তেজপুৰ, 27 মাৰ্চঃ আগন্তুক লোকসভা নিৰ্বাচনক লৈ এতিয়া তৎপৰ সকলো ৰাজনৈতিক দল আৰু প্ৰাৰ্থী ৷ তেজপুৰ লোকসভা সমষ্টিৰ পৰা এইবাৰ প্ৰতিদ্বন্দিতা আগবঢ়োৱা বিজেপি প্ৰাৰ্থী পল্লৱ লোচন দাসে মনোনয়ন দাখিলত নিৰ্বাচনী বিষয়াৰ হাতত দাঙি ধৰিছে নিজৰ স্থাৱৰ-অস্থাৱৰ সম্পত্তিৰ হিচাপ ৷ ইতিমধ্যে নিৰ্বাচন আয়োগে বেৱ চাইটত প্ৰকাশ কৰিছে পল্লৱ লোচন দাসৰ সৰ্বমুঠ সম্পত্তিৰ পৰিমাণ ৷ বিধায়ক তথা মন্ত্ৰীজনৰ ২০১৭-২০১৮ ত সৰ্বমুঠ আয়ৰ পৰিমাণ আছিল ১৪ লাখ ৭৮ হাজাৰ ৮৬০ টকা । ইয়াৰ পূৰ্বে ২০১৩-১৪ ত মন্ত্ৰী দাসৰ আয়ৰ পৰিমাণ আছিল ৫ লাখ ১৪ হাজাৰ ৯২২ টকা ইয়াৰ বিপৰীতে তেওঁৰ সহধৰ্মিনী দ্বিতীমণি খন্দাইটৰ ২০১৭-১৮ ৰ আয়ৰ পৰিমাণ হৈছে ৮ লাখ ৪৯ হাজাৰ ৭৫৩ টকা ।
তেজপুৰৰ প্ৰাৰ্থী পল্লৱ লোচন দাসৰ সম্পত্তিৰ পৰিমাণ উল্লেখ্য যে, মন্ত্ৰী তথা লোকসভা নিৰ্বাচনৰ প্ৰাৰ্থী দাসৰ পাঁচটা বেংক একাউণ্টত থকা নগদ ধনৰ লগতে বীমা, বণ্ড, এটা সোণৰ আঙুঠি , চেইন আৰু ফ’ৰ্ড ফিগ’ বাহনসহ অস্থাৱৰ সম্পত্তিৰ পৰিমাণ হৈছে ৪৩ লাখ, ৩৬ হাজাৰ ৩৪৬.২১ টকা ৷ লগতে তেওঁৰ পত্নীৰ নামত অস্থাৱৰ সম্পত্তিৰ পৰিমাণ হৈছে ৪১লাখ ৭০ হাজাৰ ১৯৩ টকা ৷ পল্লৱ লোচন দাসৰ ১২ গ্ৰাম ওজনৰ সোণৰ চেইন এডাল আৰু ৩.৫ গ্ৰামৰ এটা সোণৰ আঙুঠি আছে ৷ ইয়াৰ উপৰিও বিশ্বনাথৰ বাঘমাৰিত পাঁচ স্থানৰ উপৰিও ৰঙাপৰা বিধানসভা সমষ্টিৰ বৰ পাতগাঁৱত মুঠ১৫বিঘাৰ অধিক কৃষিভূমি, পত্নীৰ নামত বাঘমাৰীত ৬ স্থানত আছে ২৪ বিঘাৰো অধিক কৃষি ভূমি ৷ শপতনামাত উল্লেখ থকা অনুসৰি পল্লৱ লোচন দাসৰ নামত থকা ভূমিৰ মূল্য ২৭ লাখ ৮৪ হাজাৰ ৮০০ টকাৰ বিপৰীতে তেওঁৰ পত্নীৰ নামত ভূমিৰ মূল্য হৈছে ৩১ লাখ ৫৮ হাজাৰ ৮০০ টকা ৷
