અફઘાનિસ્તાનની સ્થિતિ પર ભારતની બાજ નજર, વડાપ્રધાનની સૂચના પર બેઠકોનો દોર ચાલુ

20 વર્ષ બાદ અફઘાનિસ્તાનમાંથી અમેરિકી દળોને પાછા ખેંચવાના પગલે એક ઉચ્ચ સ્તરીય સમૂહ ભારતની તાત્કાલિક પ્રાથમિકતાઓ પર ધ્યાન કેન્દ્રિત કરી રહ્યું છે.

• અફઘાનિસ્તાનમાં અમેરિકાની 20 વર્ષથી ચાલતી લડાઈ પૂર્ણ થઈ
• વડાપ્રધાનની સૂચનાથી એક ઉચ્ચ સ્તરીય સમૂહ રાખી રહ્યું છે નજર
• વડાપ્રધાને સમૂહને ભારતની પ્રાથમિક્તાએ પર ધ્યાન આપવા નિર્દેશ આપ્યા

નવી દિલ્હી: વિદેશ પ્રધાન એસ જયશંકર, રાષ્ટ્રીય સુરક્ષા સલાહકાર (NSA) અજીત ડોભાલ અને અન્ય ઘણા વરિષ્ઠ અધિકારીઓનો ઉચ્ચ સ્તરનો સમૂહ 20 વર્ષ પછી અફઘાનિસ્તાનમાંથી અમેરિકી દળોને હટાવવાને ધ્યાનમાં રાખીને ભારતની તાત્કાલિક પ્રાથમિકતાઓ પર ધ્યાન કેન્દ્રિત કરી રહ્યો છે.

ફસાયેલા ભારતીયોની સલામત વાપસી એ પ્રથમ પ્રાથમિકતા

સત્તાવાર સૂત્રોએ મંગળવારે જણાવ્યું હતું કે, વડાપ્રધાન નરેન્દ્ર મોદીની સૂચના પર છેલ્લા કેટલાક દિવસોથી આ ઉચ્ચ સ્તરીય સમૂહની નિયમિત બેઠકો યોજાઈ રહી છે. ભારતની તાત્કાલિક પ્રાથમિકતાઓ અફઘાનિસ્તાનમાં હજુ પણ ફસાયેલા ભારતીયોની સલામત વાપસી છે. ભારતને ટેકો આપનારા અફઘાન નાગરિકોને પરત લાવવા અને ભારત વિરુદ્ધ આતંકવાદ માટે અફઘાન જમીનનો ઉપયોગ ન થાય તેની ખાતરી કરવી એ અન્ય પ્રાથમિક્તાઓ છે.

ભારતની તાત્કાલિક પ્રાથમિકતાઓ પર ધ્યાન કેન્દ્રિત કરવાનો નિર્દેશ

એક સૂત્રએ જણાવ્યું હતું કે, “અફઘાનિસ્તાનની વણસતી પરિસ્થિતિને ધ્યાનમાં રાખીને વડાપ્રધાન મોદીએ તાજેતરમાં એક ઉચ્ચ સ્તરીય સમૂહને ભારતની તાત્કાલિક પ્રાથમિકતાઓ પર ધ્યાન કેન્દ્રિત કરવાનો નિર્દેશ કર્યો હતો. આ સમૂહમાં વિદેશ પ્રધાન, રાષ્ટ્રીય સુરક્ષા સલાહકાર અને વરિષ્ઠ અધિકારીઓ શામેલ છે.

UNSCના ઠરાવ સહિત આંતરરાષ્ટ્રીય પ્રતિભાવો પર નજર

સૂત્રોએ વધુમાં જણાવ્યું હતું કે, "અફઘાનિસ્તાનની ધરતીનો ભારત સામે આતંકવાદ માટે ઉપયોગ ન થાય તેની ખાતરી કરવા અને ફસાયેલા ભારતીયોની સલામત પરત સુનિશ્ચિત કરવા માટે અને અફઘાન નાગરિકો (ખાસ કરીને લઘુમતીઓ) ની ભારત યાત્રા સંબંધિત મુદ્દાઓ તપાસવામાં આવી રહ્યા છે." સૂત્રોએ એમ પણ કહ્યું કે, આ સમૂહ અફઘાનિસ્તાનની જમીનની સ્થિતિ અને સંયુક્ત રાષ્ટ્ર સુરક્ષા પરિષદ (UNSC) દ્વારા પસાર કરાયેલા ઠરાવ સહિત આંતરરાષ્ટ્રીય પ્રતિભાવો પર નજર રાખી રહ્યું છે.