ભાજપના વરિષ્ઠ નેતા લાલકૃષ્ણ અડવાણીની તબિયત બગડી, દિલ્હીની એપોલો હોસ્પિટલમાં દાખલ

ભારતીય જનતા પાર્ટીના વરિષ્ઠ નેતા લાલકૃષ્ણ અડવાણીની તબિયત ફરી એક વખત બગડી છે. તેમને દિલ્હીની એપોલો હોસ્પિટલમાં દાખલ કરવામાં આવ્યા છે.

નવી દિલ્હી :ભારતીય જનતા પાર્ટીના (BJP) વરિષ્ઠ નેતા અને દેશના રાજકીય ઈતિહાસમાં મહત્વની ભૂમિકા ભજવનાર લાલકૃષ્ણ અડવાણીને તબિયત બગડવાના કારણે એપોલો હોસ્પિટલમાં દાખલ કરવામાં આવ્યા છે. આ પહેલા પણ તેમની તબિયત બગડવાની સ્થિતિમાં તેમને એઈમ્સ અને અન્ય હોસ્પિટલોમાં દાખલ કરવામાં આવ્યા હતા.

લાલકૃષ્ણ અડવાણીની તબિયત બગડી : લાલકૃષ્ણ અડવાણીને તબિયત બગડવાના કારણે એપોલો હોસ્પિટલમાં દાખલ કરવામાં આવ્યા છે. 97 વર્ષીય અડવાણીને ન્યુરોલોજીકલ સમસ્યાઓ માટે ડો. વિનીત સુરીની દેખરેખ હેઠળ દાખલ કરવામાં આવ્યા છે. લાલકૃષ્ણ અડવાણી છેલ્લા કેટલાક સમયથી યાદશક્તિ અને વૃદ્ધાવસ્થા સંબંધિત અન્ય સમસ્યાઓથી પીડાઈ રહ્યા છે.

યાદશક્તિ-વૃદ્ધાવસ્થા સંબંધિત અન્ય સમસ્યા :લાલકૃષ્ણ અડવાણીની પુત્રી પ્રતિભા અડવાણી દ્વારા તેમના ઘરે નિયમિત આરોગ્ય તપાસ કરવામાં આવે છે. આ વર્ષે ઓગસ્ટમાં પણ લાલકૃષ્ણ અડવાણીને રૂટિન ચેકઅપ માટે એપોલો હોસ્પિટલમાં દાખલ કરવામાં આવ્યા હતા. જોકે, થોડા દિવસો બાદ તેમને રજા આપવામાં આવી હતી. આ પહેલા જૂનમાં પણ સ્વાસ્થ્ય સંબંધિત સમસ્યાને કારણે તેમને એઈમ્સમાં અને પછી એપોલો હોસ્પિટલમાં દાખલ કરવામાં આવ્યા હતા.