Published : Nov 1, 2023, 2:55 PM IST
Traffic jams in Basistha: পৰিবহণ বিভাগৰ কৃপাত তীব্ৰ যান জঁটত ভুগিছে বশিষ্ঠ মন্দিৰৰ জনতা
গুৱাহাটী,১ নৱেম্বৰ:পৰিবহণ বিভাগৰ নতুন নতুন নিয়মৰ বাবে জীয়াতু ভুগিছে সাধাৰণ জনতাই । পুৱাৰ পৰাই তীব্ৰ যান জঁটত ভুগিছে বশিষ্ঠ মন্দিৰৰ সাধাৰণ জনতাই । পৰ্যটক আৰু ভক্তসকলে দীৰ্ঘ সময় ধৰি খোজ কাঢ়ি আহিবলগা হৈছে মন্দিৰলৈ । সোমাব পৰা নাই এম্বুলেন্সকে ধৰি জৰুৰকালীন সেৱাৰ বাহনো । ইয়াৰ মূলতে হৈছে পৰিবহন বিভাগৰ নতুন নিয়ম ।
বুধবাৰৰেপৰা পৰিবহন বিভাগে ধাৰ্য কৰা নিয়ম অনুসৰি চিটি বাছসমূহ বশিষ্ঠ মন্দিৰৰ পৰা প্ৰায় ৭ মিনিটৰ ব্যৱধানত বশিষ্ঠ মন্দিৰ ষ্ট'পেজৰ পৰা ওলাব পাৰিব । যাৰ ফলত শাৰী শাৰীকৈ ৰখাই থ'ব লগা হৈছে এখনৰ পিছত আন এখন চিটি বাছ । প্ৰায় ৮০ খনত অধিক চিটি বাছ ৰখাই থোৱা হৈছে বশিষ্ঠ মন্দিৰত । ফলত তীব্ৰ যানজঁটৰ সৃষ্টি হৈছে বশিষ্ঠ মন্দিৰ প্ৰাংগনত ।
উল্লেখ্য যে পৰিবহন বিভাগৰ এই নতুন নিয়মৰ ফলত যথেষ্ট অসুবিধা সৃষ্টি হৈছে চিটিবাছ চালক হেণ্ডিমেনসকলৰ । কিয়নো পূৰ্বতে কোনো নিয়ম নথকাৰ ফলত বাছসমূহ সোনকালেই উলিয়াই লৈ যাব পাৰিছিল । কিন্তু এই নতুন নিয়মৰ ফলত ঘন্টাৰ পিছত ঘন্টা ৰৈ থাকিব লগা হৈছে বাছসমূহ । যাৰ ফলত বশিষ্ঠ অঞ্চলৰ সাধাৰণ জনতাৰ লগতে চিটিবাছ চালক হেণ্ডিমেনসকলৰো উপাৰ্জন হ্ৰাস হোৱা বুলি উল্লেখ কৰিছে চিটিবাছ চালকসকলে ।