Attempt to kidnap: বিদ্যালয়ৰ পৰা আহি থকাৰ পথত ছাত্ৰক অপহৰণৰ অপচেষ্টা
ৰঙিয়া, 20 আগষ্ট : ৰঙিয়াৰ কেকেনিকুছিত চাঞ্চল্যকৰ ঘটনা সংঘটিত হৈছে । বিদ্যালয়ৰ পৰা ঘৰলৈ উভতাৰ পথত অপহৰণৰ চেষ্টা এগৰাকী ছাত্ৰক । ক’লা ৰঙৰ চাৰি চকীয়া বাহনত অহা চাৰিজনীয়া দুৰ্বৃত্তৰ এটা দলে অপহৰণ কৰাৰ উদ্দেশ্যেৰে ১২ বছৰীয়া ছাত্রজনক টনা-আজোঁৰা কৰে । লগে লগে ছাত্ৰজনে চিঞৰ-বাখৰ লগোৱাত পুঠিমাৰী নৈৰ মথাউৰিৰে ৰঙিয়া অভিমুখে পলায়ন কৰে দুৰ্বৃত্তৰ দলটোৱে ।
ভুক্তভোগী ছাত্র আৰু মাতৃৰ অভিযোগ অনুসৰি কেকেনিকুছিস্থিত পূব ৰঙিয়া হাইস্কুলৰ ষষ্ঠ শ্ৰেণীৰ ছাত্রজন (১২) বিদ্যালয় চুটি হোৱাৰ পিচতে ঘৰলৈ আহি আছিল । সেই মুহূৰ্ততে পুঠিমাৰী নৈৰ মথাউৰিৰ ওপৰত পূৰ্বৰ পৰা বাহৰ পাতি থকা বাহনখনৰ দলটোৱে ছাত্ৰজনক ৰ’বলৈ দিয়ে । তাৰ পিচত ছাত্ৰজনক ঘৰলৈ থৈ আহিব বিচাৰে আৰু চিপচ্ আৰু চকলেট খাবলৈ দিয়ে ।
কিন্তু ছাত্রজনে অমান্তি হয় আৰু একো নাখাওঁ বুলি কোৱাত দলটোৱে ছাত্ৰজনক ক’লা ৰঙৰ চাৰি চকীয়া বাহনখনত উঠাবলৈ টনা-আজোঁৰা কৰে । ছাত্ৰজনৰ চিঞৰ বাখৰ শুনি ঘটনাস্থলীত দুগৰাকীমান লোক উপস্থিত হয় ।
ৰাইজ অহাৰ উমান পাই ঘটনাস্থলীৰ পৰা চাৰি চকীয়া বাহনসহ পলায়ন কৰে চাৰি দুৰ্বৃত্তৰ দলে । পিতৃহাৰা আৰু দৰিদ্ৰ পৰিয়ালৰ ছাত্ৰজনক কি উদ্দেশ্যেৰে অপহৰণ কৰিব আহিছিল সেয়া ৰহস্যৰ আৱৰ্তত ।
লগতে পঢ়ক:Crime in Dhemaji: চিলাপথাৰত আৰক্ষীৰ অভিযান; ড্ৰাগছৰ লগতে ৫ লাখ ৫০ হাজাৰ টকা জব্দ