મહુઆ મોઇત્રા પર લોકસભાની એથિક્સ કમિટિનો રિપોર્ટ આજે રજૂ થવાની અપેક્ષા

કેશ ફોર ક્વેરી કેસમાં લોકસભાની એથિક્સ કમિટી આજે રિપોર્ટ રજૂ કરી શકે છે. હવે જોવાનું એ છે કે મહુઆ મોઇત્રાનું નસીબ તેની તરફેણ કરશે કે નહીં.

નવી દિલ્હી : 'કેશ ફોર ક્વેરી'ના કેસમાં તૃણમૂલ કોંગ્રેસના સાંસદ મહુઆ મોઇત્રાને લોકસભામાં હાંકી કાઢવાની ભલામણ કરતી એથિક્સ કમિટિનો રિપોર્ટ શુક્રવારે નીચલા ગૃહમાં રજૂ કરવામાં આવે તેવી શક્યતા છે. સંસદના સૂત્રોએ આ માહિતી આપી હતી. અગાઉ આ અહેવાલ 4 ડિસેમ્બરે લોકસભામાં રજૂ થનાર ગૃહના કાર્યસૂચિમાં સૂચિબદ્ધ હતો. કેટલાક વિપક્ષી સભ્યોએ ભાર મૂક્યો છે કે મહુઆ મોઇત્રાને હાંકી કાઢવા અંગે નિર્ણય લેવામાં આવે તે પહેલાં સમિતિની ભલામણો પર ગૃહમાં વિગતવાર ચર્ચા થવી જોઈએ.

મહુઆ મોઈત્રાની મુશ્કેલીમાં થશે વધારો : બહુજન સમાજ પાર્ટી (BSP)ના સાંસદ દાનિશ અલીએ ગુરુવારે પત્રકારોને કહ્યું, 'જો રિપોર્ટ રજૂ કરવામાં આવશે તો અમે વિગતવાર ચર્ચાનો આગ્રહ રાખીશું. રિપોર્ટનો ડ્રાફ્ટ માત્ર અઢી મિનિટમાં સ્વીકારી લેવામાં આવ્યો હતો. ભાજપના સાંસદ વિનોદ કુમાર સોનકરની આગેવાની હેઠળની એથિક્સ કમિટીએ 9 નવેમ્બરે તેની બેઠકમાં 'પૈસા લેવા અને ગૃહમાં પ્રશ્નો પૂછવાના' આરોપમાં મોઇત્રાને લોકસભામાંથી હાંકી કાઢવાની ભલામણ કરતો અહેવાલ સ્વીકાર્યો હતો.

કેશ ફોર ક્વેરી કેસ : સમિતિના છ સભ્યોએ અહેવાલની તરફેણમાં મતદાન કર્યું હતું. તેમાં કોંગ્રેસના સસ્પેન્ડેડ સાંસદ પ્રનીત કૌરનો પણ સમાવેશ થાય છે. સમિતિના ચાર વિપક્ષી સભ્યોએ અહેવાલ પર અસંમતિ દર્શાવી હતી. વિપક્ષી સભ્યોએ અહેવાલને 'ફિક્સ્ડ મેચ' ગણાવ્યો હતો અને કહ્યું હતું કે ભાજપના સાંસદ નિશિકાંત દુબેની ફરિયાદના સમર્થનમાં 'પુરાવાનો ટુકડો' પણ નથી, જેને સમિતિ દ્વારા ધ્યાનમાં લેવામાં આવી હતી. જો ગૃહ સમિતિની ભલામણની તરફેણમાં મતદાન કરે છે, તો મોઇત્રાને ગૃહમાંથી બરતરફ કરી શકાય છે.