હૌજ કાજી અથડામણ: હિન્દુ-મુસ્લિમના એકતાના સ્લોગન સાથે વિવાદનો સંકેલો

નવી દિલ્હી: દિલ્હીમાં આવેલા હૌજ કાજીમાં સ્કૂટી ઉભી રાખવાને લઈને બે સમુદાય વચ્ચે અથડામણ થઇ હતી. આ સાથે જ બે સમુદાય વચ્ચેનો તણાવ હિંદૂ-મુસ્લિમ એકતા જિંદાબાદના નારા સાથે પૂર્ણ થયો હતો. બંન્ને સમુદાયોના લોકોએ રસ્તાઓ પર હિંદૂ-મુસ્લિમ એકતા જિંદાબાદના નારા લગાવીને એક બીજાને ભેટી અને પરસ્પર ભાઈચારા, અમન અને શાંતિનો સંદેશો આપ્યો હતો.

હૌજ કાજીના સ્થાનીય લોકો ઘણા સમયથી પ્રયત્નોમાં લાગ્યા હતા કે, વિસ્તારમાં તણાવ જલ્દીથી દૂર કરવામાં આવે. આ પરિસ્થિતિને લઇને વિસ્તારમાં પોલીસ અને ફોર્સ તૈનાત કરવામાં આવી હતી. આ સાથે દિલ્હી પોલીસ ડ્રોન કેમરાથી વિસ્તારમાં દેખરેખ રાખી રહ્યાં હતાં.

હૌજ કાજીમાં લાંબા સમયથી હિંદૂ-મુસ્લિમ હળીમળીને રહેતા આવ્યા છે. ક્યારેક આ પ્રકારની ઘટના વિસ્તારમાં જોવા મળી હતી. પરંતુ, સ્થાનિક લોકોનું કહેવું હતું કે, વિસ્તારમાં બહારના લોકો આવીને આગમાં ઘી હોમવાનું કામ કરી રહ્યાં છે.

આ વિસ્તારમાં તણાવની અસર વેપાર અને લોકોના જીવન પર પડી રહી હતી. પરંતુ તણાવ પૂર્ણ થયા બાદ આશા છે કે, બુધવારથી વિસ્તારમાં ધંધા રોજગાર ખોલવામાં આવશે.