কলিয়াবৰ,17 মাৰ্চ: বিধানসভা নিৰ্বাচনৰ বাবে ৰাজ্যৰ ৰাজনৈতিক দলসমূহে প্ৰচাৰ চলাই থকাৰ সময়তে সমষ্টিয়ে-সমষ্টিয়ে জ্বলিছে ক্ষোভৰ জুই ৷ আন আন সমষ্টিৰ দৰে কলিয়াবৰ সমষ্টিতো বিগত চৰকাৰৰ বঞ্চনাৰ বিৰুদ্ধে ক্ষোভ প্ৰকাশ কৰিছে চাহ শ্ৰমিক সকলে ৷ নিৰ্বাচন আহে, নিৰ্বাচন যায় ৷ ভাষণৰ ফুলজাৰিৰে ভোটাৰৰ মন জয় কৰি গাদী দখলৰ পাচত সমষ্টিবাসীক পাহৰি যায় ৷ তেনে দৃশ্য এতিয়া সুলভ হৈ পৰিছে ৮৯ নং কলিয়াবৰ বিধানসভা সমষ্টিতো ৷
বিগত সময়ছোৱাত জন প্ৰতিনিধিয়ে দিয়া প্ৰতিশ্ৰুতিৰ যোগ-বিয়োগৰ আলোচনাত হতাশ আৰু ক্ষোভিত চাহ-শ্ৰমিকৰ প্ৰতিক্ৰিয়া প্ৰকাশ ৷ চিকনী চাহ বাগিছাৰ একাংশ মহিলা শ্ৰমিকৰ ক্ষোভ, নিৰ্বাচন আহিলে নাচি-বাগি ভোট বিচাৰে, জয়ী হোৱাৰ পাচত আমাক গুৰুত্ব নিদিয়ে ৷ আমাৰ মূল্য নুবুজিলে আমিও কাৰোৰে মূল্য নুবুজো ৷ সেয়া সৰ্বানন্দই হওক বা গৌৰৱ গগৈয়ে অথবা নৰেন্দ্ৰ মোদীয়ে হওক ৷