જામા મસ્જીદ પર ઈદની વિશેષ નમાઝ અદા કરાઈ (ANI) નવી દિલ્હીઃમુસ્લિમ ધર્મના મુખ્ય તહેવારોમાં બકરીદનો તહેવાર પણ ખાસ છે. તેને ઈદ-અલ-અઝહા પણ કહેવામાં આવે છે. ભારતમાં આજે 17 જૂને બકરીદની ઉજવણી કરવામાં આવી રહી છે. રાજધાની દિલ્હીની ઐતિહાસિક જામા મસ્જિદમાં ઈદ-ઉલ-અઝહા (બકરીદ)ના અવસર પર સવારની નમાજ અદા કરવામાં આવી હતી.
નમાઝ બાદ લોકોએ એકબીજાને ગળે મળીને શુભેચ્છા પાઠવી હતી. સુરક્ષા માટે કડક બંદોબસ્ત ગોઠવવામાં આવ્યો હતો. દેશભરમાંથી લોકો જામા મસ્જિદની મુલાકાત લેવા અને નમાઝ અદા કરવા આવે છે. બકરીદ નિમિત્તે દિલ્હીના બજારો ધમધમી રહ્યા છે. સારી એવી ભીડ જોવા મળી રહી છે.
બકરી ઈદનું મહત્વ: ઈદ ઉલ અઝહા એટલે કે બકરી ઈદનો તહેવાર ઈસ્લામિક કેલેન્ડર મુજબ જુલ-હિજાના 12મા મહિનાના દસમા દિવસે ઉજવવામાં આવે છે, કારણ કે ઈસ્લામિક કેલેન્ડર મુજબ ઈદની તારીખ અલગ-અલગ હોય છે. આ બલિદાનનો દિવસ છે. એવું માનવામાં આવે છે કે આ તહેવાર હઝરત ઇબ્રાહિમ (અબ્રાહમ) દ્વારા તેમના પુત્ર હઝરત ઇસ્માઇલને બલિદાન આપવાની ઇચ્છાની યાદમાં ઉજવવામાં આવે છે.
આ દિવસે મુસ્લિમ સમુદાયના લોકો પોતાની ક્ષમતા મુજબ બલિદાન આપે છે અને જરૂરિયાતમંદ અને ગરીબોમાં વહેંચે છે. બલિદાનના ભાગોને ત્રણ ભાગમાં વહેંચવામાં આવ્યા છે. એક ભાગ ગરીબ અને જરૂરિયાતમંદોને આપવામાં આવે છે, બીજો ભાગ સંબંધીઓ અને મિત્રોને આપવામાં આવે છે, અને ત્રીજો ભાગ પોતાના માટે રાખવામાં આવે છે. આ તહેવાર ગરીબો અને જરૂરિયાતમંદોને મદદ કરવા અને સમાજમાં ભાઈચારો અને સદ્ભાવનાને પ્રોત્સાહન આપવાની પ્રેરણા આપે છે.
પાકિસ્તાન, મલેશિયા, ઈન્ડોનેશિયા અને જાપાનમાં આજે ઈદની ઉજવણી
ઇસ્લામમાં ચંદ્રને વિશેષ મહત્વ આપવામાં આવ્યું છે. ઇસ્લામિક મહિનાઓ ચંદ્રની સ્થિતિ પર આધાર રાખે છે. કોઈપણ ઇસ્લામિક મહિનો નવા ચંદ્રના દર્શન પછી શરૂ થાય છે. ઇસ્લામિક મહિનામાં 29 દિવસ કે 30 દિવસ હોય છે, તે માત્ર ચંદ્રના દર્શનથી નક્કી થાય છે. ભૌગોલિક રીતે શક્ય છે કે દેશના એક ભાગમાં ચંદ્ર અન્ય ભાગો પહેલા ઉગે. ભારત સહિત કેટલાક એશિયાઈ દેશોમાં 7 જૂને ધુલ હિજ્જાનો ચંદ્ર દેખાયો હતો, તેથી જ ભારતમાં 17 જૂન, સોમવારે ઈદ ઉલ અઝહાની ઉજવણી કરવામાં આવી રહી છે. ભારત ઉપરાંત પાકિસ્તાન, મલેશિયા, ઈન્ડોનેશિયા, જાપાન, બ્રુનેઈ અને હોંગકોંગમાં 17મી જૂને ઈદ મનાવવા જઈ રહી છે. જ્યારે, સાઉદી અરેબિયા, સંયુક્ત આરબ અમીરાત (UAE), કતાર, કુવૈત, ઓમાન, જોર્ડન, સીરિયા અને ઈરાકમાં 16 જૂને ઈદ ઉલ અઝહાની ઉજવણી કરવામાં આવી હતી.
