কলিয়াবৰ, 12 জুলাই : কলিয়াবৰৰ বিভিন্ন স্থানত অবৈধ চুলাই মদৰ বিৰুদ্ধে কলিয়াবৰ আৰক্ষী (Kaliabor Police) আৰু আবকাৰী বিভাগে (Excise Department) অভিযান অব্যাহত ৰাখিছে । কলিয়াবৰৰ বৰহোলা গাঁৱত জখলাবন্ধা আৰক্ষী (Jakhalabanda Police)ৰ এটা বৃহৎ দলে দেওবাৰে নিশা অভিযান চলাই কেইবাটাও চুলাই মদৰ ঘাটি ধ্বংস কৰাৰ লগতে প্ৰায় ২,০০০ লিটাৰ চুলাই মদ নষ্ট কৰিবলৈ সক্ষম হয় । আৰক্ষীৰ অভিযানৰ সময়ত চুলাই মদ ব্যৱসায়ী আৰু আৰক্ষীৰ মাজত খণ্ডযুদ্ধ হোৱাও দেখিবলৈ পোৱা যায় ।
আৰক্ষীলৈ লক্ষ্য কৰি চুলাই মদ ব্যৱসায়ীয়ে প্ৰহাৰ কৰিবলৈ খেদি অহাত আৰক্ষীয়ে চুলাই মদ ব্যৱসায়ীক কঠোৰ ভাষাৰে সকিয়নী দিয়ে । আনহাতে, কলিয়াবৰ আৰক্ষী (Kaliabor Police) আৰু আবকাৰী বিভাগ (Excise Department)ৰ এটা দলে দেওবাৰে কলিয়াবৰ চাহ বাগানতো (Kaliyabar Tea Estate) যুটীয়াভাৱে অভিযান চলায় ৷ আৰক্ষীৰ দলটোৱে অভিযানৰ সময়ত প্ৰায় ১০০০ লিটাৰ দেশীয় সুৰাৰ লগতে সুৰা প্ৰস্তুত কৰা বিভিন্ন সামগ্ৰী নষ্ট কৰে ।