সোমবাৰে কলিয়াবৰত উপস্থিত হ'ব প্ৰিয়ংকা গান্ধী

পোন প্ৰথমবাৰৰ বাবে কলিয়াবৰত উপস্থিত হ'ব ভাৰতীয় জাতীয় কংগ্ৰেছ দলৰ সাধাৰণ সম্পাদিকা প্ৰিয়ংকা গান্ধী ৱাদ্ৰা ৷ কংগ্ৰেছৰ পাঁচটা গেৰাণ্টি লৈ কলিয়াবৰত উপস্থিত হ'ব গান্ধী ৷ এই লৈ এতিয়া কলিয়াবৰৰ কংগ্ৰেছ কৰ্মীসকলৰ মাজত চলিছে ব্যাপক প্ৰস্তুতি ৷

কলিয়াবৰ,21 মাৰ্চ:কংগ্ৰেছৰ পাঁচটা গেৰাণ্টি লৈ সোমবাৰে কলিয়াবৰত উপস্থিত হ'ব সৰ্ব ভাৰতীয় জাতীয় কংগ্ৰেছৰ সাধাৰণ সম্পাদিকা প্ৰিয়ংকা গান্ধী ৱাদ্ৰা ৷ পোন প্ৰথমবাৰৰ বাবে কলিয়াবৰত প্ৰিয়ংকা গান্ধীৰ আগমনক লৈ কংগ্ৰেছৰ দলীয় কৰ্মীৰ মাজত ব্যাপক প্ৰস্তুতি ৷ পিতৃৰ নামত উৎসৰ্গীকৃত খেল পথাৰত উপস্থিত হৈ গান্ধীয়ে অসম বিধানসভা নিৰ্বাচনৰ বাবে প্ৰচাৰ চলাব বুলি জানিব পৰা গৈছে ৷

প্ৰাপ্ত তথ্য অনুসৰি নলতলি আৰিমৰাৰ ৰাজীৱ গান্ধী ক্ৰীড়া প্ৰকল্পৰ খেলপথাৰত এখন নিৰ্বাচনী সভাত উপস্থিত থাকিব প্ৰিয়ংকা গান্ধী ৱাদ্ৰা ৷ গান্ধী উপস্থিত থাকিব লগীয়া নিৰ্বাচনী সভাৰ বাবে প্ৰস্তুতি চলাই থকাৰ সমান্তৰালকৈ কংগ্ৰেছ কৰ্মী সকলে প্ৰায় 50 হাজাৰ ৰাইজৰ উপস্থিতি আশা কৰিছে ৷

উল্লেখ্য যে, সৰ্বভাৰতীয় জাতীয় কংগ্ৰেছৰ সাধাৰণ সম্পাদিকা গৰাকীয়ে দেওবাৰে যোৰহাট, নাজিৰা আৰু খুমটাইত নিৰ্বাচনী সভা সম্বোধন কৰি অসমৰ ৰাইজক কংগ্ৰেছক ভোট দিবলৈ আহ্বান জনায় ৷ যোৰহাটত এখন নিৰ্বাচনী সভা সম্বোধন কৰি গান্ধীয়ে বিজেপি চৰকাৰৰ বিৰুদ্ধে মিথ্যাচাৰৰ অভিযোগ তুলি সৰৱ হৈ পৰা পৰিলক্ষিত হয় ৷

লগতে পঢ়ক:সোমবাৰে পুনৰ অসমলৈ কেন্দ্ৰীয় গৃহমন্ত্ৰী অমিত শ্বাহ