈન્ડિયાના આતંકવાદી બોમ્બ વિસ્ફોટના કેસમાં નિર્દોષ છૂટ્યા હતા.